1 Anun ñu mëtima nëtë ka, Jesus anu trigo ꞌapákë naën kuankin ka ꞌain unikaman ꞌakëñuma ꞌixun. Trigo siríkakin bixun piakëxa.

2 Usoia iskin ka fariseo unikama Jesús kakëxa: —Ka ís, anun ñu mëëtima nëtën usokin ñu ꞌati ꞌaimabi ka min unikama usa ñu ꞌaia.

3 Kakëxun ka Jesusan kakëxa: —¿Mitsun karamina kuënëo bana unaniman Davinën ka ꞌakëñuma ꞌixun abëa kuankë unikamabëtan ësokin ñu ꞌakëxa?

4 David nën ka ꞌakëñuma ꞌixun, Diosan xubunu atsinxun anu ꞌikë pan, a bixun piakëxa. A panëxa ánpitima ꞌimainun axá abë kuankë an pitima ꞌikëbi, axá sacerdotenënshi piti ꞌikëbi.

5 ¿Mitsun karamina Moisésnëan kuënëo bana a iskëma ꞌain? Sacerdote kamanka anun ñu mëëtima nëtën Dios rabiti xubunuxun anun ñumëtima nëtënbi tantikima ñu mëibi uchama ꞌikën.

6 ꞌËn kana mitsu kain, anuxun nukën Papa Dios rabiti xubu samasaiira ka ënu ꞌikën.

7 Mitsun karamina ënë bana uisai kara kia kixun kuakëma ꞌain: "ꞌËn kana mitsuxmi nuibanankë ꞌiti kuë́ënin ñuina ꞌarakakë xaroima". Ënë bana kuakë ꞌixun kamina uin kara uisa ñubi ꞌakëma ꞌikë a ꞌucha okëma ꞌitsian.

8 Unin Bëchikë ꞌaish kana anun ñu mëëtima nëtësama kushíira ꞌain.

9 Jesús ka anua Judiokama timë́kë xubunu kuankëxa.

10 Anu ka uni achúshi aín mëkën bamakë ꞌiakëxa. Usa ꞌain ka Ami manankatsi kixun Jesús ñukakëxa, —¿Anun ñu mëtima nëtën uni pëxkuti kara asabi ꞌik?

11 Kakëxun ka Jesusan kakëxa: ¿Uinu ꞌikë mitsu uni achushitan kara, achúshi ñuina ꞌarakakë ꞌixun anun ñumëtima nëtën kininu pakëtia baritima ꞌik?

12 ¡Achúshi unix ka ñuina ꞌarakakësamaira ꞌikën! Usa ꞌain ka anun ñumëtima nëtën ñu upíira ꞌati asabi ꞌikën.

13 Usa ꞌain ka Jesusan aín mëkën ꞌinsinkë uni ka mëishpak kakëx, mëishpatishi aín mëkën pëxkuakëxa.

14 Usa ꞌain ka fariseokama chikiti uisakin kara Jesús rëtëti kia ësënankëxa.

15 Fariseo unikama ꞌësënania ꞌunani ka anuax Jesús kuankëxa. Kuankëbë ka ꞌaisamaira uni abë́ kuankëxa. Kuania ka Jesusan atun ꞌinsin pëxkuakëxa.

16 ꞌËn ñu ꞌakëbëta kamina uinu ꞌikë unibi katima ꞌaín —Kixun ka kakëxa.

17 Ënën ka usaia ꞌiti ñuia profeta Isaías kiásabi oi ꞌiakëxa:

18 "Ënëx ka ꞌën uni ꞌikën, ꞌën kaiskë a ꞌianan. ꞌËn kuëënkë a ꞌimainun ꞌën ami sinairakë a ꞌikën. ꞌËn Bëru Ñunshin Upí kana a ꞌinanin, an ka kamabi menu ꞌikë uni upiti tsonun bana ñuixunti ꞌikën.

19 An ka sharati kuëbikanantima ꞌikën. Uinbi ka ëmanxun aín bana kuatima ꞌikën.

20 Xai tëntunkë ax ka tëkë́tima ꞌikën, ꞌianan ka tirí axa bënámëisa tani kuinkë axi bënátima ꞌikën. Anuan ënë nëtënu ꞌikë unikama ꞌiëñëti ꞌitamainun ka usabi ꞌiti ꞌikën.

21 Kamabi menu ꞌikë unix ka ami katamëti ꞌikën".

22 Usai ꞌikëbëtan ka uni achúshi ñunshin ꞌatimanën ꞌimikëa bëxuñu ꞌianan banañuma Jesusnu ubankëxa, ubania pëxkukëx ka uni banakëxa.

23 Jesusan usoia isi ka anu ꞌikë unikama ratuti sinánkasmai kanankëxa:

—¿Ënë uni kara asérabi Davinën rëbunki, axa uti nun kaínkë, a ꞌik?

24 Jesusan usokin ñu ꞌaia ñuikania kuati ka fariseo unibu kiakëxa:

—Ñunshin ꞌatimanën ꞌapu Beelzebú* aín kushin ꞌamikëxuinshi ka ënë unin ñunshin ꞌatima chikinia.

25 Usai kia atun sinan ꞌunánkin ka Jesusan kakëxa:

"Ka ësa ꞌikën, bëtsi bëtsi ëmanu bukukë unikama nuibananima nishanani ka ꞌakanani këñutia. Usaribiti ka aín aintsibë buküabia nishanankë unikama amanu amanu kuani tsuáki nëtëtia.

26 Usa ꞌain kara ñunshin ꞌatimanën ꞌapu satanás axi mëanankin, ¿Uisakin aín kushi bëruanti ꞌik?

27 Kamina kikanin ꞌën isana ñunshin ꞌatimanën ꞌapu Satanasan* ꞌamikëxun uninua ñunshin chikíni, usa ꞌain kara, ¿Uin ira kara min unikama kushi anun ñunshin chikinti ꞌinanin? Usa ꞌain ka min unikama min kaina këmëi kixun ꞌunania.

28 ꞌAibi kana ꞌën Diosan Bëru Ñunshin Upitan kushin ꞌamikëxun, ñunshin ꞌatima chikínkë a kamina ꞌunánti ꞌain, usa ꞌain kamina anun Diosan nëtë naíkamëonu ꞌiti nëtë ka ubaxa kixun ꞌunanti ꞌain.

29 Ësa ka. Uinbi ka kushi uni aín xubunu atsínxun aín ñu bikuanima. Aín ꞌibu pain nëaxun kuni ka aín ñu bikuánti ꞌikën.

30 Uix kara ꞌëbëma ꞌikë ax ka ꞌëmi nishia; uin kara biti ꞌë ꞌakinima an ka ꞌaisama okin masá oia.

31 Usa ꞌaín kana ꞌëx kin, nukën Papa Diosan ka unin ꞌatima ñu ꞌakë kamabi tërë́nti ꞌikën, amia ꞌatimati banakë aribi. Usa ꞌaibi ka axa aín Bëru Ñunshin Upí ñui ꞌatimati banakë uni, a Diosan aín ꞌucha ënë nëtëkama ꞌimainun uinsarabi tërënuxuma aia.

32 Uix kara Unin Bëchikë ñui ꞌatimati banaia a uni ka nukën Papa Diosan aín ꞌucha tërë́nti ꞌikën. Usa ꞌaibi ka axa aín Bëru Ñunshin upí ñui ꞌatimati banakë uni aín ꞌucha nukën Papa Diosan ënë menuxun ꞌanan uinsaranbi tërëntima ꞌikën.

33 I upí ꞌixun ka aín bimi upí ꞌinania, i ꞌatima ꞌixun ka ꞌatimakin tuaia. I kananuna ꞌain bimi iskin ꞌunanin.

34 ¡Runun rëbunki! ¿Uisa ꞌaish kaina mitsux ñu upí banati ꞌain? Mitsuxi kamina ꞌaisama ꞌain. Min nuitunuaxa chikikë a kamina min kuëbitan banain.

35 Uni upí ax ka upiti kánania ax upí ꞌaish, uni ꞌatima ax ka ꞌatimati banaia ax ꞌatima ꞌaish.

36 ꞌËn kana mitsu kain, anuan ënë nëtë tëmërai këñuti nëtë anun ka uix kara ꞌatimati banaia ax ꞌucha okë ꞌiti ꞌikën.

37 Min bananbi kamina ꞌatima okë ꞌiti ꞌain, ꞌianan kamina min kuëbitan banakë anunbi ꞌuchokë ꞌiti ꞌain".

38 Fariseokama ꞌimainun an kuënëo bana ꞌunánkë unikaman ka Jesús kakëxa: —Nun kananuna bëtsi unian ꞌakëma ñu min ꞌaia istisa tanin.

39 Kakëxun ka Jesusan kakëxa: —ꞌAtima uni ꞌimainun ꞌaisama unikaman ka unin ꞌakëma ñu ꞌanun kixun ꞌë ñukatia, ꞌaibi kana profeta Jonás kiasabiokin ꞌaxuntima ꞌain.

40 Jonás ax ka rabë́ ꞌimainun achúshi nëtë ꞌianan rabë́ ꞌimainun achúshi ñantanribi tsatsa chaíira pukumëu ꞌiakëxa. Usaribiti kana ꞌën Unin Bëchikë ꞌinux ua ꞌaish rabë́ ꞌimainun achúshi nëtë ꞌimainun achúshi ñantanribi me mëu ꞌiti ꞌain.

41 Ninivenu ꞌikë unikama ka anun këñuti nëtë ꞌikëbë niruti ꞌikë, usai ꞌikin ka ënë menu ꞌikë unikama ꞌatima oti ꞌikën, Jonasnën nukën Papa Diosan bana ñuixunkëxun kuati sinanati ka ami sinánkëxa. Jonás ꞌiásamaira kana ënu ꞌëx ꞌain.

42 Amiaxa bari urukë pasukuaxa ukë xanu ꞌapu aribi ka anun tëmërai këñuti nëtë ꞌikëbë nirui mitsu ñui ꞌatimati banati ꞌikën, anribi ka ꞌura menua uxún Salomón ñu ꞌunaira ꞌixun bana ñuia kuati uakëxa, Salomón ꞌiásamaira kana ënu ꞌëx ꞌain.

43 Ñunshin ꞌatima uninuax chikiti ka anu uni ꞌikëma panákë me anu kuankin anu tantiti bari nikibi mërakima ka sinania:

44 "ꞌËn anua chikia anubi kana kuantëkënti ꞌai kia". Anuax kuanki bëbakin ka xubu maë́nkin mëniokë upí ꞌaish ꞌibuñuma usaribi ꞌikë anuaxa chikia uni a mëraia.

45 Usa ai ka kuanxun mëkën achúshi ꞌimainun rabë́ bibiani abë́ kuanx anuaxa chikia uni anubi atsíntëkënia. Usa ꞌain ka anua ñunshin ꞌatimakama atsinkë uni ax bëráma ꞌiasamaira ꞌia. Usaribiti ka ënë uni ꞌatimakama ꞌinuxun ꞌaia.

46 Jesusan anu ꞌikë unikama bana ñuixunkëbë uxún ka ëmanxun aín titan, aín xukë́antubëtan abë́ kananuna banakatsi kixun anu ꞌikë uni kakëxa.

47 Anuax kuakin ka achúshi unin Jesús kakëxa: —Min titabë ka min xukë́antu ëman ꞌikën. Ka mibë banatisa tania.

48 Kakëxun ka uni kakëxa: —¿Uix kara ꞌën tita ꞌik? ¿ꞌImainun kara uikamax ꞌën xukëantu ꞌik?

49 Usai kikin ka aín unikama aín mëkënan sanankin kakëxa: —Ënë unikamax ka ꞌën tita ꞌimainun ꞌën xukë́antu ꞌikën.

50 Uin kara ꞌën Papa naínu ꞌikë ax kuëënkësabi okin ꞌaia, akamax ka ꞌën xukën ꞌimainun ꞌën chirabakë ꞌimainun ꞌën tita ꞌikën.