1 ꞌItsaíira uni isi ka Jesús matánu kuanx tsobuakëxa. Tsobukëbë ka aín unikama a ꞌurama uakëxa.

2 Ukë ka ꞌësokin kakin ꞌunamiakëxa:

3 —Chuamarua tani kuë́ëni ka aín bëru ñunshin nuibakati Dios mi katamëkë an ꞌiti ꞌikën, atunan ka naíkamëonu ꞌiti ꞌikën.

4 Chuamarua tani kuëënun ꞌimikë ka axa tëmërakë unikama an ꞌiti ꞌikën.

5 Chuamarua tani kuë́ëni ka mënisinan ñu unikama upí ꞌimikë ꞌiti ꞌikën, atun ka naínu ꞌikë me upíira ꞌa biti ꞌikën.

6 Chuamarua tani kuë́ëni ka bana kuaisa tania ꞌakëñuma ꞌianan shimakësa ax puchati kuëënun ꞌimikë ꞌiti ꞌikën.

7 Chuamarua tani kuë́ëni ka nuibanankë uni an ꞌiti ꞌikën, a unikama ka Diosan nuibairakë ꞌiti ꞌikën.

8 Chuamarua tani kuë́ëni ka aín nuítu upí uni an ꞌiti ꞌikën, an ka Dios ꞌisti ꞌikën.

9 Chuamarua tani kuë́ëni ka upí ꞌinun an ënë menuxun ñu mëkë unikama ꞌiti ꞌikën, a unikama ka Diosan aín bëchikë kati ꞌikën.

10 Chuamarua tani kuë́ëni ka ñu upí ꞌaia unin ꞌatima okin ñuikë an, Diosan nëtë naíkamëonu ꞌiti ꞌikën.

11 Chuamarua tani kuë́ëni kamina mikama unian ꞌë kupin, ꞌaisama onan këmëi banakin bëtsi bëtsi okë an ꞌiti ꞌikën.

12 Kamina kuë́ëni asabi tani ꞌiti ꞌain, achúshi ñu chaíira kamina naínua biti ꞌain, usaribi okin ka an bana ñuikë profetakama ꞌatima okankëxa, mi ꞌisama pain ꞌain.

13 Mitsúx kamina ënë menu ꞌikë tashi ꞌiti ꞌain. ꞌAibi ka tashi aín muka ꞌunchati nëtëtia. ¿Uisarax kara amiribi mukatëkënti ꞌik? Usa ꞌain ka ꞌaisama ꞌia, unin ëman putia bëtsi unikaman amatia.

14 Mitsux kamina ënë menu ꞌikë tirí ꞌain, achúshi ëma matánu ꞌikë an ka unë́tisama ꞌikën.

15 Uinbi ka tirí bimixun bunanti mëu nantima ꞌikën, nankinma ka kamabi pëkatanu manami nanti ꞌikën, kamabi xubunu ꞌikëa pëkatanu.

16 Usaribi ꞌixun kamina mitsun tirí ꞌixun kamabi unian isnun ñu upí ꞌati ꞌain, usakin upí ñu mitsun ꞌaia iskin ka kamabi unin min papa Dios naínu ꞌikë a rabiti ꞌikën.

17 Kamina sinántima ꞌain, ꞌën kana Moisésnën bana ꞌimainun profetakama kuënëo bana këñui ubama ꞌain, usakin ꞌakinma ax kikësabi okin ꞌai kana ubakën.

18 Asérabi kana mi kain me ꞌimainun naí këñutisama ꞌain ka a bana achushirabi tërëkakëma ꞌiti ꞌikë, ꞌianan ka aín tsaka okë axí tërëkakëma ꞌiti ꞌikën, ax kiásabi oi ꞌitamainun.

19 Uin kara aín bana kuaisamatankin bëtsi uni ꞌunámima a ka chamara Diosan aín nëtë naíkamëonu ꞌimiti ꞌikën. ꞌAibi ka uin kara a bana kuakin usaribitia ꞌinun bëtsi uni ꞌunamia a Diosan aín nëtënu cha ꞌimiti ꞌikën.

20 ꞌËn kana mitsu kain, min fariseokama ꞌimainun an bana ꞌunánkë unikamasa ꞌikima, ñu upí ꞌakë ꞌaish kamina Diosan nëtë naíkamëonu ꞌiti ꞌain.

21 Mitsun rara ñuixuan bana kamina ësai kikë kuakën: "Uni kamina ꞌatima ꞌain, uin kara bëtsi uni ꞌaia an ka tëmëramikë ꞌiti ꞌikën".

22 ꞌAibi kana ꞌën mi kain, uix kara aín xukënmi nishia an ka tëmëramikë ꞌiti ꞌikën; uin kara bëtsi uni chichaia axribi ka ꞌapu kamanu bankë ꞌiti ꞌikën; ꞌimainun ka uin kara aín xukën ꞌatimaira okin ñuiña axribi manë tsinu nikë ꞌiti ꞌikën.

23 Usa ꞌain kamina nukën Papa Dios ꞌinánti ñu ubanxun ꞌën xukën ka ꞌëmi nishaxa kixun sinánkin,

24 Nanti ꞌain, anu ñu nankë a ꞌurama nábiani kuantankëx min xukënbë mëniónakuatsini utankëxun kamina min uankë ñu a Dios ꞌinánti ꞌain.

25 Bëtsi unian mimi manankëma ꞌainshi kamina abë́ mëniónanti ꞌain, mia ꞌain kushinu ubankëma aínshi ꞌain kushi an ka mia sipuanun suntarukama inánti ꞌikën.

26 Asérabi kana mi kain anuax kamina min kuríki këñukin kupioibi chikitima ꞌain.

27 —Mitsún rara ësai kia bana kamina kuakën: "Bëtsi unin xanubë kamina ꞌitima ꞌain".

28 Usa ꞌainbi kana ꞌën mitsu kain, uin kara ꞌaisatankin xanu ꞌitsi isia ax ka aín nuitunën ami ꞌuchai abë́ ꞌikësa ꞌia.

29 Usa ꞌain kamina, min bëru mëkeu ꞌikë an mi ꞌuchamikëxun ëchixun ꞌura nanti ꞌain; ax ka min nami achúshi tëakësa ꞌiti ꞌikën, nami kamabi ñu ꞌaishmi manëtsinu tëmërai kuantima kupí.

30 Min mëkën mëkeu an mi ꞌuchamikëxun kamina tëaxun ꞌura nanti ꞌain, ax ka min mëkën achúshi tëakësa ꞌiti ꞌikën, min nami achúshi nëtëti ka asabi ꞌikën, kamabiñu ꞌaishmi manë tsinu tëmërai kuantima kupí.

31 Ësairibi ka kia: Uix kara aín xanubë ënanania, an ka achúshi kiríka ꞌatankëxun ꞌinankin ënti ꞌikën, bërí ka ꞌën xanuma ꞌikë kixun kakin.

32 Usa ꞌaibi kana ꞌën mi kain, uni an aín xanu unibë ꞌikëmabi ënkë an ka aín xanu ꞌuchamia. Uni an bëtsin ën kë xanu bikë axribi ka ami ꞌuchaia.

33 ꞌImainunribi kamina min rarakama ësai kia bana kuakën: A ꞌinanti ñu ubanxu kamina asérabi Dios ꞌinanti ꞌain.

34 ꞌAibi kana mi kain, asérabi kana banai kia kamina banatima ꞌain. Naítan kuamainun kana mi asérabi kain kia kamina banatima ꞌain. Naínu ka nukën Papa Dios ꞌikë a kupin.

35 Men kuamainun kana mi asérabi mi kain kia kamina banatima ꞌain, nukën Papa Diosan ka kamabi menu ꞌikë a kupin, Jerusalén ñuibi kamina kitima ꞌain. Ax ka ꞌapu chaíira aín nëtë ꞌikën.

36 Mitsun maxkaribi ñui kamina asérabi banatima ꞌain, uinbi ka aín bu tunan ꞌimianan uxua ꞌimitima ꞌikën.

37 Mixmi asérabi kikë ax ka asérabi ꞌiti ꞌikën, mix asérabima kikë ax ka asérabima ꞌiti ꞌikën. Kamabi ëóra banakë ax ka ñunshin ꞌatimanuax aia.

38 Mitsún rarakama ësai kikë bana kamina kuakën: bëtsi unin min bëru ꞌatima okëxun kamina aín bëruribi ꞌatima oti ꞌain. Bëtsin min xëta ꞌatimokëxun kamina aín xëtaribi ꞌatima oti ꞌain.

39 Usai kia ꞌainbi kana ꞌën mitsu kain: Mitsua unin ꞌatimokëxun kamina tanshiti ꞌain; min mëkënu bëtashkakëxun kamina amoribia mi bëtashkanun ꞌamiti ꞌain.

40 Uin kara mibë nishanankin min kutun bisa tania a kamina anunmi mapukë chupa aribi ꞌinanti ꞌain.

41 Bëtsi unian mi achúshi ꞌura ñu ubanun kakëxun kamina rabë́ ꞌura ubanti ꞌain.

42 Uin kara mi ñu ñukatia, a kamina ꞌinánti ꞌain, uin kara min ñu ꞌinan ishiti kuëënía a kamina ꞌinanti ꞌain.

43 Ësai kikë banaribi kamina kuakën: Axa mimi nishkë uni nuibakima kamina, axa mimi nishkëma unishi nuibati ꞌain.

44 Usai kia ꞌaibi kana ꞌën mi kain: Mimi nishkë uni nuibakin kamina an mi ꞌatima okë uni a nukën Papa Dios ñukaxunti ꞌain.

45 Usakin ꞌai kamina Dios naínu ꞌikë aín bëchikë ꞌiti ꞌain, an ka ꞌatima unikama ꞌimainun upí unikama pëkanun bari urumia; ꞌimainun ka uíribi uni ꞌatima ꞌimainun uni upikama ainaribi ꞌinun ꞌibumia.

46 An mitsu nuibakë unishi nuibakë ꞌixun karamina, ¿Añu ñu upí biti ꞌain? ¿An Romanu ꞌikë ꞌapu ubamiti kuríki bikë ax ribi ka usai ꞌia?

47 An mitsu nuibakë unibëshi kamina mitsux nuibanantima ꞌain, ¿Usa ꞌixun kaina añu biti ꞌai kixun kaina sinanin? ¿Usaribiti ka an Diosan bana kuakëma unikama ꞌia?

48 Mitsuxribi kamina upí ꞌiti ꞌain, nukën Papa Dios naínu ꞌikë axribi ka upíira ꞌikën.