1 Kakin sënëonki ka Jesusan aín unikama ëtsoki kakëxa:

2 —Míkaman kaina ꞌunanin, rabë́ nëtë ka pishiaxa anun Pascua nëtë ꞌiti, anun ka Unin Bëchikë ꞌikë cruznu bëntanun ꞌë ꞌinanti ꞌikën.

3 A nëtën ka sacerdote ꞌapukama ꞌimainun kaniakëkë judiokama a ëmanu ꞌikë timëakëxa, sumo sacerdote Caifás ꞌain xubunu.

4 Anuxun ka bixun Jesús paranxun rëtëti sinankëxa.

5 ꞌAibi ka kiakëxa: —Anun timëti nëtë kananuna ꞌatima ꞌain, ëmanu ꞌikë unikama numi nishi tsuakirutima kupí.

6 Jesús ka Betanianu ꞌikë, Simón aín nami chankui chëkikë aín xubunu ꞌiakëxa;

7 Usai ikëbë a ꞌurama ukin ka achúishi xanun, chumu chukumara okin akë anu ro sanuíira ꞌai kupíirakë. Bëxun ka anuxun piti chanu pi tsokë ꞌain, Jesusan maxka chabokëxa.

8 Usakin ꞌaia isi ka Jesusan unikama ꞌitsaíira nishakëxa: —¿Uisa kupí kaina ro kupikë ënë ampënkan*?

9 Usa ꞌain ꞌitsaíira kuríki kupí marutisa ka ꞌiaxa, ñuñuma unikama anun ꞌakinti.

10 Jesusan ka kia kuakin kakëxa: —¿Uisa kupin kaina ënë xanumi nishin? An ka ñu upíira ꞌë kupí ꞌaxa.

11 Kamabi nëtën kamina uni ñuñumabë ꞌinuxun ꞌain, ꞌaibi kaina kamabi nëtën ꞌëbë́ ꞌinuxuma ꞌain.

12 Usakia a xanun sanu ro, ꞌën naminu chabokë an ka ꞌë bamaia unin mainti kupí ꞌaxa.

13 Asérabi kana mi kain: Uinu ꞌikë menuxubi kara ënë bana upí ñuia, kamina ësakian xanuxun ꞌë ꞌakë aribi sinanti ꞌain.

14 Usa ꞌain ka mëkën rabë́ ꞌimainun rabë́ aín unikama, achúshi Judas Iscariote kakë ax sacerdote ꞌapukama isi kuanxun,

15 Kakëxa: —¿Añu kaina ꞌë Jesús ꞌinankëxun ꞌinanti ꞌain?.

Usakin kakëxun ka akaman mi kana treinta kuríki ꞌinanti ꞌai kixun kakëxa.*).

16 Usakin kakëxun ka, Judasnën uisokin kara uni Jesús ꞌinanti ꞌikë kixun bariakëxa.

17 Anun chamiti këñuma ꞌakë pan piti nëtë taëokëbëtan, ka Jesús aín unikama a ꞌurama ukin kakëxa: —¿Uinuxun karanuna anun chamitikëñuma ꞌakë pan piti mi mënioxunti ꞌain?

18 Kia ka Jesusan kakëxa: —Ka kuantan a ëma anu ka ꞌën ꞌunánkë uni ꞌikë, a kaina kati ꞌain: "Nukën ꞌIbu ka kiaxa: ꞌËn nëtë ka ꞌurama ꞌikë, min xubunuxun kana Pascua ꞌinukin ꞌën unikamabëtan piti ꞌain".

19 Aín unikaman ka Jesusan kakësabiokin ꞌakëxa, kakëxun ka anuxun pascua nëtë ꞌinúkin piti mëniokëxa

20 A ñantabukëbë ka Jesús aín unikama mëkën rabë́ ꞌimainun rabë́ akamabë́ anuxun piti chanu tsóbuakëxa; 21 anuxun ka pikin kakëxa:

—Asérabi kana mi kain achúshi min kamina ꞌë uni ꞌinanuxun ꞌain.

22 A kaman ka ꞌitsaíira masá nuituti achúshi achushitax anu kuankin ñukakëxa ¿ꞌËn ꞌIbu ꞌën karana a ꞌain?

23 Jesusan ka kakëxa: —Axa aín pan, xampanu ëbëta chabokë an ka ꞌë uni ꞌinanuxun ꞌaia.

24 Unin Bëchikë ka nikiani kuanti ꞌikë kuënëo bana kikësabi oi, ꞌaibi ka ¡Uin kara ꞌë ꞌuchoia ax ꞌë tëmëraminux! Bakëntima ꞌiakëxa.

25 Usa ꞌain ka Judas an uni ꞌinanti an Jesús ñukakëxa: —ꞌËn ꞌIbu ¿ꞌËn karana a ꞌain?

—Kia ka mix kamina a ꞌai kixun —Jesusan kakëxa.

26 Anuxun pikin ka Jesusan pan aín mëkënan bikin asabi ka kixun aín Papa Dios, kakin tukaxun, aín unikama ꞌinánkin kakëxa: —ꞌËnë ka bit, ka pit ënëx ka ꞌën nami ꞌikë.

27 Anuxun ka uvas baka xampami aín mëkëna bikin, aín Papa Dios, asabi ka kixun kakin aín unikama: —ꞌInankin kamaxunbi ka xëa kakëxa,

28 Ënëx ka ꞌën imi ꞌikë, a ꞌapati ꞌën bamakëbë a kupí ꞌitsaíira uni ꞌië́ti mitsubëtan ꞌakë ꞌikën, imi ꞌapakë ënën ka kamabi unin ꞌucha tërë́nkë ꞌiti ꞌikën.

29 ꞌAibi kana mikama kai ënuxun kana uva baka ꞌatëkënima, ꞌën Papa nëtë naíkamëonuxun mitsubëtan anun uva baka ꞌatëkënti nëtë ꞌitamainun.

30 Anuax Dios rabi salmos kantatankëx ka Jesús Olivos matánu kuankëxa

31 Usa ꞌain ka Jesusan aín unikama kakëxa: —Kamabi mitsun kamina ënë ñantan ꞌëmi sinánti ënti ꞌain, kuënëo bana kikësabioi:

"An bëruonkë rëtëkëbë ka anu ꞌikënua ovejakama aman aman kuani abisti ꞌikën".

32 ꞌAibi kana ꞌëa rëtëkëx baiskitankëx, mitsu rëkuën obiani Galileanu kuanti ꞌain.

33 Pedronën ka kakëxa: —Aín patsanëxa mimi sinánima manúkëbëbi kana ꞌën uinsarabi manutima ꞌain.

34 Jesusan ka kakëxa: —Asérabi kana mi kai: ꞌËnë imë́bi, kamina ꞌatapa banatisamapan ꞌain, rabë́ ꞌimainun achúshi oí ꞌë isamina ꞌunanima kinuxun ꞌain.

35 Pedronën ka kakëxa: Mibë bamanuxubi kana, mi kana ꞌunanima kitima ꞌain.

Kikëbë ka kamabi ꞌain unikamaribi usaibi kikankëxa.

36 Usa ꞌain ka Jesús aín unikamabë Getsemaní kakë anu kuanxun kakëxa: —Ënu ka tsobukan, ꞌëx ꞌuri kuantankëx banatamainun.

37 Anuxun ka Pedro ꞌimainun Zebedeonën bëchikë rabë́ ubankëxa, anuax ꞌaisamatani masasinani nitëxëakëxa.

38 Ka kakëxa: —¡ꞌËn raraitsibi kana bamasisa tani! Ënu ka mikamax tikí, ꞌaibi kamina ꞌën ꞌikësaribiti ꞌuxtima ꞌain.

39 Katankëx rëkuënkiani ꞌurira kuantankë ka Jesús, tëtubukin aín bëmananë me tikai, abë́ banakin aín Papa kakëxa: "ꞌËn Papa min ꞌati kuë́ënki kamina tëmërati ënënua ꞌë iëmiti ꞌain; ꞌaibi ka ꞌën kuë́ënkësa oi ꞌitima ꞌikë, min kuë́ënkësabi oi ka ꞌiti ꞌikën".

40 Anu aín unikama ꞌikë anu utëkënkibi, ka ꞌuxkë mërakëxa.

Mërakin ka Pedro kakëxa: —¿Achuira oibia bari kuaintamainun kaina ꞌëbëtabi ꞌuxkën tënëima?

41 ꞌUxkën tënëi kamina abë́ banakanti ꞌain, tankibia mikama nipatima kupí. Míkaman kamina upiokin ñu ꞌaisa tani, ꞌaibi ka min nami kushima ꞌikën.

42 Amiribishi rabë́ oi kuantankëx ka ësakin kai banakëxa: "Papa, tëmërai kana ënë ꞌinúti ꞌain, min kuëënkësabi oi ka ꞌiti ꞌikën".

43 Ëbianx amiribishi utëkënkibi ka aín unikama ꞌuxkë mërakëxa, aín bërua ꞌuxkënan tënankëx ꞌuxakëxa.

44 Anu ëbiani, rabë́ ꞌimainun achúshi oi kuanx abë́ banakin ka anun kakë a banabi kakëxa.

45 Usa ꞌain ka anua ꞌikë anubi kuantëkënkin, aín unikama kakëxa: —¿Abi kaina mikama ꞌuxanan tantikanin? Anuan Unin Bëchikë, uni ꞌuchañukama aín mëkënu ꞌinanti bari ka sënëanxa.

46 ¡Ka nirukan, kananuna kuanti ꞌain: an ꞌë ꞌaisama onun ꞌinanti ka ꞌurama ꞌikën!.

47 Jesús bana këbëbi ka, mëkën rabë́ ꞌimainun rabë́ anu ꞌikë achúshi Judas ax ubakëxa. Abë ka ꞌitsaíira uni anun ꞌakananti manë xëtokë ꞌiminun ikama bëi nukuakëxa. Usai kuani ka sacerdote, ꞌapu ꞌimainun kaniakëkë unikamaribi kuankëxa.

48 Judas an ꞌinanti an ka ësëkin kakëxa: "ꞌËn bëtsukukakë a kamina ꞌunakin biti ꞌai".

49 Ësakin kai, a ꞌurama ukin ka Jesús kakëxa:

—¡Kaina ñantabua kakin ka bëtsuku kakëxa!

50 Usakin ꞌakëxun ka Jesusan kakëxa: —ꞌËn ꞌunánkë, a ꞌaimi ukë a kamina ꞌati ꞌain.

Ësakin kakëbë anu ukin ꞌurama okin ka rairinën Jesús mëkënan më́ëkin ñatankankëxa.

51 Usakin ꞌakëbëtan ka axa Jesusbë ꞌikë unikama achushinën ꞌain manë xëtokë bikin an ꞌapu sumo sacerdote ñu mëxunkë achúshi aín pabi tëakëxa.

52 ꞌAia ka Jesusan kakëxa: —Min manëxëtokë kamina anumi nankënu nanti ꞌain. Kamabi axa manë xëtokë mëanankë a ka manë xëtokë ꞌakëx bamati ꞌikën.

53 ¿Kaina ꞌunanima ꞌën karana katima ꞌain ꞌën Papa, aín ángelkama suntaru mëkën rabë́ ꞌimainun rabë́ bëríbi xunun kati ꞌain?

54 Ësai ikë́bëma kara, ¿Uisax Kuënëo bana kikësoibi ꞌiti ꞌik?

55 Usakin ꞌakëxun ka Jesusan unikama ñukakëxa: —¿Añu kupí kaina míkaman anun ꞌakananti manë xëtokë bëanan ikama bëi ꞌë ñatani uan, uni ꞌakanankë ꞌakësa okin ꞌai uan? Kamabi nëtën nuxun Dios rabiti xubunuxun bana ꞌunamiabi kamina uinsaranbi ꞌë bikankëma ꞌain.

56 Ësaia ënë ñukama ꞌikë ënëx ka usaia ꞌiti ñuikin an bana ñuikë profetakaman kuënëosabi oí ꞌiakëxa. Usai ꞌikëbë ka aín unikama Jesús ashi ëbiani abakëxa.

57 Bitankëxun ka Jesús sumo sacerdote Caifás ꞌain xubunu ꞌuankëxa, anu ka an bana ꞌunánkë unikama ꞌimainun kaniakëkë akama timë́kë ꞌiakëxa.

58 Pedronën ka a ꞌuri kuankin Jesús nuibiankëxa sumo sacerdote xubu ëman anu nuiakëxa. Anu atsini ka Pedro an bëruankë kamabë tsóakëxa, anuxun uisakin kara ꞌaia iskatsikiax.

59 Sacerdonën ꞌapu kushikama ꞌimainun kaniakëkë unikaman ka ami këmëxun Jesús rëtëti bariakëxa.

60 ꞌAinbi ka ami ꞌitsa uni manankëxi ka këmëi kikë ꞌiakëxa. Anuax ka rabë́ uniribi uax këmëi kiakëxa.

61 Ësai kiakëxa: —Ënë unix ka ësai kiaxa: "ꞌËn kana anuxun Dios rabiti xubu rurupatankëxun rabë́ ꞌimainun achúshi nëtëinshi birutëkënti ꞌain".

62 Usaia kikëbë nirukin ka sumo sacerdotënën Jesús ñukakëxa: —¿Uisa ꞌaísh kaina kiman? ¿Uisai ki kara mi ñui ësai kikanin?

63 Kakëxi ka Jesús kiáma ꞌikën. Sumo sacerdotënën ka kakëxa: —Nukën Papa Dios ax bamatimaoi tsokë aín anën kamina min nu asérabi mix kamina Mesías Diosan Bëchikë ꞌai kixun nu kati ꞌain.

64 Jesusan ka kakëxa: —Mix kamina kian. ꞌËnribi kana mitsu kain, Unin Bëchikë ꞌaish Dios kushíira aín mëkeu tsóta naí kuin mëu aia kamina ꞌë isnuxun ꞌain.

65 Usai kikëbë nishí ka sumo sacerdote aín chupa tukai nishi kiakëxa: —¡Ënë unix ka ꞌatimati Dios ñui banaxa! ¿Uisa kupin karanuna bëtsi uni baritëkënti ꞌain? Mitsunbi kamina Dios ñui ꞌatimati banaia kuan.

66 ¿Uisakin kaina sinánin? Kia ka atun kakëxa:

—Ax ka ꞌuchaxa ka bamati ꞌikën.

67 Anuxun ka bëtushu kanan mëana, timanan rarinën bëtash kakëxa,

68 Ësakin kakin.

Mix Mesías ꞌixun kamina ¡uin kara mi mëaxa nu kati ꞌain!

69 Pedro ëman tsotan ukin ka, achúshi xanu sumo sacerdonën ñu më́mikë an ukin ësakin kakëxa: —Mixribi kamina Jesús Galileanu ꞌikë abë́ nikë ꞌain.

70 ꞌAibi ka Pedro uni ꞌitsa bërunuax, ꞌën kana a uni ꞌunanima kiakëxa.

71 Anuax xëputinu kuankë ka bëtsi xanunribi ꞌiskin rairi kakëxa: —Ënë uniribi ka Jesús Nazaretnu abë́ niaxa.

72 Amiribishi ka Pedronën këmëkin kakëxa: —¡Asérabi kana a uni ꞌunaniman!

73 Usakin kakë panákëma ꞌainshi ka anu ꞌikëkama an Pedro ꞌurama okin kakëxa: —Mixribi sapi kamina abë́ nikë uni a ꞌain, min bana ka atun banasaribi ꞌikën.

74 Anuax ka kia këxa kana mi kai: —¡ꞌËn kana a uni ꞌunanima! Usai kikëbëishi ka ꞌatapa banakëxa.

75 Anuxun ka Pedronën usakian Jesusan kakë a sinankëxa: "ꞌAtapa aín bënë banakëma pain ꞌain kamina rabë́ ꞌimainun achúshi oi këmënuxun ꞌain". Anuax ka Pedro masá sinani nishí chikinti ꞌiñankëxa.