1 Min bëtsi uni ñu ꞌinánkin kamina ax ka upí uni ꞌikë kixuan bëtsi unin isnun ꞌatima ꞌain, usakin ꞌaiabi ka nukën Papa Dios naínu ꞌikë, an upí ñu nu ꞌinántima ꞌikën.

2 Usa ꞌain kamina uni ñuñuma ꞌakinkin uni itsi ñuixuntima ꞌain, uinbi isnuma kamina bëtsi uni an istisa kixun uni upisa ꞌaibi ꞌatimankaman ꞌakësokin ꞌatima ꞌain. Anu timëti xubunuxun ꞌanan ëman kuankin unin rabinu kixun ꞌatima ꞌain. Usakin ꞌakin kana ñu upí bitsi kixun ka sinánkania.

3 Mitsun min bëtsi uni ñuñuma ꞌakinkin kamina mix abë́ nuibanairakë unibi ñuixuntima ꞌain.

4 Uinbi ꞌunánuma ꞌaia iskin ka min Papa Dios an ñu upí mi ꞌinánti ꞌikën.

5 Mitsux ꞌën Papabë banai, kamina uni upisa ꞌaibi ꞌatimakama ꞌikësoi ꞌitima ꞌain. Atux ka anua Judío timëkë xubukama anuax banati kuënia ꞌimainun ka anu uni timë́kë anuax nitsax banati kuënia usai ꞌikin ka ñu upí kana ꞌai kixun sinánia, ꞌën kana mi kain usai ꞌikin. Ka ñu upí kana bitsi kixun sinánin.

6 ꞌAibi kamina mitsux nukën Papa Diosbë banai mix anu ꞌuxtinu atsini xëpukuti, nukën Papa Diosbë uinbi isnuma banati ꞌain, usakin uinbi kuanuma ꞌaia ka min Papa Diosan isia iskin ka min biti ñu chaíira mi ꞌinánti ꞌikën.

7 Dios ñukati kamina ꞌitsaíira bana banatima ꞌain, bëtsi unikama ꞌikësoi usai ꞌiasa Diosan a kuatia kiax ka usai ꞌia.

8 Atux ꞌikësoi kamina ꞌitima ꞌain, min Papa Diosan ka mitsun ñukakëma ꞌainshi añu ñu karamina kuë́ëni kixun ꞌunania.

9 Mitsun kamina ësokin ñukati ꞌain: Nukën Papa Dios naínu ꞌikë, min anë ka ꞌuchañumaíra ꞌikën.

10 Min nëtë ka uti ꞌikë, naíkamëonu ꞌikë usaribiokin kamina ënë menuribi ꞌati ꞌain.

11 Nun pitiribi kamina kamabi nëtën nu ꞌinánti ꞌain.

12 Nun ꞌakë ꞌatima ñukamaribi kamina nu mënioxunti ꞌain, usaribi okin nunribi bëtsi uniribi mënionun.

13 Ñu ꞌatima ꞌanun kamina nu ꞌimitima ꞌain, ñunshin ꞌatimanëan ñu ꞌatima nu ꞌamixuma ꞌanun kamina nu bëruanti ꞌain.

14 Usaimi an mi ꞌatima okë unibë mënionania ka nukën Papa Dios naínu ꞌikë an upí isia.

15 Usa ꞌaibi ka bëtsibë mënionaniama nukën Papa Diosan mitsun ꞌakë ñuribi mëniotima ꞌikën.

16 Mitsux píima samáti kamina, min bëmana mërami masa nuituti, uni upisa ꞌaibi ꞌatimakama ꞌikësoi ꞌitima ꞌain, atux ka unin isti kuë́ënia, usai ꞌikin ka an biti ñu ka bitsia kixun sinánia.

17 Mitsux ñu píima samáti kamina min bu mënionan bëchukati ꞌain.

18 Ka ñu píima samátia kixun unin ꞌunanuma kamina usai ꞌiti ꞌain, Dios an kamabi ñu ꞌunanuma ꞌaia ꞌunánkë ꞌainshi ka ñu píima ka samátia kixun ꞌunankin min bitiñu mi ꞌinánti ꞌikën.

19 Ënë menu ꞌitsaíira ñuñu ꞌiti kamina kuëëntima ꞌain, ꞌënë menuxun ꞌitsaíira ñu bitsiabi ka bëtsi bëtsi nakuaxan këñumainun bëtsi bëtsi puibuax chëkimainun bisan këñuti ꞌikën, usakin ꞌamainun ka an mëkamakë unin mëkamati ꞌikën.

20 Usa ꞌain kamina naínu ira ñu nánti ꞌain, anuax ka uisa ñubi nëtëmainun bisan pitima ꞌikën, ꞌimainun ka anu mëkamakë uni atsintima ꞌikën.

21 Uisa ñuñu ꞌiti kara kuëënía anuishi ka unin sinánia, usa ꞌain ka aín nuitunën amishi sinánia.

22 Aín bëru tirí ꞌain ka kamabi ñu unin xabá isia, usa ꞌain kamina min bëru upí ꞌain, min nami xabánu ꞌiti ꞌikën.

23 ꞌAibi ka min bëru ꞌaisama ñu iskë ꞌain min nami bëánkibukënu ꞌikësa ꞌikën, usa ꞌain kara uitiu unishi bëankibukënu ꞌikësa ꞌiti ꞌik.

24 Uinbi ka rabë́ uni ñumëxuntima ꞌikën, rabë́ uni ñumëxunkë ꞌixun ka bëtsin kakëxun kuakin, bëtsi unin kakëxun kuaisama tankin kuatima ꞌikën, usaribiti kamina mitsux Dios mi sinanibi kurikiñu ꞌisatani ꞌiti ꞌain.

25 Usa ꞌaín kamina masá nuituti tsótima ꞌain. Añu karana píti ꞌaín, añu karana xëati ꞌain añu chupa karana pañuti ꞌai kiax kitima ꞌain. Nun tsóti ax ka pitishi pi tsótima ꞌikën, usai inun ka Diosan nu unioma ꞌikë, chupa pañuishi tsónun ka nu unioma ꞌikën.

26 Ka is axa suñunu nubánkë ꞌisákama atun ka ñu ꞌapaxun bimia bixun bukunima. Usa ꞌikëbi ka min Papa, naínu ꞌikë an kamabi ñu kuëënía ꞌinania. Usa ꞌain kamina ꞌisákama samaira mitsux ꞌain.

27 Uinu ꞌikë mitsun karamina kana ëora kaniti ꞌai kixun, ¿Achúshi nëtënbi ꞌitsaíira sinánti ꞌain?

28 Ro uakama kamina isti ꞌain, akamax ka aín chupa ꞌati risi xëoimabi upíira upí ꞌia.

29 Usa ꞌaibi kana ësokin mi kain, ꞌapu Salomón ꞌitsaíira ñuñu ꞌaibi ka usakinra aín chupa upíira a pañuama ꞌikën.

30 Diosan ka ro uakama upíira ꞌimia ꞌaibi ka bënëtishi chëkiti ꞌikën. Usakin ꞌakë ꞌixun kara akama ꞌakësamaira okin mitsu ꞌaxuntima ꞌik. ꞌAibi kamina ꞌën iskëx Dios mi, katamëti ꞌunankëma pain ꞌain.

31 Kamina masá nuitutima ꞌain: —¿Añu karana piti ꞌain? —¿Añu karana xëati ꞌain? —¿Añu chupa karana pañuti ꞌai kixun sinantima ꞌain?

32 An Diosan bana kuakëma unikamax ka usai masá nuitutia. Mitsun Papa Dios naínu ꞌikë an ka ꞌunania mitsun bisatankë ñu.

33 An kuëënkësabi okin kamina Dios naíkamëonu ikë aín ñu mëëti pain upiokin ꞌati ꞌain. ꞌAkëbëtan ka min kuëënkë ñu mi ꞌinánti ꞌikë upitax tsónun.

34 Usa aín kamina imë́ishi kara uisai nëtë ꞌiti ꞌikë kiax, masá nuitutima ꞌain, imë́ishi nëtë ꞌiti ñu ꞌa kamina ꞌunanima usa ꞌain ka kamabi nëtën ꞌatima ñu inutia.