1 ꞌËn bëchikë, kamina ami kushiti ꞌain Diosan nuibakin mi Jesucristo kupí ꞌiëmikë ꞌai.

2 ꞌËn kiami ꞌitsaíira unin kuamainun kuakë a kamina, abë́mi nuibanankë uni an bëtsi ꞌunamisabi, okia aribi bëtsi uniribi ꞌunaminun unamiti ꞌain.

3 Miribi kamina akupi të́ëmërati ꞌain usai ꞌi kamina Jesucristonën suntaru upí ꞌiti ꞌain.

4 Uinu ꞌikë suntarunëbi ka unikaman ꞌakë ñu ꞌati sinanima, usa ꞌixun ka aín ꞌapu kuë́ëntanu ñu ꞌaia.

5 Usaribikin ka axa kuaikëkama, an usaia kuaiti nankë usai kushi kuaixuma aín ñu kananki bitima ꞌikën.

6 An naënu të́ëkin ñu ꞌapakë uni, an ka apain ꞌapakë ñu bimi tuaia bitsia.

7 Min kakë ënë kamina upiokin sinanti ꞌain, nukën ꞌIbun ka mikamabi ꞌunamiti ꞌikën.

8 Kamina sinanti ꞌain Jesucristo, bamatankë baiskia ax ka David, ꞌapu ꞌia, aín rëbunki ꞌiakëxa, a upí bana kana ꞌën ñui.

9 Upí bana kupí kana tëmërai usa ꞌain ka manë risin ꞌakanankë uni ꞌakësa okin ꞌë tëkërëkaxa, ꞌaibi ka Diosan upí bana manë risin tëkërëkakëma ꞌikën.

10 A kupí kana kamabi ñu tënëin, a Diosan kaiskë unikamaribia ami katamëti ië́ti pënëíira nëtëtima Jesucristobë ꞌinun.

11 Ënën ka asérabi ꞌikën: abë bamai kananuna abë ribi tsóti ꞌain.

12 Tëmëraibi abë ꞌi kushi kananuna ꞌain nëtënu abë ꞌiti ꞌain, ꞌimainun ka uin kara ꞌën kana ainama ꞌai kia, anribi ka nu ꞌënama ka kixun kati ꞌikën;

13 Nux upí ꞌaimabi ka, a nubë upí ia ax ka kana unanima kima.

14 Ënë sinánkin kamina bëtsi unikama ësëkin Diosan ismainun kati ꞌain, ñúkanankë bana an ka uibi ꞌakinima kixun kati ꞌain. An ka kuakëxun unikama ꞌaisama oia.

15 Kamabi kamina an ñu më́ëkë achúshi unisa ꞌixun min ꞌakë ñukama Diosan upí isnun ꞌati ꞌain, achúshi uni të́ëkënëa akupi katëmisama ꞌitanun aín ñu më́ëti upiokin ꞌakësa ꞌitanun aín bana asérabi ꞌunamiki ñuiti ꞌain.

16 Ë nuxun ñuikë bana ꞌatima ꞌimainun upima bana kamina kuatima ꞌain, uix kara usai banaia, ax ka kamabi nëtën ñu ꞌatimanu pakëti nanëtia.

17 An ꞌatima okin bana ꞌunamikë ax ka an nami chëkimikë ꞌinsinsa ꞌikë. Usaribi okin ka Himeneo ꞌimainun Filetonën ꞌaxa,

18 an ka anun baiskiti ka asérabi ꞌinuakëxa kixun ꞌunamia usakin kakin ka ami katamëama ꞌinun rairi sinakasmamikin manumiaxa.

19 Aibi ka Diosan achúshi ñu shaikitanuma nankëxa, anu ka aín bana kuënëokëxa: «Nukën ꞌIbun ka uikama kara ainan ꞌikë kixun ꞌunania.» ꞌImainun ka «Kamabi an ꞌain anë rabikë a nukën ꞌIbu ꞌunania akaman ka ñu ꞌaisama ꞌati ënti ꞌikën.»

20 Achúshi xubu cha anu ka itsaíira ñukama kuri ꞌimainun kuríki ꞌakë ashima bëtsi i ꞌanan mapú ꞌakë ꞌikë; bëtsikama ka anu ñu upí ꞌakë ꞌikë, bëtsiribi ka anun kamabi ñu më́ëkë ꞌikën.

21 Ñu upí ꞌakë ꞌianan, añu ñubi akëma ꞌimainun nukën ꞌIbu kuë́ënkësabi oi ꞌikë, upiti ñu ꞌaisama ꞌaima ꞌianan ka añu ñubi ꞌakima ñu upí ꞌati ꞌikën.

22 Ñu ꞌatima bënákama ꞌakë a kamina ëbianti ꞌain, a ꞌakima kamina ñu upí ꞌati bariti ꞌain, ami sinánti, nuibananti, upiti tsóti nuitu upí ꞌixun nukën ꞌIbu rabikë kamabë ꞌiti ꞌain.

23 Ñúkanankë a kamina kuatima ꞌain, kuatima ñushinki akë anua ka mëananti aia.

24 Nukën ꞌIbun uni ka mëanani nitima ꞌikën, usai ꞌima kamina kamabi unibë upí ꞌiti ꞌain. Ka ꞌiti ꞌikë bëtsi ꞌunamisabi ꞌimainun bënë́kima upiokin sinánkë,

25 min nuitu upí ꞌixun kaina bëtsi ꞌunamiki ësëkin kati ꞌain, usakin ꞌaia ka Diosan sinanakin këmëkima asérabi ñu upí ꞌanun ꞌamiti ꞌikën,

26 usai ꞌi ka akama ñunshin ꞌatimanën ñu ꞌaisama ꞌamikë a sinanati, a ëni uisokin kara akasia usakin akaskë anua chikíti ꞌikën.