1 Usa okin kakin sënëobiani ka Jesús. Galileanuax kuanx Judea me. Amiaxa bari urukë Jordán baka ukëmanan kuankëxa.

2 Kuanx bëbaia ka ꞌitsaíira unin nuibiankëxa, nuikëxun ka uni ꞌinsinkëkama pëxküakëxa.

3 Usakin aia ka fariseo unibunën anu timëxun uisai kara isa kia ami mananuxun kuakatsi kixun ñukakëxa: —¿Unin aín xanu ënti kara asabi ꞌik?

4 Kixun ñukakëxun ka Jesusan kakëxa: —¿Mitsun kaina iskëma ꞌain nukën Papa Diosan bana kuënëo usai kikë a uniotabakin ka uni ꞌimainun xanu uniokëxa.

5 Usa ꞌain ka unin aín xanu bikin aín papakëñun aín tita ëni, ka aín xanubë biranani uni rabë́ aishbi achúshi ꞌia?

6 Unix ka aín xanubë aishbi achúshi ꞌiti ꞌikën, usa ꞌikë ka nukën Papa Diosan unio ꞌikë uni itsinribi bëtsi aín xanubë ënananu ꞌimitima ꞌikën.

7 Kakëxun ka fariseo unikaman Jesús kakëxa: Moisesnën kuëënëo bana ka ësai kia unin ka aín xanu ënkin achúshi kirika bëri kamina ꞌën xanuma ꞌai kixun atankëxun ꞌinankin ënti ꞌikën.

8 Kakëxun ka Jesusan kakëxa: —Mitsun masankin sinánkë kupí ka a bana Moisesnën kuënëomiakëxa, uni unio tabati ka nukën Papa Dios unin ka aín xanu ënti ꞌikë kiama ꞌikën.

9 ꞌËn kana ësokin mitsu kain, uin kara aín xanu uni ꞌitsibë ꞌikëmabi ënia ax ka aín xanu mi ꞌuchaia, aín xanuma ꞌaibi xanu ꞌitsibë ꞌikësaribiti.

10 Usa okin kakëxun ka aín unikama kakëxa: —Usa aín ka unin xanu biti ꞌaisama ꞌiti ꞌikën.

11 Kakëxun ka Jesusan aín unikama kakëxa: —Kamabi unira ka ënë bana kuatima ꞌikën, usa ꞌain ka uin kara nukën Papa Dios sinania a uninshi kuati ꞌikën.

12 Anu ka ꞌitsaíira ñu an uni xanu bisama okë ꞌikën: bëtsi ka xanu bitimaoi nachikitia, bëtsi ka unin xanu bitima okin bëtsioia, anu ka an xanu bisama tankin Diosan bana ꞌati kuë́ëni usabi nitsia. Uin kara ënë kuatia an ka kuati ꞌikën.

13 Rairi tuakama ka Jesusnu ubankëxa aín mëkënan ramëkian ñukaxunu, aín unikaman ka ënu bëxuma ka ubantan kixun kakëxa.

14 Kaiabi ka Jesusan kakëxa: —Kuantanu kaxuma ka tuakama ꞌënua unun ka ën, nukën Papa Diosan nëtë naíkamëonu ꞌiti ax ka ënë tuakamasaribi ꞌiti ꞌikën.

15 Ësakin katankëxun a tuakama ramëkin upiokin sinanxuntankëx anuax Jesús kuankëxa.

16 Usa ꞌain ka bëna uni achúshi an Jesús isi kuanxun kakëxa. An ñu ꞌunamikë upí uni: —¿An ñu ꞌunánkë nuibanankë, ¿Añu ñu karana nëtëtima oi tsonuxun ati ꞌain?

17 Jesusan ka kakëxa: —¿Uisa kupí kaina ꞌën ꞌisana upí ꞌai kixun ꞌë kain? Uixbi ka upíma ꞌikën, ꞌaibi ka achúshi upí anu ꞌikën, ax ka nukën Papa Dios ꞌikën, mix aín nëtënu abë́ ꞌisatankin kamina aín banakama kikësabi okin ꞌati ꞌain.

18 Kakëxun ka bëná uni an Jesús kakëxa: Uisa banakama karana ꞌati ꞌain, kakëxun ka Jesusan kakëxa: —Uni kamina ꞌatima ꞌain, uni itsin xanubë kamina ꞌitima ꞌain, ñu kamina mëkamatima ꞌain, bëtsi uni mi kamina ꞌatimati banatima ꞌain.

19 Min papa, min tita kakëxun kamina upiokin kuakin tanti ꞌain, mix bëruonkakë usaribi okin kamina bësti uniribi nuibakin bëruanti ꞌain.

20 —Kamabi ënë ñu kana bëná ixunbi akën —¿Añuribi karana akëmapan ꞌain?

21 Jesusan kakëxa: —Mix Dios kuënkësabioi ꞌisa tankin kamina kuanxun min ñukama maruxun kuríki bixun ñuñuma unikama ꞌakinti ꞌain, usakin ꞌai kamina nukën ꞌIbu Diosan nëtë naínu ñuñuira ꞌiti ꞌain, usa ꞌain kamina ꞌëbë kuani uti ꞌain.

22 Kakëxun kuati ka bëná uni aín ñu ꞌitsaíira ꞌain masá sinábiani kuankëxa.

23 Jesúsan aín unikama kakëxa: —ꞌËn kana asérabi mikama kain, tëiira ka ñuñu unix naíkamëonu ꞌiti ꞌikë.

24 Amiribishi kana mitsu kain, camellonëa* xumuxan kini atsinti ka tëmashi ꞌikën, usa ꞌaibi kara ñuñuira uni Diosan nëtë naíkamëonu ꞌitima ꞌik.

25 Ënë kuati ratuti sinankasmai ka: —kanankëxa. ¿Uix kara ꞌiëmikë ꞌiti ꞌik?

26 Jesusan ka iskin kakëxa: —Uninan ka të́iira ꞌikën, ꞌaibi ka Diosan ꞌati ñu të́ëma ꞌikën.

27 Ësa okin kakëxun ka Pedronën kakëxa: —Nun kananuna mibë ninuxun nun ñukama ëan, ¿Usa ꞌain karanuna añuñu nun biti ꞌain?

28 Jesusan ka kakëxa: —Kana asérabi mitsu kain nëtë ió ꞌitëkënkëbë ꞌën Unin Bëchikë ꞌaish ñu pënëirakë anu tsobukëbë kamina mikamaribi anu tsóti ꞌain, tsóbukin kamina mitsun mëkën rabë́ ꞌimainun rabë́ Israelnën bëchikënën rëbunki uisa karana oti ꞌai kixun ꞌisti ꞌain.

29 Ësakiribi kana mitsu kain, uinu ꞌikë unin kara ꞌën kuënkësabi okin ꞌanuxun aín xubu, aín xukën, aín chirabakë, aín papa, aín tita, aín xanu, aín bëchikë, aín naëkama; ëanxa a unix ka ënë nëtënu ꞌikë ñu ënkësamaíira oi ñuñuira ꞌiti ꞌikën, ꞌianan nukën ꞌIbu nëtënu bamatima oi abë́ tsóti ꞌikën.

30 ꞌAibi ka uikamax kara bërí cha ꞌaish kana upí sináñu ꞌai kixun sinani rabitia, ax cha ꞌitima ꞌikën, ꞌimainun ka uikama kara ꞌën kana ñumara ꞌai kixun sinánkë ꞌax naínu cha ꞌiti ꞌikën.