1 Usai ꞌikëbëtan ka aín unikaman a urama ukin Jesús ñukákin kakëxa: —¿Uix kara bëtsibëtan sënëmaira naíkamëonu ꞌiti ꞌik?

2 Jesusan ka achúshi tuá kuënxun atu nëbëtsi nitsiankëxa.

3 —Asérabi kana mitsu kain, uix kara mëniorakati sinanati ënë tuakamasa ꞌima ax uinsarabi naíkamëonu ꞌitima ꞌikën.

4 Usa ꞌain ka uix kara ënë tuasaribi ꞌi chukumara ꞌia ax ka naíkamëonu chaíira ꞌiti ꞌikën.

5 Uin kara ꞌën anën achúshi tuá ësokin, bitsia an ka ꞌëmi sinánkin ꞌëribi bitsia.

6 Uin kara ënë tuakama ꞌëmi sinaniabi ꞌuchamia, a uni ka anun ñu rënti maxá chaíira* aín tëxanu tëkërë katankëxun parúmpapa nëbëtsi nanëtanun nikë ꞌiti ꞌikën.

7 ¡Usaribiokin ka, ꞌënë nëtënuxun unin bëtsi bëtsi ñu ꞌakin bëtsi ꞌuchamia, usai ka ꞌënë nëtënuax ꞌiti ꞌikën, ꞌaibi ka an bëtsi ꞌuchamikë unikama ax ꞌaisamaira okin, aín ucha kupin tëmëramikë ꞌiti ꞌikën!

8 Usa ꞌain kamina min mëkën min taë an mi ꞌuchamikëxun tëaxun ꞌura niti ꞌain, usokin ꞌakëma ꞌaishmi min taë rabë́ min mëkën rabë́ kupin manë tsinu tëmërati ka ꞌaisama ꞌikën, usa ꞌain ka min taë, min mëkën tëaxun niti ka asabi ꞌikën.

9 Min bërun isi ꞌuchakin kamina ëchixun ꞌura niti ꞌain, min bëru achushiñu ꞌai bamatima oi tsóti ka asabi ꞌikën, min bëru rabëñu ꞌaishmi manë tsinu tëmërati ka ꞌaisama ꞌikën.

10 Ënë chamarakama achúshi kamina ñumara ka kixun ꞌaisama otima ꞌain, ꞌën kana mitsu kain, aín angelkaman ka naíkamëonuxun ꞌën Papa bëmana isia.

11 ꞌËx unin bëchikë ꞌaish kana uakën, unikama nëtëkësa ꞌaishbi ꞌëmi sinánia ꞌiëminux.

12 ¿Uisakin kaina min sinanin? Achúshi unin ka 100 ovejañu ꞌiti ꞌikën, ¿Usa ꞌain kara achúshi amanu kuani nëtëkëbëtan rairi 99 ninu ëbianxun axa nëtëkë oveja a baritima ꞌik?

13 ꞌËn kana mitsu kain axa nëtëkë a barikin mërax ka, 99 anu ꞌaia ꞌikësamairai kuëënti ꞌikën.

14 Usaribiti ka mitsun Papa naínu ꞌikë ax aín bëchikë achushirabi ꞌa ëni nëtëti kuë́ënima.

15 Min xukënan ñu ꞌaisama ꞌakëbë kamina abë́ banati ꞌain, ꞌañu ai kara mimi ꞌuchaxa a ꞌunamiti kupin, min kakëxun kuakin uisai karana ucha kixun ꞌunani ka asabi mibë ꞌiti ꞌikën.

16 Min xukënan kuaisama tankëbëtan kamina rabëkëñun achúshi uni bariti ꞌain, ꞌan ka añu ai kara ꞌuchaxa kixun mi kati ꞌikën.

17 Kakëxunbia ꞌatun bana kuaisama tankëbëtan kamina, Dios mi katamëkë unikama ñuixunun anu ꞌubanti ꞌain, usokin ꞌatun kakëxuribi kuaisama tania kamina ax Dios mi sinankëma unisa ianan, an kuríki Roma ꞌinanti bikë unisa ꞌitanu ënti ꞌain.

18 Asérabi kana mi kain, ënë me nuxun tëkërëkakë aribi ka nainu tëkërëkakë ꞌiti ꞌikën, ꞌimainun mitsumi ënë me nuxun tubukë aribi ka nainu tubukë ꞌiti ꞌikën.

19 ꞌËsakin kana mitsu kain min rabëxun uisa ñu karamina kuë́ëni kixun, ënë menuxun, sinantankëxun ñukátia, ka nukën Papa Dios naínu ꞌikë an mitsu inanti ꞌikën.

20 Uinu kara ꞌën unikama rabë́ ꞌimainun achúshi ꞌën anë sinani timë́tia ꞌa nëbëtsi kana ꞌëx ꞌiti ꞌain.

21 Usa ꞌain ka Pedronën anu kuanxun Jesús ñukakëxa: —Ën ꞌIbu, ¿Uiti okin karana ꞌëmi ꞌuchaia ën xukën mëniokin manumiti aín?, ¿Karana mëkën achúshi ꞌimainun rabë́ oi abë́ mënionanti ꞌain?.

22 Jesusan ka kakëxa: —Mëkën achúshi ꞌimainun rabë́ okimi manuminun kana mi kaima, uiti oishi* kara mimi ꞌuchati ꞌikë a kamabi kamina manumiti ꞌain.

23 Nukën Papa Diosan nëtë naíkamëonu ꞌiti ka ësa ꞌikën, achúshi ꞌapun ka an ñu mëëxunkë uni rabëtan kara uiti kuríki ribinia kixun istisa tanxa.

24 Istisa tankëbëtan ka an chaíira millones kuríki ribinkë uni achúshi apain bëaxa.

25 Bëkëx uxunbi ka chaíira ribinkë ꞌaish kurikiñuma ꞌixun, kupiokëma ꞌikën, kupiokëxuma ka ꞌapun aín uni kaxa, akëñun kamina an ñu mëxunkë, ꞌain xanu aín ñukama ꞌimainun ꞌain bëchikë kamabi maruxun kuríki bixun ꞌë ꞌinanti ꞌikën.

26 Usakian kakëx a tanain rantin puruni tsobukin an ribinkë uni an abi an ñu mëmikë uni kakëxa: "ꞌËn mi munu kamabi kupionun kainti ꞌain".

27 Ësakin kakëxun nuibakin ka ꞌapun asabi ka ꞌëmi kupiokëxmabi ka asabi ꞌiti ꞌikën; usa ꞌain kamina kuanti ai kixun kakëxa.

28 Kakëx kuankibi ka abëtan an ꞌapu ñumëxunkë uni aia mërakëxa, mërakin ka ënën ka ꞌë kuríki manë akë ribinia kixun ꞌain tëxatan bikin tëtsëkakin minmi ꞌë ribinkë kamina ꞌë kupioti ai kixun kakëxa.

29 Kakëxun ka abëtan ñumëkë uni an a bëtanai ranti puruni tsobukin kakëxa: —ꞌËn mi munu kupionun kamina kainti ꞌain.

30 Kakëxubi ka kuaisama tankin ꞌëmi kupionun kana mi kaima, kixun a kurikikama kupioia sipunu inun sipuakëxa.

31 Usokia ꞌaia isi ka ꞌitsaíira masá nuitukiani abëtan ñumëke rairikamax a ñumëxunkë ꞌapu ñuixuni kuanxa.

32 Kuanxun ñuixunkëxun ka an ñu më́mikë uni ꞌapun kamiakëxa, kamikëx ukë ka mix kamina ꞌaisama uni ꞌai kixun kaxa, ꞌënribi kana ꞌëmi ribinkë ꞌë kupioxuma anun mi kan.

33 Minribi karamina abëtan mi ñumëkë uni nuibatima ꞌian, ꞌën mi akësaribiokin nuibati ka iaxa.

34 Ësakin kai ꞌitsaíira aminishkin ka ꞌapun an sipu bëruankë uni kaxa, ꞌënë uni kamina më́ëkin an ꞌë ribinkë kupioia anuax tëmëranun sipuati ꞌain.

35 Usaribiokin ka ꞌën Papa Dios naínu ꞌikë an achúshi uni mitsumi ꞌuchakë kamabë upiti mënio naniama ati ꞌikën.