1 Herodes axa Judea kakë menu ꞌapu ꞌain ka Belén kakë ëma anuax Jesús bakë́ankëxa, Belenuaxa Jesús bakë́an ka amiaxa bari urukë anuax an ñu ꞌunánkë unikama, Belén ꞌurama ꞌikë Jerusalén ëmanu kuankëxa.
2 Kuani bëbakin ka ñukakëxa: —¿Uinu kara axa judíos unibunën ꞌapu ꞌinux bërí bakë́nkë a ꞌik? Amiaxa bari urukë anuxun kananuna anun a ꞌunánti ꞌispón isbëtsian. A isbëtsini kananuna rantin purinkin a rabi aín.
3 Usai kia a bana kuati ka Herodes ꞌimainun Jerusalénu ꞌikë unikama masá nuituti, uisa kara ënë ñu ꞌiti ꞌikë kia sinankasmakëxa.
4 Usa ꞌain ka Herodesnën kamabi sacerdonën ꞌapu ꞌimainun an kuënëo bana ꞌunanmikë unikamaribi kamikë rikuatsianxa timëtia ñukakëxa: —¿Uinuax karaisa Mesías axa utia judíos unibunën kaínkë, a bakë́nti ꞌikë kixun?
5 Ñukakëxun ka kakëxa: —Belén kakë ëma Judea anuax ka bakënti ꞌikë ka profeta kiakëxa:
6 Belén Judá menu ꞌikë ëma, min kamina bëtsi ëma kamasama ꞌain, minua ka ꞌapu achúishi an Israel uni ꞌakinti chikiti ꞌikën.
7 Kia kuatankëxun ka Herodesnën unëxun, amiaxa bari urukë anua ukë an ñu ꞌunánkë unikama añu nëtën kara ꞌispón isaxa kixun ñukati kuëankëxa.
8 Usakin ñukatankëxun ka Herodesnën an ñu ꞌunánkë unikama Belenu xuakëxa. Xukin ka ësakin kakëxa: Anu kuanxun uinu kara a tuá ꞌikë kixun istankëxun kamina ꞌënribi rantinpurunki a rabi kuanun ꞌë kai uti ꞌain.
9 Usa kian Herodesnën kakëx; kuankëbë ka ꞌispón anua a unikama kuanti anubi kuankëxa. Kuanx ka anua a tuá ꞌikë a manámibi a ꞌispón nirakëakëxa.
10 A isi kuë́ënkiani ka anuan bari urukë amia ꞌispón isbiani an ñu ꞌunánkë unikama kuankëxa.
11 Kuanx a manámia ꞌispón nirakëkë xubu anu atsínxun ka anua a tuá Jesús aín tita Mariabë ꞌikë mërakëxa. Mërai rantinpuruni tsóbukin ka Jesús rabiakëxa. Rabikin ka atun bunánti bakáxun anua buánkë kuri ꞌimainun tsëpasa ñu ꞌaibi nëënkë sanuíira a ꞌimainun i baka sanuíira akama ꞌinánkëxa.
12 Usokian ꞌinánkë ka namámikin nukën Papa Diosan anua Herodes ꞌikë anun kuama ꞌinun kakëx bai itsin kuantankëx aín nëtënu bëbakëxa.
13 An ñu ꞌunánkë unikamaxa aín menu kuantëkëan ka nukën ꞌIbu Diosan angelnën José namámikin kakëxa: —Herodesnën ka a tuá ꞌamiti bariminuxun ꞌaia. Usa ꞌain kamina aín titakëñun a tuá bibiani Egipto menu kuanti ꞌain. Kuantankëx kamina ꞌën mi kakë́ utëkënun anubi ꞌiti ꞌain.
14 Usokian nukën Papa Diosan kakëx nirukin aín titakëñun a tuá bibiani ka José imë́ Egipto menu kuankëxa.
15 Anu ka Herodes bamatamainun ꞌiakëxa. Nukën ꞌIbu Diosan ꞌamikëxuan profetanën kuënëosabi oi ka ꞌiakëxa, a bana ka ësai kia: "Egiptonua kana ꞌën Bëchikë bëan".
16 Usa ꞌain ka an ñu ꞌunánkë unikaman ka ꞌë paranxa, kia Herodes ꞌaisamairai niñakëxa. A kupin ka Herodesnën rabë́ baritiañu tuakama rëtënu ꞌamiakëxa.
17 Usakin ꞌakëbë ka profeta Jeremiasnën kuënëo bana kiásabi oi ꞌiakëxa. A bana ka ësai kia:
18 Ramá kakë ëmanuxun ka rarumati ꞌitsaíira inia kuakanxa. An ka Jacob ꞌimainun aín xanu Raquelnën rëbunki a xanukamaxa aín tuakën rabanan inkë ꞌiaxa. Aín tuá ꞌaíma kupí a sinani upí ꞌiisama tani ka uínbi nëtë́misamai ianxa.
19 Usa ꞌain ka Herodes bamá ꞌain Egiptonuxun namámikin José nukën ꞌIbu Diosan ángel achushinën kakëxa:
20 —Nirukianki aín tuakëñu aín tita bibiani kamina Israel menu kuantëkënti ꞌain. An a tuá ꞌaisa tankë unikama ka bamaxa. Usa ꞌain kamina kuantëkënti ꞌain.
21 Usa ꞌain ka José aín titakëñun a tuá bibiani Israel nëtënu kuantëkëankëxa.
22 ꞌAibi ka Arquelao aín papa Herodes ꞌiasa Judea menu ꞌapu ꞌikë kixun kuati ka anu kuantimi rakuëakëxa, usai ꞌia Diosan namamikin kakëx ka Galilea menu kuantëkëankëxa.
23 Anu bëbatankëx ka Nazaret ëmanu tsóti bëruakëxa, ësai ka nukën Papa Diosan bana ñuikë profetakaman Jesús ka Nazarenu kakë ꞌiti ꞌikë kixun kuënëosabi oi ꞌiakëxa.
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)