1 ꞌItsa baritia ꞌinukëbëtan ka anu uni ꞌikëma me Judea me anuxun Juanën unikama bana ñuixuankëxa.

2 Bana ñuixunkin ka Juanën ësakin kakëxa: —Anun sinanati nukën ꞌIbu Dios, naíkamëonu ꞌikë ami katamëti ka uaxa.

3 Juan an ka nukën ꞌIbu Diosan sinamikëxun añuikin profeta Isaiasnën kuënëo bana ax ka ësai kia: —Anu uni ꞌikëma menuax ka achushi bana munuma kuënkëkini kiakëxa. Nukën ꞌIbu ka aia, usa ꞌain kamina ax anun uti bai rakanakin mënioti ꞌain.

4 Juanën chupa an ka camello xaká ꞌakë ꞌiakëxa, anuan ax tsitëkërëkikë an ka ñuina xaká ꞌa ꞌiakëxa, aín piti ka ꞌiakëxa kuruchinti ꞌimainun ninu ꞌikë buna rëpa ꞌiakëxa.

5 Jerusalénu ꞌikë unikama ꞌimainun Judea mekamanu ꞌikë unikamarabi ꞌimainun Jordán kakë baka ꞌurama ꞌikë unikamaribi ka rikiankëxa bana ñuia kuati.

6 Usai kia kuatia atun ꞌuchakama chikinatia ka Juanën Jordán kakë bakanuxun nashimiakëxa.

7 ꞌAibi ka Juanën ꞌaisamaíira fariseo unikama ꞌimainun saduceo unikama, an nashiminu kuania isakëxa iskin ka kakëxa: —¡Runun rëbunki! ¿Uin kara mitsu anun nukën Papa Diosan mitsu tëmëramiti nëtë ka aia kixun mitsu kax?

8 Mix upiti tsókë ax ka asérabi nukën ꞌIbumi katamëkë ꞌiti ꞌikën,

9 Mikaman kamina bëtsi katima ꞌain: "¡Nukamax kananuna Abrahamnën rëbunki ꞌain!". Asérabi kana mi kain, ꞌaisatankin ka Diosan ënë maxakama Abrahamnën bëchikë ꞌimiti ꞌikën.

10 ꞌImainun ka ñamiribi anun ꞌi aín tapun këñubi tëati uramashi ꞌikën. Kamabi ꞌi an upiokin tuakëma kamaribi ka tëatankëxun tsinu puti ꞌikën.

11 ꞌËn kana asérabi ꞌumpaxan mitsu nashimi sinánatimi nukën Papa Diosnan ꞌiti kupí; ꞌainbi ka ꞌësamaira ꞌë kaxu ukin aín Bëru Ñunshin Upí ꞌimainun tsi rëkirukë anun mi nashimiti ꞌikën. An ka ꞌësamaira ꞌaish kushíira ꞌikën, usa ꞌain kana aín taxakabi uanxuntima ꞌain.

12 An ka a ñu ꞌapakë unisa ꞌai aia anun trigo takakin aín ënxë upibu biti tuibëtsini aia, usa ꞌixun ka takakin aín ënxë upibu bitankëxun bukunia. An ka usa okin ꞌakin aín xaká bukunatankëxun manëtsi uinsarabi bënatima oi rëkirukë anu putia.

13 Usa ꞌain ka Galilea me anuax kuanx Jesús Jordan, kakë baka anu Juanën nashiminu kuankëxa.

14 Kuanxa bëbaiabi ka Juanën nashimisama tankin Jesús kakëxa: —¿Miinra ꞌë nashimisa ꞌaishbi kaina ꞌën mi nashiminun kiax aín?

15 Kakëxunbi ka Jesusan kakëxa: —ꞌËmi nashimiti ka asabi ꞌikë. Uisai kara nukën Papa Dios kia usai kanuna ꞌiti ꞌain. Kakëxun ka Juanën kana mi ꞌati ꞌain kixun Jesús nashimiakëxa.

16 Usakin Juanën nashimikë kuankin ka Jesusan naikamëo panarabëtia isakëxa. Iskibi ka Diosan Bëru Ñunshin Upí ñumakurutina aía isakëxa.

17 Usai ikëbëtan ka naínuaxa ësai ki banaia kuakëxa: —ꞌËnëx ka ꞌën amiira sinánkë bakë Bëchikë ꞌikën, ami sinani kana upíiratani kuë́ënin.