1 Fariseokama ꞌimainun Saduceokama ka anu kuaxun Jesús ami manánuxun, tankatsi kixun asérabi kara Diosnua ukë ꞌikë kixun isa unin ꞌakëma bëtsi ñu ꞌanun kixun kakëxa.

2 ꞌAibi ka Jesusan kakëxa: —Mikama kaina bari kuabukëbëtan naí isi kikanin: "Nëtë ka xonsakë ꞌikën, imëishi ka nëtë upí pë́karati ꞌikën".

3 Pë́karakë ꞌain kamina: "Kikani bërí ka nëtë ꞌaisama ꞌiti ꞌikën". Naí ka xonsa ꞌimainun kurunëtëaxa kikanin. Uisa ꞌixun kaina usa ñu ka naínua ꞌiti ꞌikë, kixun upiokin ꞌunankibi míkaman. ¿Uisa kupí kaina bëtsi unin ꞌakëma ñu ꞌanun ꞌë kain, ënë nëtënuxun ꞌën ꞌakë ñukama a kaina sinanima?

4 Ënë uni ꞌaisamakama, ka a iskëma bëtsi ñukama ꞌanun ꞌë kaia, ꞌaibi kana Jonás iasai ꞌitima aín,* usaira kana ꞌitima ꞌai, kikiani ka Jesús kuankëxa.

5 Baka ꞌukëmanan kuankin ka Jesús ꞌimainun aín unikaman a piti pan manubiankëxa.

6 Usa ꞌain ka Jesusan kakëxa: Fariseo ꞌimainun Saduceo, unikaman ka anun pan chamiti ñusa aín bana ꞌikën, usaribi ꞌitima kupin kamina bëruankati ꞌain.

7 Kikëbë ka aín unikama kánani kiakëxa: —Nun pan bëkëma kupin ka kia: kiax kanankëxa.

8 Jesusan ka usai kanania ꞌunankin kakëxa: —¿Uisa kupin kaina pan ñuma kana ꞌai kikanin? ¡ꞌËmi kamina chukumashi mikama sinani!.

9 ¿Mëkën achúshi pan ꞌën pimikëxuan cinco mil unikama pikin tëxëokë ami kakimi bikë a kaina, uiti kaki buchuakin kaina bia kixun sinániman?

10 ¿Mëkën achúshi ꞌimainun rabë́ pan ꞌën cuatro mil unikama pimikëxa tëxëkë ꞌikëmi. Bikë abi kaina, uiti kaki kaina bia kixun sinániman?

11 ¿Uisa kupí kaina mikama pan ira ñui kana kikëma ꞌai kixun ꞌunanima? Kamina bëruankati ꞌain fariseo ꞌimanun saduceokama banax ka anun pan chamiti ñusa ꞌikën.

12 Ësakin Jesusan kakëxun ka aín unikaman anun pan, chamiti ñu ñuikësa okin kakinbi ka fariseo unikamabëtan saduceo unikaman ñuixunkë a banax ka këmë ꞌikë kixun, sinánkin a bana kuaxuma ꞌanun ka nukama kaxa kixun ꞌunankëxa.

13 Usakin katankëx Cesárea Filipo menu bëbaxun ka, Jesusan aín unikama ñukakëxa: ¿Uisai kara unikama Unin Bëchikë ñui kin?

14 Ñukákëxun ka atun kakëxa: Bëtsin ka kia min ismina Juan an uni nashimikë ꞌain; rairinëx ka min ismina Elías ꞌain, ꞌimainun patsanën ribi ka kia Jeremías ꞌima isamina bëtsi profeta ꞌai kia.

15 ¿Mitsux karamina ui karana ꞌëx ꞌai kin? Kixun ñukakëxa.

16 Simón Pedronën ka kakëxa: Mix kaina Mesías a ꞌain, Diosan bëchikë bamatima oi tsókë a ꞌain.

17 Usa ꞌain ka Jesusan kakëxa: Chuámarua ka, Simón Jonasnën bëchikë min kaina unin kakëxun ënë ꞌunankëma ꞌain, ꞌën Papa naínu ꞌikë an ka mi ꞌunamiaxa uinu ꞌikë uninbi ka mi unámikëma ꞌikën.

18 ꞌËn kana mi kain, min kaina Pedro ꞌain, usa ꞌai kana ënë maxá kamana kamina Iglesia ꞌati ꞌain; bamati anbia ꞌaisama otima ꞌinun.

19 Mi kana anunmi naíkamëonu xëokati ꞌinanti ꞌain; min ënë menu tëkërëkakë ñu an ka naíkamëonu tëkërëkakë ꞌiti ꞌikën, min ënë menu tubukë ñu ka naikamëonuribi tubukë ꞌiti ꞌikën.

20 Anu ka Jesusan aín unikama kakëxa, uibi kamina ꞌëx kana Mesías ꞌai kixun katima ꞌain.

21 Ësakin katankëxun ka Jesusan aín unikama Jerusalénu kuanti ka kixun kakëxa: —Anuxun ka uni apan Sacerdote ꞌimainun an ñu ꞌunánkë unikamanribi ꞌaisamaiira okin tëmëramitankëxun, ꞌë rëtëti ꞌikën, ꞌaibi kana rabë́ ꞌimainun achui nëtë ꞌikëbë baiskiti ꞌain.

22 Usai kia ka Pedronën ꞌuri ubaxun Jesús kakëxa: —¡Diosan ka mix usai ꞌiti kuëënima usai kaina ꞌitima ꞌain.

23 Usakin kakë kuainakëki ka Jesusan Pedro kakëxa: —¡ꞌË ꞌuramanua ka kuantan ñunshin atima! Min kaina ꞌë ñu ꞌaisama ꞌamitisa tani, min kaina Diosan iskësoki isima, unin iskësokin kaina isin.

24 Katankëxun ka Jesusan aín unikama kakëxa: —Uix kara ꞌën uni ꞌisatania an ka kamabi manukin curuz papixun ꞌë nuiti ꞌikën.

25 Uix kara ꞌën kana ꞌëxi iëti ꞌai kixun sinania an ka iëtima ꞌikën; ꞌaibi ka uix kara ꞌë kupí bamaia ax ka iëti ꞌikën.

26 ¿Añu ñubi ka unin ënë nëtënua kanan kibi ubantima ꞌikë, ꞌaibi ka uni aín rara itsi nëtëtimabi upí ꞌitima ꞌikën? ¿Uiti kara unin aín tsóti kupioti ꞌik?.

27 ꞌËx Unin Bëchikë ꞌaish kana pënëíira kuatsini ën papan kushin ángelkamabë, utankëxun uisokin kara ñu ꞌakëxa, a istankëxun ꞌinanti aín.

28 Kana mi asérabi kain, ënu bërí ꞌikëkama aín patsankama bamakëma pain ꞌixun ka isti ꞌikën, Unin Bëchikë ꞌaish naíkamëonua kushíira ꞌai aia ꞌë isti ꞌikën.