1 Mëkën achúshi ꞌimainun achúshi nëtë ꞌinukëbëtan ka Jesusan Pedro, Santiago ꞌimainun Juan Santiagonën xukën, akamaishi ubani ꞌain bashi matá achúshi manámi uniñuma anu kuankëxa.

2 Anuax ka atun ismainubi bëtsiakëxa, bëtsi ka aín bëmanan barin pëkakësa inun ichuakëxa, usai ꞌianan ka aín chuparibi uxuira ꞌinun pëkikë ꞌiakëxa.

3 Usai ꞌikëbëtan ka Moisés ꞌimainun Elías chikirakëti, Jesusbë banaia isakëxa.

4 Usai ꞌia iskin ka Pedronën Jesús kakëxa: —Nukën ꞌIbu nuxnu ënu ꞌiti ka asabi bëri ꞌikën, mixmi kuënkëbëtan kana rabë́ ꞌimainun achúshi xuburatsu ꞌati ꞌain, minan achúshi ꞌimainun Moisesnan, Eliasnan ribi bëtsi ꞌati ꞌain.

5 Usakin Pedronën kakëbëtan ka kuin ꞌachúshitan anu ꞌibukin pëkakin atu mapuakëxa, usokëbëtan ka kuin mëukuax ësai kia banaia kuakëxa, ënëx ka ꞌën amiira sinánkë ꞌën bakë Bëchikë ꞌikën, usa ꞌain kamina aín bana kuati ꞌain.

6 Ësai kia kuati ka aín unikama ꞌaisamaira tani rakuëti memi bëumpukuti tsobuakëxa.

7 Usai itsaíira rakuëtia ka anu kuankin Jesusan aín uni ramëkin ka niruk kakëxa. Rakuëaxma ka ꞌikan.

8 Kakëx nirukin atun chairukin manamiokin iskëxbi ka uibi ꞌaima. ꞌImainun Jesús ishi anu ꞌiakëxa.

9 Usai ꞌikiani bashinuax ꞌibukiani kuankin ka Jesusan atu kakëxa: —Ënë kamina uibi ñuixuntima ꞌain. ꞌËn Unin Bëchikë ꞌaish bamatankëx baiskitamainun.

10 Kakëxun ka aín unikaman Jesús ñukakëxa: —¿Uisa kupí kara an kirika kuënëo ꞌunánkë unikaman Elías ax pain ka uti ꞌikë kin?

11 Kia ka Jesusan kakëxa: —Asérabi ka ax ꞌikën, Elías pain ka uti ꞌikën, an ka kamabi ñu uxún upiokin mënioti ꞌikën.

12 ꞌAibi kana ꞌën mitsu kain Elías ka ukëbi unin ꞌunantisama tankin atun kuëënkësa okin, uisakin kara ꞌakatsia usokin ꞌakëxa, usaribi okin ka Unin Bëchikë aish ubá ꞌikë ꞌatima okin ꞌë tëmëramiti ꞌikën.

13 Ësokin kakëxun ka aín unikaman ax ka Juan an uni nashimikë a ñui kia kixun ꞌunánkëxa.

14 Usai ꞌikiani kuanx ka anua ꞌaisamira uni timëkë anu Jesús bëbakëxa, bëbakëbë aín bëmanon rantinpuruni tsobukin achúshi unin kakëxa:

15 —ꞌËn ꞌIbu, ꞌën bëchikë karamina nuibakin ꞌakintima ꞌain, ka ꞌaisamaira tëmërai pakëti aín nami bërëi sakiki, tsinu ꞌiruanabi bakanuribi pakëtia.

16 Usai ꞌia kana min ꞌunamikë unikamanu an ꞌë pëxkuxunun kixun bëa, ꞌaibi ka atun pëxkukëma ꞌikën.

17 Jesusan ka kakëxa: —¡Uni sinañuma aish upíma kama ñu ꞌatima atishi sinankë! ¿Uiti oishi karana mitsubë ꞌiti ꞌain? ¿Uiti okinshi karana mitsun ñu ꞌatima aia tënëti ꞌain? Ënu ka a tuá ꞌë bëxun.

18 Kakëxun bëia ka Jesusan a tuanu ꞌikë ñunshin ꞌatima chikinun kushin kakëxa, chikikëbë ka a tuá asabi tikiakëxa.

19 Usakin ꞌaia ka aín unikaman, timë́xun Jesús ñukakëxa: —¿Uisa kupin karanuna a tuanu ꞌikë ñunshin ꞌatima nukaman chikinkëma ꞌain?

20 Kakëxun ka Jesusan kakëxa: mitsun kaina upiokin sinánima, mostaza bëru* ax ka chamaratsu ꞌikën, usaribi ꞌinun chamaratsubi upiokin sinánkë ꞌixun kaina ënë bashi ënuax ka ꞌuri takút kakëx ka amo takúti ꞌikën, usa ꞌain ka mitsun aisatankë ñux tëma ꞌitsianxa.

21 Ësa ñunshin ꞌatima chikinti kaina píima samakin, Dios ñukati ꞌain.

22 Abë Galilea menu nikin ka aín unikama Jesusan kakëxa: —Unin Bëchikë ꞌikë ka, ꞌë ꞌanun unikama ꞌinanti ꞌikën.

23 ꞌAibi kana ꞌakëx bamatankëx rabë́ nëtë ꞌimainun achúshi nëtë pëkarakëbë baiskiti ꞌain, kakëxun kuati ka aín unikama ꞌitsaíira masá nuituti nitëxëakëxa.

24 Jesús ꞌimainun aín unikama Cafarnaúmnu bëbakëbë ka anuxun rabiti xubunu inanti kuríki bikë unikama Pedro isi kuankëxa, kuanxun ka ñukakëxa: —¿An mi ꞌunamikë unin kara xubunu inanti kuríki ꞌinanin?

25 Ñukakëxun ka Pedronën kakëxa: —Ka ꞌinania, usakin kakë basikëma ꞌainshi xubunu atsinia ka Jesusan ësakin, Pedro ñukakëxa. ¿Simón min kaina uisakin sinani?. Ui unikama kara kupionun kixun ënë menu ꞌikë ꞌapukama kain, kara ꞌain ꞌaintsikama kain, ianan kara bëtsi menu ikë unikama kain?

26 Pedronën ka kakëxa: —Bëtsi menu ꞌikë unikaman ka ꞌinania, kakëxun ka Jesusan usa ka kixun kakëxa. Aín aintsikaman ka kupioima bëtsi unikaman ka kupioia kixun kakëxa.

27 ꞌAibi kamina nun kananuna kuríki ꞌinanima uni kitima kupí parunpapanu kuaxun mishkikin apain bikë tsatsa ꞌain ananua mërakin kuríki biti ꞌain, a kuríki kamina minan ꞌimainun ënaribi ꞌinanti ꞌain.