1 Usa ꞌain ka nashimikë ꞌikë, aín Bëru Ñunshin Upí an Jesús anu uni ꞌikëma menu ubankëxa, anuxun ka ñunshin ꞌatimanën ꞌapun ñu ꞌatima ꞌamiti sinankëxa.

2 Anu ꞌixun ka Jesusan añu ñubi cuarenta ꞌimë́ ꞌimainun cuarenta nëtën. Ñu píima panankëxa.

3 Anu ukin ka ñunshin ꞌatimanën ꞌapun ñu ꞌatima ꞌamikatsi kixun ësakin kakëxa: —Asérabi Diosan Bëchikë ꞌixun kamina ënë maxákama piti ꞌimiti aín.

4 Kakëxunbi ka Jesusan kakëxa: —Ësai ka kuënëo bana kia: "Piti píishi ka uni tsótima ꞌikën. Uisai kara Dios kia a bana ꞌairibi ka uni tsóti ꞌikën".

5 Usa ꞌain ka ñunshin ꞌatimanën Jesús Jerusalén ëma, anuxun ka xubu aín maskua sënënkënu ubaruakëxa.

6 ꞌImainun ka kakëxa: —Asérabi Diosan Bëchikë ꞌai kamina ënua shimú pakëti aín. Kuënëo bana ka ësai kia: "Diosan ka aín angelkama mi bëruamiti ꞌikën, maxánu tachakama inun ka aín mëkënan mi binun xuti ꞌikën".

7 Jesusan ka kakëxa: —Ësai ka kuënëo bana kia: "Nukën ꞌIbu Dios kamina tantima ꞌain".

8 Usotankëxun ka ñunshin ꞌatimanën amiribishi aín bashi chaírukë manan Jesús buánkëxa, En kana kamabi kushi ꞌimainun kamabi ënë nëtë nu ꞌikë chá ñukama inanti ai

9 Ka kakëxa: —Ën kana mi ꞌinanti aín kamabi ënë, min rantinpurunki ꞌë rabia.

10 Jesusan ka kakëxa: —Ñunshin ꞌatima, ënuax ka kuantan. Kuënëo bana ka ësai kia: "Min ꞌIbu Dios kamina rabiti ꞌain. Rabikin kamina ax kuëënkësabi okin ñu ꞌaxunti ꞌain".

11 Usokian kakëx ka ñunshin ꞌatimanën ꞌapu Jesús ëbiani kuankëxa. Kuankëbëtan ka nukën Papa Diosan ángelkaman ukin Jesús ꞌakiankëxa.

12 Usa ꞌain ka Juan, an uni nashimikë, a sipuokë kuabiani Jesús Galilea nëtënu kuantëkëankëxa.

13 Anua kuanx Nazaret ëmanu bëbatankëx ka parúmpapa rapasu ꞌikë ëma, Cafarnaúm* anu tsóti kuankëxa. A me an ka Zabulón ꞌimainun Neftalí kakë uni aín rara anu tsoa me ꞌiakëxa.

14 Ësai ka ꞌiti ꞌikë kixuan profeta Isaiasnën kuënëosabioi ka iakexa:

15 —Zabulón ꞌimainun Neftalí menu ꞌikë Jordán baka ꞌukëmanan anun parunpapanu kuanti bai Galilea menu bukukë Judioma unikama anu ꞌikë.

16 A unikama ka bëankibukënu ꞌixubi achúshi xaba chaíira a, bamakësa ꞌixunbi pë́kaia ꞌisakëxa.

17 Bana ñuixunkin ka Jesusan ësakin kakëxa: —Sinanati nukën ꞌIbu Dios naíkamëonu ꞌikë ami katamëti ka ubaxa.

18 Parumpapa Galilea kuëtani kuankinbi ka Jesusan rabë́ uni mërakëxa. A uni rabëta ka achúshi Simón ꞌikëbi Pedroribi kakë, a ꞌimainun aín xukë́n Andrés kakë ꞌiakëxa. A rabë́ta an tsatsa bikë uni ꞌixuan tsatsa rikania ka Jesusan mërakëxa.

19 Mërakin ka Jesusan kakëxa: Tsatsa bikësaribi okin mi, uni binu mi ꞌunaminun ka ꞌëbë kuani ut.

20 Usakian Jesusan kakëxuinshi aín rika ëbiani ka abë́ kuankëxa.

21 A uni rabë́ bibiani kuankinbi ka Jesusan bëtsi uni rabë́ribi, Zebedeonën bëchikë, Santiago ꞌimainun aín xukën Juan, an aín papa Zebedeobëtan nuntinuxun rika mëníoia mërakëxa mërakin ka.

22 Abë́ kuanun kakëxëshi ka nuntinu aín papa ëbiani Jesusbë kuankëxa.

23 Jesusan ka Galileanu ꞌikë ëma chukuma kamanu kuankin. Anua judiokama timëkë xubukamanu kuani, atsinxun unikama Diosan nëtënu ꞌiti upí bana ñuixuana bëtsi bëtsi ꞌinsinñu unikama pëxkuakëxa.

24 Usokian Jesusan aia iskin chanioia kuakin ka Siria nëtënu ꞌikë unikaman axa ñukëkama Jesusan pëxkunun kixun anu buánkankëxa. Bëtsi bëtsi ñukëkama ꞌimainun ñunshin ꞌatimanën ꞌibuakë unikama ꞌimainun uni ñukë nirukuainkinbi tankëma, ꞌimainun aín nami nimëti sakikikë akama anu uania ka Jesusan pëxkuakëxa.

25 Usokin bana ñuixuanan unikama pëxkubiania kuania ka ꞌaisamaira unin Jesús nuibiankëxa. Galilea menu ꞌikë unikama ꞌimainun Decapolis kakë menu ꞌikë unikama ꞌimainun Jerusalénu ꞌikë unikama ꞌimainun Judea mekamanu ꞌikë unikama ꞌimainun Jordán baka ꞌukëmanánuaribi ukë unikaman ka abë́ kuankin Jesús nuibiankëxa.