1 Usaiꞌ ꞌitankëxun ka uni ꞌimainun aín unikama Jesusan ësokin kakëxa:

2 —An ñu ꞌunánkë ꞌimainun fariseo unikaman ka Moisés kia sabiokin ꞌunamia.

3 Usa ꞌain kamina, mitsun an ꞌunamikësoi ꞌiti ꞌain; ꞌAibi kamina akama ꞌikësa oi ꞌitima ꞌain, atun ka ax kikësabi oi ꞌikima bëtsi ñu ꞌaia.

4 Atux ka usai ꞌitima bana kia, ꞌaibi ka a bana kikësoi ꞌima, usa ꞌixun ka atun bëtsi ñu ëñëiira amixubi aín mëkën rëbubi tikaisama tania.

5 Kamabi ñu ka unin isti kupinshi ꞌaia. Atun bëmananu anan pëñanu kuënëo bana nanti kuë́ënia, ꞌanan ka chupa chaxkë anu ñu bënta bëntabu a pañuti kuë́ënia.

6 ꞌAnan ka anuxun piti upíira anu tsóti kuë́ënia, ꞌianan ka anu timë́ti xubunu rëkuëni tsóti kuë́ënia,

7 Usai ꞌikin ka unian kamaxubi upiokin kati kuë́ëanan ëmanxuribi an ñu ꞌunánkë uni kati kuë́ënia.

8 ꞌAibi kamina mistux unian ꞌën ꞌibu kati kuëntima ꞌain, mitsux kamina kamaxbi xukën kamashi ꞌaín, usa ꞌaish kamina achúshi ꞌibuñuishi ꞌain.

9 Mitsun kamina ënë menuxun uibi ꞌën papa katima ꞌain, usa ꞌain ka min papa achúshi naínu ꞌikën.

10 Mitsux kamina ꞌën kana an ubankë kanun kitima ꞌain, Cristo axëshi ka an ubankë ꞌikën.

11 Uix kara bëtsi samaira ꞌisatania an ka rairi ꞌakinti ꞌikën.

12 Ax bëtsisamaira ꞌisatankë ax ka, ñumara ꞌiti ꞌikë, uix kara ñumarása ꞌikë, ax ka chamikë ꞌiti ꞌikën.

13 —¡Anu ka mikama an kuënëo bana ꞌunánkë ꞌimainun fariseokama, upisa ꞌaibi ꞌatimakama! Min kamina anun naíkamëonu kuanti xëkuë a xëpuin, anun rairi kuainsama okin. Mitsuxribi kamina anun atsintima ꞌain, an anun kuainsa tankë akama anun atsinun ënima.

14 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatimakama! An xanu kasunamëkë kaman xubu ꞌaisama oi, ami këmëi banakin basipain ñukaxunkë; min kamina chaíira tëmëranuxun ꞌain.

15 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatimakama! An ka me ꞌimainun parunpapanu kuankin, bana usaia ꞌiti ñuixunkin an nuiti bitsia, ax ka uni achúshi ꞌaibi rabë́ ꞌaish manëtsinu kuanun ꞌimia mitsux ꞌikësaribiti ꞌinun.

16 —¡Anu ka mikama an bëxuñukama nikinkë ꞌikën mitsux, kamina kikanin: Uin kara këmëkima anu timëti xubu rabia, an ka añu ñubi ꞌaima; ꞌaibi ka an kuri xubunu nankë rabikë, an usakinbi ꞌati ꞌikën.

17 ¡Bënxuñu ꞌai sinankamakë! ¿Añu ñux ira kara ñu itsi samaira ꞌiti ꞌik: kara kuri ꞌianan, anuxun rabiti xubu chaíira, an ka kuri upíira ꞌinun ꞌimia?

18 Ësairibi kamina mitsux kikanin: "Uin kara anuxun ñuina xaroti ami asérabi sinánia, an ka ñankaishi ꞌiti ꞌikën; ꞌaibi ka anunxun ñuina xaroti anu nanti a ꞌinankatsi kixun ꞌinanti ꞌikën".

19 ¡Bëxuñukama! ¿Añu ñux kara chaa ꞌik: a ꞌinanti ꞌimainun anuxun xaroti ax kara upí ꞌiti ꞌik?

20 Uin kara anuxun ñuina xaroti ami asérabi sinánia, ax ka amishi sinánima anu ꞌikë, ñukama amiribi sinánia;

21 ꞌImainun ka uin kara anuxun rabiti xubumi sinánia ax ka ami asérabi sinánia, ꞌimainun ka Dios anu ꞌikë amiribi sinánia.*

22 Uin kara naími okin sinánia, an ka Dios tsókë ami sinánia, usa ꞌai ka Dios anu tsókë amiribi sinánia.

23 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatima kama! Min kaina mitsun ñu ꞌapakë chamara ꞌimainun sanuira ro ꞌinanin, ꞌainbi kamina aira tanti bana ami manutin: Ax ka ñu upí ꞌati, nuibananti ꞌimainun upí sinánñu ꞌiti, a kaina bëtsi ñu ꞌakima ꞌati ꞌain.

24 ¡Mikama an bëxuñukama an bëtsi nikinkë, min kamina xëatinua samun bitsin, ꞌaibi kamina camello achúshi e kësa ꞌain!

25 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatima kama! Mix kamina anun xëati ꞌimainun ami piti ratukëñu xampa kaxuishi chukakësa ꞌain, ꞌaibi kamina ꞌukëmëu mëkamati sinani, nishanankë ꞌaish upíma ꞌain.

26 ¡Fariseo bënxuñukama! Aín më́u pain kamina ami xëati xampa ꞌimainun ratu chukati ꞌain, usakimi ꞌakëx ka më́u ꞌimainun ëman upí ꞌiti ꞌikën.

27 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatimakama! Míkamax kamina anu uni mainkë ꞌaish uxuanën pukukësa aín, usa ꞌaishi kamina ëman upisa ꞌain, ꞌaibi kamina mëú uni bamakë xo bukukësa ꞌianan bëtsi bëtsi chubañusa ꞌain.

28 ¡Usaribi kamina mikama unin iskëx upisa ꞌaibi mëú këmëi bëtsimi nishkë ꞌain.

29 —¡Anu ka mikama an kuënëo bana ꞌunánkë ꞌimainun fariseo, upisa ꞌaibi ꞌatimakama!, Uisa kupin kaina an bana ñuikëkama anu mainti anan, ꞌuchañumakama tankin ꞌakë a mënion!

30 Kamina kin: "Nukaman chaitiokë ꞌia a nëtën tsóba ꞌaish kananuna an profetakama rëtëa usama ꞌitsia".

31 Mitsunbi kamina ꞌunani nukamax kananuna an profetakama rëtëa aín rëbunki ꞌai kixun.

32 Usa ꞌain kamina mitsun chaitiokë kaman pë́ua ꞌa ñukama këñuti ꞌain.

33 —¡Runun rëbunki! ¿Uisax karamina manë tsi rëkirukë anuax mitsux abati ꞌain?

34 Usa ꞌain kana ꞌën xutin profetakama ꞌimainun uni sinañuira këñun an bana kuënëokë uni xutin. Usa ꞌaibi kamina bëtsi rëtëtankëxun i curusokënu bëntanti aín. Rairi ribi kamina ꞌanuxun bana ñui timëti xubu nuxun, më́anan bëtsi bëtsi ëma kamanuaribi bariti aín.

35 Míkaman kamina uni ꞌuchañuma kama menu ꞌain imi ꞌapakë a kupiokin, Abel ꞌuchañuma ꞌikëbi á ixun, Zacarías Berequíasnën bëchikë ribi anuxun ñuina xaroti anuxun rëtëakën.

36 Kana asérabi mitsu kain: Ënën rëbunki kamax ka tëmëramikë ꞌiti ꞌikën.

37 ¡Jerusalén, Jerusalén uisa kupin kaina profetakama maxatan rëtëin, Diosan xukë ikëbi! ¡Uiti okinshi karana min bëchikë timëtisatan, atapanëan ꞌain tuá ꞌain pëchi ukë́mëu timëkësa okin, bëruan kaskëbëtabi kamina kuënkëma ꞌain!

38 Mikama xubu ka anu uni ꞌikëma rakankë ꞌiti ꞌikën.

39 Kana mi kain: —Bërí kamina ënë nëtënbi ꞌë istëkënima anun ëx uti nëtë ꞌitamianun. ¡Upíira okin rabikë ka an nukën ꞌIbu anën ukë ax ꞌiti ꞌikën!