1 Jesusan ka aín unikama mëkën rabë́ ꞌimainun rabë́ a kuënxun kakëxa. ꞌËn kushi kana mi ꞌinan, anumi ñunshin ꞌatima chikianan uni ꞌinsinkë pëxkuanan ꞌain paëkama nëtëminun.

2 Ënëx ka Jesusan Apostol mëkën rabë́ ꞌimainun rabë́ ꞌia aín anëkama ꞌikën: Simón ꞌikëbia Pedro kakë aín xukën Andrés; ꞌimainun Santiagonën xukën Juan ax ka Zebedeonën bëchikë ꞌikën.

3 Felipe, Bartolomé, Tomás, Mateo an Romanu xuti kuríki bikë, Santiago Alfeonën bëchikë, ꞌimainun Tadeo,

4 Simón Canánu ꞌikë, ꞌimainun Judas Iscariote an Jesús uni bimia a ꞌiakëxa.

5 Jesusan ka aín unikama mëkën rabë́ ꞌimainun rabë́ uni a ꞌësëtankëxun xuakëxa: —Xukin ka kakëxa, anua judioma uni ꞌikë ëma ꞌimainun Samarianu kamina kuantima ꞌain.

6 Anua ñuina ꞌibuñuma ꞌikësai Israel unibu ukukë a ëmanu kamina kuanti ꞌain.

7 Kuanxun kamina ñuixunti ꞌain, anun Diosan nëtë naíkamëonu uni ꞌiti ka ꞌurama ꞌikën.

8 ꞌInsinkë uni pëxkuanan kamina, bamakë uniribi baiskimiti ꞌain, ꞌanan kamina an nami chëkimikë ꞌinsiñu uni pëxkuanan ñunshin ꞌatimañu uni pëxkuti ꞌain. Mitsun kamina kupiomitima ꞌain, kupímashi kamina ënë kushi bian a kupí.

9 Kuríki, kuri, manë panshian a ꞌimainun anun tsitëkërëkiti kamina ubantima ꞌain.

10 Bain kuankin kamina pisha anu piti ꞌarukë, chupa, taxaka, anun kërëxti tsatibi ubantima ꞌain. Ax të́kë kamax ka pimikë ꞌiti ꞌikën.

11 Achúshi ñakanu ꞌikë ëmanu nukuti kamina uin kara mi bisa tankin nuibatia baritakëx anu ꞌiti ꞌain. Anun mix kuanti nëtëa ꞌitamainun.

12 Xubunu atsinkin kamina anu ꞌikë unikama a chúamashi ka ꞌikan kixun kati ꞌain.

13 Aín xubunu ꞌikë unian mi upiokin bikë kamina asabi ꞌiti ꞌain, mia bisamatankëbë ka an biti ñu ax minabi ꞌiti ꞌikën.

14 A ëmanuxuan mi bisama tanan min bana kuaisama tankëx kamina anuax chikiti ꞌain, chikikin kamina min taxakanu ꞌikë me kupúkë a takáti ꞌain.

15 ꞌËn kana asérabi mi kain anun tëmërai këñuti nëtë anun ka a ëmanu ꞌikë unikamax Sodoma ꞌimainun Gomorra ꞌikë unikama aín ꞌucha kupí ꞌasámaira okin, tëmëramikë ꞌiti ꞌikën.

16 Asérabi kana ꞌën mitsu ꞌarakakë ovejakamasa ꞌikë, pianankë ñuina nëbëtsínu xutin. Usa ꞌain kamina sinañuira ꞌaish runusa ꞌianan ñumakurusaribi ꞌaish ꞌunámara ꞌiti ꞌain.

17 Kamina bëruankati ꞌain, unikaman ka anua, judiokama timë́kë xubunuxun tëmëraminun mitsu ꞌapukama ꞌinanti ꞌikën.

18 Kamina bëruankati ꞌain, unin ka aín kushikama ꞌimainun ꞌapun kushikamanu, ꞌë kupin mitsu buanti ꞌikën, buankëxun kamina ꞌë ñuikin ꞌapukama kanan judioma unikama kati ꞌain.

19 Mitsua ꞌinankëxi kamina uisakin karana kati ꞌain kia bënë́tima ꞌain. Mixmi banakëma ꞌainshi ka Diosan Bëru Ñunshin upitan anu mi banati mi sinamiti ꞌikën.

20 Mitsux mi banakë ax ka mitsuxmi banakëma ꞌikën. Min Papa Bëru Ñunshin upí an ka mi usaimi banati sinámiti ꞌikën.

21 Aín xukënan ka bëtsi uni aín xukën ꞌamiti ꞌikën, aín papax ka aín bëchikëmi nishti ꞌikën, aín bëchikënëx ka aín papami nishti ꞌikën, nishkin ka ꞌamiti ꞌikën.

22 Kamabi menuax ka ꞌën uni kupí mitsumi nishti ꞌikën, usa ꞌaibi ka uix kara asérabi ꞌëmi katamëtia ax ka iëmikë ꞌiti ꞌikën.

23 Mitsua unin achúshi ëmanuxun ꞌatimokëx kamina bëtsi ëmanu kuanti ꞌain, usa ꞌain kana ꞌën mi asérabi kain, mitsux Israel ëmakamanu kuankëmapan ꞌainshi kana ꞌën Unin Bëchikë aish uti ꞌain.

24 An ꞌunánkë uni ax ka a unankë uni usa ꞌima, an ñu më́ëkë uni ax ka an tëëmikë uni asa ꞌima.

25 An ꞌunánkë uni ax ka an ꞌunámikë usaribi ꞌiti ꞌikën, an ñu më́ëkë ax ka an tëëmikë asaribi ꞌiti ꞌikën. Unin ka mix kamina ñunshin ꞌatimanën ꞌapu ꞌai kixun ꞌë kaia, usa ꞌain kara, ¿Mix ꞌën uni ꞌikë kara unin uisakin mitsu kati ꞌik?

26 Uimibi kamina rakuëëtima ꞌain, kamabi ñu umpúkë ka mërakë ꞌiti ꞌikën, unë́xun ꞌakë ñuribi ka ꞌunánkë ꞌiti ꞌikën.

27 Bakishnuxun kakë a kamina nëtë xabánuxun kati ꞌain; mia unë́xun ñuixunkëxun kamina kamabi unin kuanun ñuixunti ꞌain.

28 An uni ꞌakë unimi kamina rakuëtima ꞌaín, an ka aín namishi rëtëia, ꞌaibi ka aín bëru ñunshin rëtëima; ꞌaibi kamina anba nami ꞌimainun aín Bëru Nunshin a manë tsinu tëmëramiti ami kuni rakuë́ti ꞌain.

29 ¿ꞌIsá rabë́ kananuna kuríki achushiratsunën marutima ꞌain? Usa ꞌaibi ka uinu ꞌikë ꞌisákaxi nukën Papa Dios kuëënkëbëma bamatima ꞌikën.

30 Diosan ka uiti bu kara nun maxkanu ꞌikë a kamabi ꞌunanxa.

31 Usa ꞌain kamina rakuëtima ꞌain, mitsux kamina ꞌitsaíira ꞌisá kupí kësamaira ꞌain.

32 Uin kara ꞌë ñuikin uni kaia, a ñuikin kana ꞌënribi ꞌën Papa Dios naínu ꞌikë a kati ꞌain;

33 Usa ꞌaibi kana uin kara ꞌë ñuiki uni kaima a ñuikiribi ꞌën papa nainu ꞌikë a katima ꞌain.

34 Mikama kamina sinantima ꞌain, ꞌën kana ënë menu mi upiti tsonun uakë kixun sinantima ꞌain; usama ka mitsux mi ꞌakanani bukunun kana uakën.

35 Kana ua unia aín papami níshnun, aín bëchikë xanu aín titami nishti ꞌikën aín ñëxuta ka aín ñëmi nishti ꞌikën.

36 Usa ꞌain ka min aintsi kamabi mimi nishti ꞌikën.

37 Uin kara aín papa ꞌimainun aín tita, ꞌë kuënkësamaira okin ꞌaía an ka ënama ꞌikë, ꞌuin kara ꞌain bëchikë xanu tuá kuë́ëana nukë bënë kuëënía ax ka ꞌënama ꞌiti ꞌikën.

38 Uin kara curuz papixun ꞌë nuima ax ribi ka ꞌënama ꞌiti ꞌikën.*

39 Uix kara ꞌëxi kana ꞌië́ti ꞌai kixun sinánia ax ka ië́tima ꞌikën. ꞌImainun uix kara ꞌëmi sinani tëmërai ax ka ꞌiëmikë ꞌiti ꞌikën.

40 Uin kara mitsu bitsia an ka ꞌëribi biti ꞌikën, usa ꞌain ka uin kara ꞌë bitsia anribi ka nukën Papa Dios an ꞌë xua aribi bitsia.

41 Uin kara profeta aín xubunu bitsia an ka, profetanën bikësaribi okin ñu upí biti ꞌikën. Usaribi okin ka uin kara uni upí bitsia aribi ñu upí ꞌinanti ꞌikën.

42 Uin kara ꞌën uni ꞌumpax xanpami ñumarasu ꞌikëbi ꞌinania aribi ka Diosan upí ñu ꞌinanti ꞌikën.