1 Bëtsi unimi kamina manantima ꞌain, Diosanribi mi mitsu ꞌuchotima kupí.

2 Uisakin kaina uni ꞌuchoi usaribikin ka Diosan mikamaribi ꞌuchoti ꞌikën, bëtsi uni mi a kësaribi okin ka mi ꞌati ꞌikën.

3 ¿Uisa kupí kaina min xukënan bëru xamënu ꞌikë i sani a isin, min bërunu ꞌikë imo a kaina isiman?

4 ¿Uisa ꞌixun kaina min bërunu ꞌikë i mo chaíira a bikëma ꞌixun, min xukënan bërunua; i sani chamará a bixun katsi kixun kati ꞌain? Min bëru xamënu ꞌikë i mo a bixunmabi.

5 ¡Upisa ꞌaibi ꞌatimakama! Ñu ꞌakë unikama, min bëru xamënu ꞌikë i mo chaíira apain kamina biti ꞌain, apain bixun iskin kamina bëtsin bëru xamë́nu ꞌikë i sani aribi biti ꞌain.

6 Dios ꞌinanti ñu kamina ꞌuchiti ꞌinantima ꞌai, mia ꞌuchitinan nëëki pitima kupí, ꞌimainun kamina kupíira ñu aribi anua kuchi ꞌikë anu nitima ꞌain, anu niabi ka chuorukin amakin ꞌatima oti ꞌikën.

7 Ñukakëxun ka Diosan ñu ꞌinania; uin kara baria an ka ñu mëraia; uin kara xëkuë taxkaia a ka xëokaxunkë ꞌiti ꞌikën.

8 Uin kara ñukátia an ka ñu bitsia, uin kara baria an ka mëraia, uin kara kuënia a ka xëokaxunkë ꞌiti ꞌikën.

9 ¿Uinu ꞌikë mitsun kaina min bëchikë pan ñukakëxun achúshi maxá ꞌinanti ꞌain?

10 ¿Uinu ꞌikë mitsun kaina achúshi tsatsa ñukakëxun runu ꞌinánti ꞌain?

11 Mitsux ꞌatima uni ꞌixunbi kamina mitsun bëchikë upí ñu ꞌinanin, mitsun mi ꞌakësamaira okin ka nukën Papa Dios naínu ꞌikë an ñukakë uni a upí ñu ꞌinánti ꞌikën.

12 Usa ꞌain kamina bëtsi unikama upiokin ꞌakinti ꞌain, usakin akinkëxun ka mikamaribi min, kuëënkësa okin akinti ꞌikën, usai ka profetakama ꞌimainun Moisésnën kuëënëo bana kia.

13 Xëkuë chukumará anun kuainsama anun kamina atsinti ꞌain, xëkuë cha ꞌimainun bai chaíira ꞌai pampa anun ka ꞌaisámaira uni atsinia, ax ka bai anun tëmërai kuanti a ꞌikën.

14 Xëkuë chukumará ax ka anun kuainsama ꞌikën, anun ka ꞌitsamaishi uni kuania ax ka bai chukumará anun kuantankëx nëtëtima oi ꞌiti ꞌa ꞌikën, anun ka ꞌitsamaishi uni kuania.

15 An këmëkin bana ñuikë unikama ami kamina bëruankati ꞌain, an Dios ñuikëbë, atux ka oveja ꞌunamaratsusa ꞌikën, ꞌaibi aín nuitu mëu pianankë ñuinasa ꞌaish aia.

16 Aín bimi kupí kamina i ꞌunánti ꞌain, ¿Muxanua karamina a kuti bimi biti ꞌain, muxan kara a kuti bimi tuati ꞌik?

17 Usa kupin ka i upitan upiokin tuaia, i ꞌatima an ka upiokin aín bimi tuaima.

18 I upitan ka aín bimi ꞌaisama ꞌinun tuaima, usa ꞌain ka i ꞌatimanënribi upiokin tuaima.

19 Kamabi i ax upiti bimikëmakama ax ka tëatankëxun tsin nënkë ꞌiti ꞌikën.

20 Usa ꞌai ka ai bimi iskin unin uisa i kara kixun ꞌunánti ꞌikën.

21 Kamabi an ꞌën ꞌIbu, ꞌën ꞌIbu, an ꞌë kakë ax ka nukën Papa Diosan nëtë naíkamëonu ꞌitima ꞌikën, an ꞌën Papa bana kikësa okin ꞌakë ax ka anu ꞌiti ꞌikën.

22 A nëtën ka ꞌaisamaira unin ꞌën ꞌIbu, ꞌën ꞌIbu, nun kananuna min anën bana ñuixuanan, ñunshin ꞌatimañu unikama ꞌimainun ꞌaisamaira unin ꞌakëma ñu ꞌakën kixun ꞌë kati ꞌikën.

23 ꞌAibi kana ꞌën uinsaran nëtënbi kana mitsu ꞌunama ꞌain, ñu ꞌatima ꞌakë unibu ënuax ka kuantan kixun atu kati ꞌain.

24 Uin kara ꞌën bana kuakin ꞌëx kikësabi okin ꞌaia, a unix ka ñu ꞌunánkë ꞌixun xubu maparanu ꞌakësaribi ꞌikën.

25 ꞌAibi ka baka uí suñuan ukin bë́kakin xubu shaikakin bë́kakë nipakëtima ꞌikën, maparanu ꞌakë kupin.

26 Usa ꞌaibi ka uin kara ꞌën bana kuakin ꞌëx kikësa okin ꞌaima ꞌax achúshi uni an sinañumasa ꞌixun ꞌashikin masinu xubu ꞌakë unisa ꞌikën.

27 Usa ꞌikë ka baka ꞌuí suñuan ꞌaisamaira bëkíkin xubu ꞌatimakin masinu ꞌakë a nipaxa ¡Nipakin ka kamabi ꞌain itákama masoxa!

28 ꞌËnë banakama ñuixuntankëx Jesús sënënkëbë ka an bana kuakë unikamax ratuti kanankëxa.

29 An ka asérabi kushi ꞌixun bana ñuixuankëxa, an kirika kuëënëokë ꞌunánkë unikama ꞌunamikësamaira okin ka a bana ñuixuankëxa.