1 A nëtënbi xubunuax chikikiani kuanx ka Jesús parúmpapa kuëbi tsóbuakëxa.

2 Itsaira uni timëkëbë ka, Jesús manë nuntinu ꞌirui tsóbua këxa, usaia ꞌitamainun ka unikama masinu tikia këxa.

3 Usa ꞌai ka ꞌitsaira ñu bëtsi bana ñuikësa oki ꞌunamiakëxa.

—Ka kakëxa: achushi an ñu bëru ꞌapákë ka chikiaxa aín ñu bëru sakai.

4 Sakakëx ka raíri ñu bëru bainu nipakëaxa. Nipakëkëbë uxún ka ñuina pëchiunën eaxa.

5 Raírinë ka maxanu nipakëaxa, me chukumara ꞌikënu; a ñu bëru ka bënëtishi koaxa me këxtuma ꞌain.

6 ꞌAibi ka barin urukin xarokë aín tapun ꞌaíma ꞌain chushiaxa.

7 Rairi ñu bëru ka muxanu nipakëaxa, nipakëkë ꞌikë ka muxan abë kokin mapukin bamamiaxa.

8 Usa ꞌaibi ka rairi ñu bëru an me upinu nipakëkë, an upiokin tuaxa; tuakë ꞌain bimi ka cien ꞌiaxa, rairinex sesenta, ꞌimainun ka rarinëxribi aín bimi treintaishi ꞌiaxa.

9 ¡Uin kara aín pabita kuatia an ka kuati ꞌikën!

10 Aín unikaman ka Jesús a ꞌurama uxún ñukákëxa:

Uisakaskin karamina bana itsi ñuikësokin ënë unikama bana ñuixunin.

11 Jesusan ka kakëxa:

—Mikama ka Diosan ñu unpukë uisai karanuna naíkamëonu ꞌiti ai kixun unamia, ꞌaibi ka bëtsi unikama unamima.

12 Uix kara ñuñu ꞌikë ax ka ëora ꞌinankë ꞌiti ꞌikën, usa ꞌaish ka chaíirañu ꞌiti ꞌikën; ꞌaibi ka an añuma a chukumaratsuñu ꞌikëbi ankëkin bikuankë ꞌiti ꞌikën.

13 A kupin kana bana itsi ñuikësa okin ñuin; akaman ka isia, ꞌainbi ka isima; ka kuatia ꞌixunbi ka uisai kara kia kixun unanima.

14 A kamanu ka profeta Isaíasnëan kuënëo bana kikësabi oi ꞌia:

"Kuakinbi kamina uisai kara kia kixun ꞌunántima ꞌain.

Upiokin min bërun iskibi kamina istima ꞌain.

15 Aín nuitu mëu ꞌunántisama tanan ka unikaman atun pabitan kuakinbi uisai kikë kara kixun ꞌunántisama tania.

Atun bërunbi ꞌën ꞌaia iskinbi ka ꞌën kushiira ꞌaibi ꞌëmi sinántisama tania.

ꞌËmi sinanatia kana atu ꞌën uni ꞌinun ië́mitsian. Usa ꞌaibi ka ꞌisama tanxa. Kiax ka Isaías kiakëxa".

16 Chuamarua tani kamina mikama bëruñu ꞌixun isanan anun kuatiñu ꞌixun kuati ꞌiti ꞌain.

17 ꞌËn kana mikama kain ꞌitsaíira profetakama ꞌimainun an ñu upí ꞌakë unikaman ka ënë istisa tankibi isama ꞌikën, ꞌimainun ka mími kuakë ënë kuaisa tankibi kuama ꞌikën.

18 —Ka, kua, uisai kikë kara bëtsioki ñuikë bana ënë ꞌikën an ñu ꞌapakë ñui ka ënë bana kia:

19 Uin kara anun naíkamëonu ꞌiti a kuakinbi kuatima ax ka ñu bëru bainu nipakëkësa ꞌikën, usa ꞌikë ka upiokin ꞌunaniama ñunshin ꞌatimanën ꞌain nuitunu ikë bana manumianan bikuania.

20 Bëtsi unikamaxribi ka ñu bëru maxanu nipakëkësa ꞌikën, usa ꞌixun ka Diosan bana kuë́ënkin bitsia.

21 Usa ꞌain ka upiti tupunkëma ꞌixun bëtsi bëtsi ñu inúkin bënëkinshi a kuakë bana manuia.

22 Ñu bëru muxañu menu pakëkë ax ka ësa ꞌikën, uin kara a bana kuatibi, ñuñuira tsóti kamabi nëtën sinania, ax ka manuti tuañumasa ꞌia.

23 Rairi unix ka me upínu ñu bëru pakëkësa ꞌikën, a unikamax ka nukën Papa Diosan bana asérabi kuakin a bana kikësabi okin ꞌakë ꞌaish me upinu ꞌapákë ñu bëru, ax koi kanitankëxun upí okin tuakë, asaribi ꞌia. Rairinëx ka ꞌitsaíira, cien, bimiñusa ꞌimainun ka rarinëxribi ꞌitsa, sesenta, bimiñusa ꞌianan, rairinëxribishi ꞌitsamashi, treinta, bimiñusa ꞌia.

24 Jesusan ka bana itsi ñuikësokin bana ñuixunkin ka ësakinribi kakëxa:

—Naíkamëonu ꞌiti ax ka ësaribi ꞌikën. Achúshi unin ka ñu bëru upí aín naënu ꞌapáxa.

25 ꞌAibi ka kamabi uni ꞌuxan, anu kuanxun axa ami nishkë achúshi unin a naënu ñu bëru ꞌaisama ꞌapaxa, ꞌapabiani ka kuanxa.

26 Usa ꞌain ka ñu bëru ꞌapákë ax upí ꞌaish koi kanitankëx bimiaxa. Bimiñu ꞌaibi ka ñu bëru ꞌaisama axribi koi kaniaxa.

27 Usa isbiani kuanxun ka an ñu më́mikë unikaman aín ꞌibu ësakin kaxa: "Min kamina min naënu ñu bëru upí ꞌapan. ¿Usa kat? ¿Usa ꞌaibi kara chuku ꞌaisama uisax koax?".

28 Kakëxun ka aín ꞌibun kaxa: "ꞌAtima unikaman ka usakin ꞌaxa". Kakëxun ka an ñu mëëxunkë unikaman kaxa: "¿Nun a chuku ꞌaisamakama ëchiti kuanti kaina kuë́ënin?".

29 Kakëxun ka aín ꞌibun kaxa: "A ëchikimina ñu ꞌapakë aribi ëchiti, usa ꞌain kamina chuku ëchítima ꞌain.

30 Abë́bia kanitanun kamina ënti ꞌain, anun aín bimi biti nëtë ꞌitámainun, usa ꞌain kana an bimi biti xuti ꞌain, an chuku ꞌaisama pain bitankëxun nëënun kana xuti ꞌain, usa ꞌain ka bixun trigo anu ñu bimi nankë anu bukunti ꞌikën".

31 Bana itsi ñuikësokin ka Jesusan anu ꞌikë unikama kakëxa: —Naíkamëonu ꞌiti ax ka mostaza bëru unin aín naënu ubanxun ꞌapakë usa ꞌikën.

32 Usa ꞌain ka bëtsi ñu bërusama chamaraíira ꞌikën, usa ꞌaibi ka kani bëtsi ñu ꞌapakë ikësamairai pëñanakëtia usai ikëbëtan ka ꞌisákan anu noia.

33 Jesusan ka bana itsi ñuikësa okin kakëxa: —Naíkamëonu ꞌiti ax ka anun pan chamiti ñu rabë́ ꞌimainun achui okin tupunkin bixun xanun mëskuxun nankëx ka kamaxbi ꞌubatia.

34 Jesusan ka bana itsi ñuikësokin bëtsi bëtsi ñu ñuikin anu ꞌikë unikama bana ñuixuankëxa. Bëtsi bana ñuikësa okinshi ka kakëxa:

35 Ësai ka an bana ñuikë profeta kiásabi oi ꞌiakëxa, kana bana itsi ñuikësari banati ꞌain, Diosan me uniotabakin umpua ñu kana mi ñuixuni.

36 Bana itsi ñuíkësokin bana ñuixuntankëxun anu ꞌikë unikama ëbiani kuanx ka Jesús xubunu atsíankëxa. Atsinia ka aín unikaman nëbë́tsiorakin Jesús ñukakëxa:

—Uisai kikë kara naënu ꞌikë chuku ñui kikë bana ax ꞌikë kixun kamina nu ñuixunti ꞌain.

37 Kakëxun ka Jesusan kakëxa:

—An ñu bëru upí ꞌapákë uni asaribi kana Unin Bëchikë ꞌinux uá ꞌën ꞌain.

38 Anu ñu bëru ꞌapákë ax ka ënë me ꞌikën, ñu bëru upí usaribiti ka axa naíkamëonu ꞌiti aín bëchikëkama ꞌia, chukusaribi ka ñunshin ꞌatimanën ꞌapun sinánmikë unikama ꞌikën.

39 An chuku ꞌatima ꞌapákë uni asaribi ka ñunshin ꞌatima ꞌikën. Anun bimi biti nëtë usaribi ka ënë nëtë këñuti ꞌikën. An bimi bikë uni asaribi ka ángelkama ꞌikën.

40 Anun unin chuku pain ëchítankëxun tsin nëënkë usaribi ka anun ꞌënë nëtë këñuti ꞌiti ꞌikën.

41 ꞌËn Unin Bëchikë ꞌinux uá ꞌixun kana ꞌën ángelkama xuti ꞌaín, ꞌën nëtënua an ñu ꞌaisama ꞌakë ꞌimainun an bëtsi uchamikë a unikamaribi bitankëxun chikinun,

42 Manë tsi rëkirukë anu ka puti ꞌikën, anuax ka tëmërai bënëti aín xëta ñërëxkai paëtani ꞌinti ꞌikën.

43 Usa ꞌain ka upí unikama barin urukin pë́kakëxa chaba chaba kikë usa aín Papa nëtënu ꞌiti ꞌikën. An aín pabitan ënë bana kuakë uni an ka kuati ꞌikën.

44 Naíkamëonu ꞌiti ax ka achúshi ñu menu umpukë usaribi ꞌikën. Uni achushinën ka ñu upíira umpukë a mëraia, mëraxun ka anubi umputëkënia, anu ka kuënkiani kuania, kuanxun ka aín ñu kamabi maruia marubëtsini uxún ka a kurikinën a me kamabi maruia.

45 Naíkamëonu ꞌiti ax ka achúshi uni an ñu marukë an upíira ñu perla kakë a bari nikësa ꞌikën.

46 Usa ꞌain ka perla kupíira achúshi mërabiani kuanxun unin kamabi aín ñu maruxun a kurikinan perla kakë ñu kupíira a maruaxa.

47 Ësaribi ka naíkamëonu ꞌiti a ꞌikë, rika anun bëtsi bëtsi tsatsa biti parunpapanu sarakakë usaribi ꞌikën.

48 Usa ꞌain rikan tsatsa ꞌitsa bitsia ka unin masinu ubania, tsoxun anuxun tsatsa kaiskin bitsia, bixun ꞌain upibu tasánu puruanan ka ꞌain ꞌaisama a bakanu putia.

49 Usaribi ka anun me këñuti nëtë ꞌinuxun ꞌaia. ꞌËn utëkënkëbë ukin ka angelkaman unikama Nukën Papa Diosan ꞌiskëx upí ꞌikë akama abë́ ꞌinun bianan an iskëxa upíma a ënuxun ꞌaia.

50 Manë tsi rëkirukë anu puti ꞌikën, anuax ka tëmërai bënë́ti aín xëta ñërëxkai paë tani inti ꞌikën.

51 Jesusan ka ñukakëxa: —¿Ënë kama kaina kuatin? Kakëxun ka atun kakëxa: —Kananuna kuati.

52 Usa ꞌain ka Jesusan kakëxa: —A kupin ka kamabi an ñu ꞌunánkë unin ñuixunkë kuënëo bana Naíkamëonu ꞌiti ka achúshi xubuñu unían. Aín ñu nanxun aín ió këñu aín xëni pikukësa ꞌikën.

53 Bana itsi ñuikësokin unikama bana ñuixunkin sënëobiani ka anua Jesús kuankëxa.

54 Kuanx aín menu bëbatankëxun ka anua judíos unikama timë́ti xubunu atsínxun bana ñuixunkin ꞌunánmiakëxa. Usokian bana ñuia kuati ka anu ꞌikë unikamax ratuti kanankëxa:

—¿Uin kara ënë uni usakian bana ñuiti ꞌunánmiax? ¿Uin kushin kara ënë menuxun unin ꞌakëma ñu ꞌain?

55 Ënëx ka carpinteronën bëchikë ꞌikën, ꞌimainun ka aín titax María ꞌikën. Santiago,* José, Simón, Judas akamax ka aín xukën ꞌikën.

56 ¿Aín chirabakë kamaribi ka nubë ënu ꞌikën?. ¿Uinua kara ësakin bana ñuianan ësakinribi ñu ꞌati ꞌunanx?

57 Usai kanani ami nishkëxun iskin ka atu Jesusan kakëxa:

—Achúshi profeta ka unin aín menuxun kuëënima. ꞌImainun aín aintsi ꞌibukamanribi kuaisama tania.

58 Usa ꞌain ka Jesusan ꞌitsa ñu ꞌakinma uni itsían ꞌakëma ñu ꞌitsamashi ꞌakëxa. Anu ꞌikë unikama aín bana kuaisama tankë kupin.