1 Pëkarakë ꞌain ka, kamabi sacerdote kushikamaꞌimainun kaniakëkë judio unikama Jesús rëtëti ꞌësënankëxa.

2 Usa ꞌixun nëabiankin ubaxun ka Pilato, romanu ꞌikë ꞌain kushi a ꞌinankëxa.

3 Usa ꞌain ka Judas an Jesús ꞌatima onun an uni ꞌinankë ka rëtëia kixun ꞌunanbiani kuanxun, treinta kuríki sacerdote kushikamaꞌimainun ampan kaniakëkë unikama mañakëxa,

4 Ësakin kakin: —Kana ꞌuchan añu ñubi ꞌakëma uni achúshi mikama ꞌinan. ꞌAibi ka akaman kakëxa: —¿Nun kananuna ꞌa unaniman? ¡Ax ka mina ꞌikën!

5 Usa ꞌain ka Judas kuríki anuxun Dios rabiti xubunu pubiani, kuanx tëtsëkiakëxa.

6 Sacerdote kushikama ka a kuríki bitsi kiakëxa: —Ënë kurikinëx ka; imín masá okë ꞌikën. Usa ꞌain anuxun Dios rabiti xubunu nanti ka ënë kuríki ꞌaisama ꞌikën.

7 Usa ꞌain ka kánani a kurikinën kananuna achúshi me anuxun unin ñutë ꞌakë, kakin anëkë a maruti ꞌain, ax ka anu ꞌurakëox ꞌukë unikama mainti ꞌiti ꞌikë.

8 Usa ꞌain ka, a me bërí nëtënbi imi kakin anëkë ꞌikën.

9 Usai ka an bana ñuikë Jeremías kiásabi oi ꞌiakëxa: "A treinta kuríki ka biakëxa, ax ka ꞌain tsóti kupin israelitakaman nankë ꞌiakëxa,

10 Anun ka maruakëxa ñutë kakin anëkë me a, nun ꞌIbu, kiásabi okin".

11 Anu ubania ka ꞌapun Jesús ñukakëxa: —¿Mix karamina judiokama unikaman ꞌapu a ꞌain? —Mix kikë usa ka —Jesusan kakëxa.

12 Usai ka sacerdote kushikama ꞌimainun ampan kaniakëkë unikama ami manankëxa, ꞌaibi ka Jesusan uisakibi kama ꞌikën.

13 Usai ꞌia ka Pilatonën ñukakëxa: —¿Mi ñuia ꞌatimati banaia karamina kuatima?

14 ꞌAibi ka Jesusan achúshi banabi kama ꞌikën, usai ꞌikëbë ka Pilato, uisa uni kara ënëx ꞌikë ki ratuakëxa.

15 Pascua nëtën usabi okin uni sipuakë chikinkë ꞌixun ka aín kushin ui chikinti kara uni kibëtan a chikiankëxa.

16 Anu ka achúshi uni sipuakë Barrabás kakë unin ꞌunairakë ꞌiakëxa;

17 Anu timë́kë ka unikama Pilatonën ñukakëxa: —¿Uira chikinti karamina míkaman kuë́ënin: Barrabás kakë a karana chikinti aín, a ꞌakima Jesús Mesías kakë a chikinti karamina kuë́ënin?

18 Pilatonën ka ami nishkin ka ꞌë ꞌinanxa kixun ꞌunankëxa.

19 Aín tsótinu tsókë ka Pilato aín xanun kamiakëxa: "A uni upí a kamina uisabi otima ꞌain, imë́ kana a kupin ꞌaisamokin namánëti".

20 Usa ꞌaibi ka sacerdote ꞌimainun ampan kaniakëkënën ꞌitsaíira uni kakëxa, Barrabás chikianan Jesús rëtënun kixun kakëxa.

21 Usa ꞌain ka aín kushin amiribishi ñukatëankëxa: —¿Rabënua karanuna uinu ꞌikë aira chikinti ꞌain kixun ñúkakëxa? Ñúkakëxun ka sharákin kakëxa: —¡Barrabás ka chikin!

22 Pilatonën ka ñúkakëxa: —¡Uisaki karana Jesús Mesías kakë ënë ꞌati ꞌain? Kamaxubi ka kakëxa: —¡Kamina i curuz bëntanki matasti ꞌain!

23 Pilatonën amiribishi ñúkakëxa: —¿Uisa ñu ꞌatima kara ak?

ꞌAibi ka kushin sharati amiribishi kitëkëankëxa: —¡Kamina i curusokënu mataskin bëntanti ꞌain!

24 Pilatonën ka unin kuatiama ꞌisakëxa, ꞌaibi ka uni ꞌitsaíira sharati kuë́ënkëni kiakëxa, kikëbë ka ꞌumpax bëmitankëx atun ismainunbi mëchukati kiakëxa: —ꞌËn kana ënë uni bamakëbë ꞌuchaima mitsun kamina a isti ꞌain.

25 Kia ka kamabi unin kakëxa: —¡Nukama ꞌimainun nukën bëchikëkama ka aín bamakë ꞌunanti ꞌikën!

26 Usa ꞌain ka Pilatonën Barrabás; pikuana rishkimitankëxun Jesús i curuznu bëntanki mëtasnu ꞌinankëxa.

27 Pilato suntarukaman ka anu atux timëkë xubu mëu Jesús ubankëxa, anuax ka suntarukama a nëbëtsiorati a ꞌurama timëakëxa.

28 Aín chupa chaxkë bikuantankëxun ka, chupa xonsa chaxkë tëñumiakëxa.

29 ꞌImainun ka achúshi mañuti muxa ꞌakë aín maxkanu ꞌamiana achúshi i maxu tëakë aín mëkëñu tuimiakëxa. Usakin ꞌatankëx, a bëmano rantipuruni tsóbuki ka ami kuaikin kakankëxa: —¡Min judiokama ꞌapu ꞌaix kamina nëtëtimoi tsóti ꞌain!

30 ꞌImainun ka tushukanan, i maxu bikuankin anunbi mataxkakëxa.

31 Ami pain kuaitankëxu ka, aín chupa xonsa chaxkë pëmiakëxa, pëmitankëxun ka aín chupabi pañumixun anua bëntakin i curuznu mëtastinu ubankëxa.

32 Anua chikikin ka, mërakin achúshi uni Simón kakin anëkë Cirenenu, ꞌikë a Jesusan i curusokë buanun kixun bë́nëkin kakëxa.

33 Kuanx ka Gólgota kakë me anu bëbakëxa. (Usai kikë, "Ax ka mapuxo kikë ꞌikën"),

34 Anuxun ka vinu baka muka këñun mëskukë a xëanun ꞌamiakëxa, ꞌaibi ka Jesusan, tanxun xëatisama tankëxa.

35 Mataskin ka i curusokënu aín taënu ꞌanan aín mëkënu ꞌakin bëntankëxa, suntarukaman ka Jesusan chupa uin karaisa biti ꞌikë kixun tantankëx mëtikiakëxa.

36 Usakin ꞌatankëx ka anuxun bëruantinu tsobukankëxa.

37 Aín maxka manami ka ësakin kuënëoxun nankë ꞌiakëxa, a bana ka ësai kikë ꞌiakëxa: "ËNËX KA JESÚS, JUDIOKAMA ꞌAPU ꞌIKËN".

38 A nëtënbi rabë́ uni ñu ꞌaisama ꞌakë, bëtsi aín mëkeu ꞌanan ꞌain mëmiu mataskë ꞌiakëxa.

39 Axa ꞌinukë unikaman ka, a chichai tënkëkin aín maxka shaikakin,

40 Kakëxa: —¡Mix kamina anuxun Dios rabiti xubu rëupatankëxun rabë́ ꞌimainun achúshi nëtë birutëkën katsi kia! ¡Mix Diosan Bëchikë ꞌaish kamina anua mi bëntankin mëtaskë anua ꞌibuti ië́ti ꞌain!

41 Usairibi ka sacerdote kushikama ꞌimainun ñu ꞌunan unikama ꞌianan ampan kaniakëkë akamaribi ami kuai kiakëxa:

42 Bëtsi ka iëmiaxa, usa ꞌaibi ka axbi iëtima. An ka Israelnën ꞌapu ꞌikën: ¡Usa ꞌaish ka i curusokënua ꞌibuti ꞌikën, usai ꞌibukëbë kananuna ami katamëti ꞌain!

43 Ax ka Diosmi katamëaxa Diosan ka a ꞌiëmiti ꞌikë, ax asérabi kuë́ënkin. ¿Ax ka kiaxa ꞌën kana Diosan Bëchikë ꞌain?

44 A këñubia i curuz mataskë uni ꞌatimanëribi ka, ꞌatimokin chichakëxa.

45 Bari xamarukë ꞌain, rabë́ ꞌimainun achúshi oi bari kuainakëkëbë ka kamabi me bëankiakëxa.

46 Usai bari ꞌikëbë ka, Jesús munuma kuë́ënkëni kiakëxa: "Elí, Elí, ¿Lemá sabactani?" (Ësai ki: "ꞌËn ꞌibu, ꞌËn ꞌIbu, ¿Uisa kupin kaina ꞌë ëan?")

47 Anua ꞌikë rairi akaman ka a kuati kanankëxa: —Ënën ka an bana ñuikë Elías kuënia.

48 Usai ꞌikëbë ka anu ꞌikë achúshi, abakianxun ñu bachu barikin bixun, vinu baka mukakëñun mëskukë chaboxun, ñumi nëaxun a ꞌurama ubanxun ꞌamiakëxa.

49 Anu ꞌikë rairinëx ka kiakëxa: —Ka ën, Elías kara a ië́mi aia kananuna isti ꞌain.

50 Jesús ka amibirishi kushin kuë́ënkëni, bamakëxa.

51 Usai ꞌikëbë ka anuxun Dios rabiti xubunu bëpankë chupa manamiax shimuki panarabëti tukiakëxa; ꞌimainun ka meribi shaikimainun maparakama tukibuakëxa.

52 Anu uni mainkë kini tukikëbë; ka Diosan uni bama a kamax baiskiakëxa.

53 Jesús baiskian ka a unikamaxribi Jerusalén ëma upí anu ꞌitsa unin isnun kuankëxa.

54 Anuxun ka Capitan Romanu ꞌikë ꞌimainun suntarukama an Jesús bëruankëkama an niún kuainkëbëta kamabi ñu ꞌia isakëxa, isi ka ꞌitsaíira rakuëti kanankëxa: —¡Asérabi ka ënë uni Diosan Bëchikë ꞌiaxa kanankëxa!

55 ꞌItsaíira xanu an ꞌuraxun Jesús iskë, atux ka Galileanuxun nuibiankin ꞌakinkë ꞌiakëxa.

56 Atubë ka María Magdalena, María, Santiago, José aín tita ꞌimainun Zebedeonën bëchikë kaman tita ꞌiakëxa.

57 Bakishkëbë ka, achúshi uni ñuñuira José Arimatea kakë, aribia Jesusan ꞌunamikë ax uakëxa.

58 Josenën ka isi kuaxun Pilato Jesusan nami ñúkakëxa, Pilatonën ka ꞌinanun kixun kakëxa.

59 Anuxu ka Josenën ꞌain nami, bikin achúshi sábana upí lino chuañuma anun rabuankëxa.

60 Usotankëxun ka kini ꞌio achúshi, mapara ꞌamikë anu nankëxa. Usokin nantankëxun ka achúshi maxá chaíira anun kini xëpubiani kuankëxa.

61 ꞌAibi ka María Magdalena ꞌimainun bëtsi María anu mainkë kini a bëtanai tsóti tikiakëxa.

62 Anun ñu mëtima nëtë ꞌionx pëkarakëbë ka sacerdote kushikama ꞌimainun fariseokama timëkiani Pilato isi kuanxun,

63 Kakëxa: —ꞌËn ꞌIbu, kananuna mi sinámi bamakëmapain ꞌaish ka këmëntapun ax kiaxa, bamatankëx kana, rabë́ ꞌimainun achúshi nëtë ꞌikëbë baiskiti ꞌain.

64 A kupí kamina anua mainkë a rabë́ nëtë ꞌimainun achúshi nëtë ꞌinutamainun upioki bëruamiti ꞌain, aín unikaman ka uxún mëkama biankin ubanti ꞌikën, usakin ꞌatankëxun ka baiskiaxa uni katima kupí. Usa ꞌain ka, axa këmëkë ax bërama ꞌikësamairai këmëkë ꞌiti ꞌikën.

65 Pilatonën ka kakëxa: —Anu ka min suntarukama ꞌikë. An ka kuantakëxun kini a upiokin mëniotankëxun bëruanti ꞌikën.

66 Kuaxun ka anu mainkë kini a maxaxan ꞌunantiokin xëpuakëxa; usakin ꞌaxun ka anu suntarukama an bëruanti ëankëxa.