1 Dios ꞌimainun Cristo Jesús a pënëíira ꞌApuíira ai utëkënkin, bamakëma ꞌimainun bamakë, uisa kara oti ꞌikë, an ismainu kana mi kakin inani.

2 Kamina upí bana ñuiti ai, abi kamabi nëtën ꞌanun ꞌati nëtë ꞌanan anun ꞌatima nëtëribi ꞌati ꞌain, sinamikin kakin ësë́anan unamikin nuibati aín.

3 Anun unin bana upí kuaisama tanti nëtë ka uti ꞌikën, usa ꞌain ka an kuë́ëkënsa okinshi kuanun bana an unamiti ꞌitsaíira uni bariti ꞌikën.

4 Upí banami kasuanan ka bana ꞌaisama okin ñuia unin kuati ꞌikën.

5 ꞌAibi kamina min akë ñu bëruankakin ati ꞌain, tëmërakibi tënëkin kamina upí bana ñuikin min ñumëti upiokin ꞌati ꞌain.

6 ꞌËn anun ñu xaroti ꞌakësoi ꞌinamëti ka ꞌuramatia; anun ꞌën bamati ka ꞌurama ꞌikën.

7 Kana upiti mëanani ꞌakanan, kana abati anu nukuti anu sënëa, usai ꞌikin kana ami sinanki a ënkëma ꞌain.

8 Bërí ka ꞌë kainia mañuti nukën ꞌibu, ax upí ꞌai ꞌuchañuma ꞌixun a nëtë ꞌinanti, ꞌëshi ꞌinankima uikaman kara ax utëkënti pënëíira a kainia aribi ꞌinanti ꞌikën.

9 Bënëtishi kamina ꞌë isi uti ꞌai;

10 Demasnën ka ënë menu ꞌikë ñushi kuë́ënkin ꞌë rakabiani Tesalónica ëmanu kuanxa. Crescente, Galacia menu kuantamainu ka Tito Dalmacia menu kuankëxa.

11 Lucasnëshi ka ꞌëbë ꞌikë, usa ꞌain kamina Marcos an ꞌë ñumëti ꞌakinu bari bëtsinki ukin bëti ꞌain.

12 Tíquico kana Éfeso ëmanu xua.

13 Ukin kamina, anun mápukë ëbëtsinkë Tróade ëmanu ikë Carpo ꞌain xubu ëbëtsinkë a ꞌë bëxunti ꞌain, kirika kuënëokë, a ꞌimainun pergaminokama* ꞌë bëxunti ꞌain.

14 Alejandro an manë tëkë ami kamina bëruonkati ꞌain, an ka ꞌë aisama oxa; nukën ꞌIbun ka uisakin kara ꞌati usakibi a ꞌatima oti ꞌikën.

15 Mi ribi kamina ami bëruokati ꞌai, an ka nun ñuikë upí bana masoi atimati banaxa.

16 Ëx ꞌitabati ꞌapukamanu nukutia ka uinbi ꞌë akiama ꞌikë; kamaxubi ka ꞌë ënkankëxa. Kana kaini Diosan ka uisabi atu otima ꞌikë.

17 ꞌAibi ka nukën ꞌIbu ꞌë ꞌakianxa, usakin aín kushi ꞌë inankëxun kana kamabi judioma uni ai bana kuakëma a ñuixua. Usa ꞌain ka nukën ꞌIbun paru ꞌinuan kuëbinua ꞌë chikianxa.

18 ꞌË ka chikinti ꞌikën, ñu ꞌatimanua ië́mikin, ka ꞌain nëtë naíkamëo upíira anu ka ꞌë banti ꞌikën, ¡Pënëíira ꞌai nëtëtimaoi ꞌikë! Ashi.

19 Asabi kana kai Prisca, Aquila ꞌimainun Onesíforo aín aintsi kamari kain.

20 Erasto ka Corinto ëmanu tikiaxa, Trófimo kana ꞌinsinkë Mileto ëmanu ëbëtsia.

21 Bënëtishi kamina mitakëma ꞌainshi uti ꞌai, asabi ka kixun Eubulo, Pudente, Lino, Claudia ꞌimainun nukën xukëantukama kain.

22 Nukën ꞌIbu Jesucristo ka mibë ꞌiti ꞌikën. Diosan ka mikama ꞌitsaíira ꞌakinti ꞌikën.