1 Pablo apóstol Jesucristonan ꞌikëa Diosan an kuë́ënkësabi okin xua ꞌixun kana anun tsóti Cristo Jesús kiasabiokin ꞌain.

2 ꞌËn nuibakë bëchikë Timoteo ꞌikë kana mi kain. Nukën Papa Dios ꞌimainun nukën ꞌIbu Jesucristo, an ka nuibakin kuë́ëni asabitanu mi ꞌimiti ꞌikën.

3 Mi sinánkin kana Dios asabi ka kakin ënkima nëtë ꞌimainun ñantan ñukatin, ëx upiokin sinanki abi ñumëxunkë ixun kana, ën rarakama ꞌasokin aín.

4 Mi bëunan mëskukë a sinánkin kana ꞌitsaíira kuë́ënuxun mi istisa tani.

5 Kana sinani minmi upiokin sinánkë a, an ka min chichi Loida anpáin sinánkë ꞌiakëxa ꞌimainun kamina min tita Eunice, ꞌiasaribioki mixribi ꞌai kixun kana sinani.

6 Usa ꞌain kana mi kain, aín kushi minu ꞌikë tsi rëkirukësa, an ka bënabutima ꞌikë, ꞌën mëkën minu nankëbëtan Diosan mi ꞌinan.

7 Diosan ka bëru ñushin rakuë nu ꞌinama ꞌikën, ꞌinankima ka bëru ñushin kushi anun nuibanani upiokin ñu ꞌai tsonun nu ꞌinankëxa.

8 Usa ꞌain kamina katëkima nukën ꞌIbu Jesucristo ñuianan ꞌën sipunu ꞌikënribi katëkima ñuiti ꞌain, ꞌimainun kamina upí bana Diosan ꞌinankë aín kushi ënë ñui tëmërakibi tënëti ꞌain.

9 Diosan ka nu iëmianan kuëanan uni aín ꞌuchañuma ꞌinun ꞌimiakëxa, ax ka nun ꞌakëma ꞌiakëxa, ax ka nu nuibakë ꞌimainun bëramabi nëtëtimoi tsóti ꞌiakëxa Cristo Jesús kupí.

10 An ka nu nuibakin pënëíira nukën ꞌIbu Jesucristo an nu ië́mikin ismiaxa, usa ꞌixun ka bamati kanankin xabanu upí bana, anun bamatimoi tsóti ꞌimiakëxa.

11 Diosan ka ꞌë ꞌinankëxa ënë bana ñuinu usa ꞌixun ka ꞌë xuaxa apóstol ꞌianan ñu ꞌunamikë ꞌinun.

12 A kupin kana ënë ñu inuti tëmërai katëtima. ꞌËn kana asérabi uimi karana katamëti kixun ꞌunani; ꞌimainun kana unanin an ka ꞌëx ami katamëtia ꞌunania ax utëkënti nëtë ꞌitamainun.

13 Kamina nuiti ꞌain upí bana ënuami bikë a, ꞌimainun kamina upioki sinani nuibanani tsóti ꞌain Jesucristomi katamëti ꞌiti ꞌain.

14 Bëru Ñunshin Upí nunu ꞌikë an mi ꞌakinkëxun kamina, upiokin ꞌain bana Diosan mi ꞌinan a upiokin bëruanti ꞌain.

15 Min kaina ꞌuna, kamabi Asia nu ꞌikëkama ka ꞌë ëanxa, Figelo ꞌimainun Hermógenes.

16 Nukë́n ꞌIbu ka nuibati ꞌikën Onesíforo ꞌimainun aín aintsikama, an ka ꞌitsokin sipuokë ꞌikë uisaibi ꞌëmi katëkima ꞌë ꞌakianxa.

17 Usa ꞌain ka Roma ëmanu, nukukinshi tantikima barikin ꞌë mëraxa.

18 Nukën ꞌIbu ka mi mëramiti ꞌikën anunmi nuibananti, min kaina ꞌunan uitiokin kara ꞌë akianxa Éfesonuxun.