1 Herodes, Galileanu a nëtën ꞌapu ꞌixun ka Jesús ñuikania kuakëxa.

2 Kuaxun an ñu më́mikë unikama ësokin kakëxa: An ka Juan Bautista axa baiskikë a ꞌikën, usa ꞌixun ka aín kushin iskëma ñu ꞌaia.

3 Herodesnën ka Juan sipuomiakëxa, Herodias, ax ka aín xukën Filipo aín xanu ꞌiakëxa.

4 Usa ꞌain ka Juanën Herodes kakëxa: —A xanu min xanu ꞌinun biti ka ꞌaisama ꞌikën.

5 Herodesnën ka Juan rëtëti sinánkëxa, ꞌaibi ka unikamami rakuëkin ꞌamiama ꞌikën, Juan ax isa profeta ꞌikë kixun sinánkë kupí.

6 ꞌAibi ka anuan Herodes bakëan nëtë ꞌain, Herodiasnën tuá xanu xuntaku ax ꞌitsaíira unia timëan upiti ransakëxa, usaia ꞌia isi ka Herodes ꞌitsaíira kuë́ëankëxa.

7 Kuë́ënkin ka añu ñu karamina kuë́ëni a kamina ꞌë ñukati ꞌai kixun kakëxa.

8 Aín tita Herodíasnën kakë kupí ka aín tuá xuntaku, an Juanën maxka kamina achúshi manë xampami ꞌë bëxunti ꞌai kixun Herodes kakëxa.

9 Kakëx ka Herodes ꞌitsaíira masá nuituakëxa, ꞌaibi ka unian kuamainun ꞌën kakësabi okin kana ꞌinanti ꞌai kixun sinánkin ꞌinankëxa.

10 Anuxun ka Juanën mapuxo sipunuxun tëbiskanun ꞌamiakëxa.

11 Anuxun ka achúshi manë xampami ubanxun xanu tuá ꞌinankëxa, ínankëxun ka aín tita ꞌinankëxa.

12 Usa ꞌain ka Juanën nami aín unikaman bibianxun maiánkëxa maibiani kuanxun ka Jesús ñuixuankëxa.

13 Bana ñuiña kuabiani ka Jesús manë nuntinu ꞌirukiani aín unikamabë anu uni ꞌikëma menu kuankëxa, ꞌaibi ka a ëmakamanu ꞌikë unikama ꞌunankin kuankin nuibiankëxa.

14 Manë nuntinua ꞌibukin ka Jesusan ꞌitsaíira uni isakëxa, isi ami sinánkin ka an nuibiankë uni ꞌimainun ꞌinsikëkama pëxkuakëxa.

15 Anuxun ka bëbakishbukëbë a ꞌuruma kuankin aín unikama kakëxa: —Ka xupibutia ënëx ka anu uni ꞌikëma ꞌikë kamina unikama kuantanun kati ꞌain, kamina aín piti ñu marui ëmakamanu kuantanu xuti ꞌain.

16 Kakëxun ka Jesusan kakëxa: —Ënë kama kuanimabi ka asabi ꞌikën, míkaman kamina piti ꞌinanti ꞌain.

17 Atun ka kakëxa: —Ënu ka mëkën achúshi pan ꞌimainun rabë́ tsatsa ꞌikën.

18 Kakëxun ka Jesusan ësokin kakëxa: —Ënu ka ꞌë bëxun.

19 Anuxun ka ꞌitsaíira uni basinu tsobumiakëxa, usokin ꞌatankëxun mëkën achúshi pan ꞌimainun rabë́ tsatsa aín mëkënan bitankëxun, manámi bësunkin asabi ka kixun katankëxun aín unikama ꞌinankëxa, anuxun ka kamabi uni atun mëtikakëxa.

20 Kamaxubi ka puchakin piakëxa, usotankënxun ka axa tëxëkë mëkën rabë́ ꞌimainun rabë́ kaki buakakin biakëxa.

21 ꞌAn pikë unikamax ka cinco mil uni ꞌiakëxa, ꞌai ka xanu ꞌimainun tuakama tupun këma ꞌiakëxa.

22 Ësakin ꞌatankëxun ka Jesusan aín unikama rëkuënkiani kuanun manë nuntinu këñurumiakëxa, usakin ꞌatankëx ka unikama kana kuani kixun kai bëruakëxa.

23 Unikama kana kuani kixun katankëx ka ax matánu Diosbë banai kuankëxa, usai ꞌikëbëa bëánkikëbë ka anu abi ꞌiakëxa.

24 Manë nunti parúmpapa nëbë́tsi ꞌain ka amokuax suñu bë́kikëbë baka chaíira ꞌinun bëchuankëxa.

25 Pë́karakuatsinia nëtë xabakëbë ka, Jesús parúmpapa kamananën atumi kikuatsini uakëxa.

26 Aí parúmpapa kamanan nikuatsinia isi ka aín ꞌunamikë unikama rakuëti kuënkëni: —¡Achúshi ñunshin ka aía kiakëxa!

27 ꞌAibi ka Jesusan ka nëtëk atu kakëxa, ¡ꞌË kana ꞌain!, ¡Rakuëama ka ꞌikan!.

28 Kia ka Pedronën kakëxa: —ꞌËn ꞌIbu mi ꞌixun kamina ꞌumpax kamananën minu kuanun ꞌë ꞌimiti ꞌain.

29 —Kakëxun ka Jesusan kakëxa, ka ut kakëx manë nuntinuax ꞌibukiani Pedro ꞌumpaxan nikiani Jesusnu kuankëxa.

30 ꞌAibi ka Pedro suñu kushi bë́kia isi rakuëti nanë́buti kuënkëni ¡ꞌËn ꞌIbu, ꞌë ka bit, kiakëxa!.

31 Kia ka Jesusan mëishpakin aín mëkënan bikin kakëxa, Pedro mix kamina chukumashi ꞌëmi sinánin. ¿Uisa kupin kaina ꞌëmi sinánkëma ꞌain?

32 Usai ꞌiax manë nuntinu ꞌirukëbë ka suñu bukubuakëxa.

33 Ësai ꞌikëbëtan ka manë nuntinu ꞌikëkama anu ukin aín rabuxutan rantipuruni tsobukin rabiakëxa: —¡Mix kamina asérabi Diosan bëchikë ꞌai kixun kakëxa!

34 Usakin ꞌatankëx ka parúmpapa ꞌukëmanan Jesús ꞌimainun aín unikama Genesaret menu bëbakëxa.

35 Anuxun ka anu ꞌikë unikaman Jesús ka uaxa kixun ꞌunánkakëxa, usa ꞌain ka a menu ꞌikë unikaman an chanioti xuakëxa, anuxun ka an pëxkunu uni ꞌinsikëkama bëakëxa.

36 Anuxun ka anuan mapúkë aín chupa kuëbibisa mëminu kixun kakëxa, usa ꞌaín ka uin kara aín chupa kuëbi tikaia a uni ꞌinsinkëkama ax pëxkuakëxa.