1 Anun ñu mëtima nëtë ñantauonx pëkarakëbë ka, a nëtë María Magdalena ꞌimainun María itsi ax Jesús anu main ënxankë isi kuankëxa.
2 Kuankëbëshi ka me kushíira shaikiakëxa. Usai ꞌikëbëtan ka Diosan ángel achúshi naínua, ubukin ꞌurama okin anun xëpukë maxá rakanabiax a kamana tsobakëxa.
3 A ángel ka kaná mëritia iskësa ꞌianan aín chupa uxuira ꞌai chaba chaba kikë ꞌiakëxa.
4 Usai ꞌikëbë ka an bëruankë suntarukama ꞌitsaíira ratuti bërëi bamakësa ꞌiakëxa.
5 Angelnën ka xanukama kakëxa: —Kamina rakuëtima ꞌaín. ꞌËn kana ꞌunan, mikaman kamina Jesús, i curusokënu matas ëxankë a barin.
6 Ënuma ka, ka baiskiaxa, ax kikësabi oi. Uxún kamina anua nankë isiuti ꞌain.
7 Usa ꞌain kamina bënë́kiani kuantankëxun aín unikama ka bamaxi baiskiaxa kai kuanti ꞌain. Bërí ka ax Galileanu anpan rëkuënkiani anu timë́kënu kuania, anua ka isti ꞌikën. ꞌËn mi kakë ënë kamina sinánti ꞌaín.
8 Usa ꞌain ka xanukama bënë́ kiani anu mainkë, anuax kuani rakuëtibi ꞌitsaíira kuëënkiani abakianxun aín unikama kai kuankëxa.
9 Kuankëbëbi ami mërakin ka Jesusan xanukama kakëxa. Kakëxun ka Jesús a ꞌurama okin rantipuruni tsóbukin aín taë mëkin rabiakëxa.
10 Jesusan ka kakëxa: Kamina rakuëtima ꞌain, kuanxun kamina ꞌën xukëantu Galileanua ꞌë mërai kuanun kati ꞌain.
11 Xanukama kuankëbë ka an bëruakë suntarukama ëmanu kuanx bëbakin sacerdote ꞌapukama usaia ꞌikëkama ñuixuankëxa.
12 Ñuixunkëx ka a ꞌapukama kaniakëkë unikamabë ësënani kuankëxa, anuxun ka suntarukama kuríki chaíira ꞌinankëxa.
13 Kuantankëxun kamina: —Mikaman kai kuanti ꞌai, nukama ꞌuxan ka ꞌimë́naëx, uxún aín unikama Jesusan nami mëkamaxa kixun kati aín.
14 Ënë chanioia ꞌapun kuakëbë kananuna nukamax abë banati ꞌain. Usa ꞌain kamina mikama añuñubi ꞌinútima ꞌaín.
15 Suntarukaman ka kuríki bitankëxun atux kikësabi okin ꞌakëxa. Ënëx ka usokin ꞌakë kupiá bërí nëtënbi judiokama usai banai kikë ꞌikën.
16 Usa aín ka mëkën rabë́ ꞌimainun achúshi aín unikama ax Galilea, menu ꞌikë matá anua kuanun Jesusan kakë anu kuankëxa.
17 Anuxun ꞌiskin ka rabiakëxa, ꞌaibi ka rairitan ama ka kixun sinánkëxa.
18 Jesusan ka a ꞌurama kuankin akama kakëxa: —Diosan ka kamabi kushi naí ꞌimainun menu ꞌikë a ꞌë ꞌinanxa.
19 Usa ꞌain kamina kuankin kamabi menu ꞌikë unikama, ꞌën uni ꞌinun nashimikin ꞌën Papa anën ꞌanan aín Bëchikë ꞌimainun aín Bëru Ñunshin Upí anun nashimiti ꞌain,
20 Kamina ꞌunamikin kamabi ꞌën kikësabi okin, mi kakëkama anun kati ꞌain. ꞌËx kana kamabi nëtën míkamabë ꞌiti ꞌain, ënë nëtëkama këñutamainun.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)