1 Naban nnon in, in tsin ki jɛk yin nkyɔrɔk nang, kɔng i bi ra yin inɛn. Awɛt ke akak yin ra inɛn, in bɛ̀ yit ayɔng fɛ́ a nyeseng ashon adada akuce yit, a yet aYeso Kristi, afi kusot kutabat. 2 Iwu fɛ́ a yet kunang itarang anɛn yit fɛ́ ba kin nabak, nek anɛn afiit kyɛk awo, a yet nek anɛn bafɛ́ azatse ngma kusum.

3 Na ane fi in rēn fok in ku rēn yit: ki in foos yit agbat ifɛ̀ wu. 4 Ngma ayɔng fɛ́ a nye, <<Imi ku rēn,>> awɛt da na ne nye ngma ikyɛng fɛ́ agbat ifɛ̀ wu fɛ̀ awo, a yet anet mbɔɔs, atsak di se ni wu awo. 5 Awɛt ngma ayɔng fɛ́ a foos agbat ifɛ̀ wu, na atsak e ishim Adakunom mi shining ni wu yɔng. Na ane wu fi in di rēn yit fok, in se yit ayɛt wu: 6 Ngma ayɔng fɛ́ a fɛ̀, iwu se ni kusot ayɛt wu, i se gbing-gbing na nye kuri nggɔn fɛ́ aYeso nye.

7 Bafidang in, in tsin ki jɛk yin agbat ifɛ̀ ifas awo, tit nzen e me, nyɔng fi i kin fok yin ni imɛsɛng e. Agbat ifɛ̀ nzen e nang yet ifɛ̀ fi i kin man fok yin. 8 Ngma na anɔng, in tsin ki jɛk yin agbat ifɛ̀ nfas; nyɔng fi in yet atsak ni wu, ni ni yin, nek ahwyi tsin gosok, mgbey atsak mi kpa ron.

9 Ngma ayɔng fɛ́ a nye fok iwu se ni mgbey, na ne na rawu arunyining, a resek mo ayɛt nhwyi. 10 Ngma ayɔng fɛ́ a shim arunyining, a se ayɛt mgbey, vit ikyɛng fi i se ni wu fi i da ku bɛ́ ni ikpa. 11 Awɛt ngma ayɔng fɛ́ a rawu arunyining, a resek mo ayɛt nhwyi, a teng a goroso ayɛt nhwyi, a rēn karɔ fɛ́ a di tseng awo, nek ahwyi me mi ku fam ayisi.

12 Naban nnon in, in tsin ki jɛk yin ne nek Adakunom mi ki fuut yin anɛn yin, nek iyerek aYeso.

13 Badada, in tsin ki jɛk yin ne,

nek iyin ku rēn yin,

iwu ayɔng fɛ́ a se neme ni imɛsɛng e.

Bacam, in tsin ki jɛk yin ne,

nek iyin mi ya yin agap amaan e me.

Naban nnon in, in tsin ki jɛk yin ne,

nek iyin rēn yin aDa me.

14 Badada, in tsin ki jɛk yin ne,

nek iyin ku rēn yin,

iwu yɔng fɛ́ a se

neme ni imɛsɛng e.

Bacam, in tsin ki jɛk yin ne,

nek iyin bɛ̀ yin agap,

ifɛ̀ Adakunom se ayɛt yin

iyin mi ya yin agap amaan e me.

15 I bi shim yin kazatse ki ikyɛng fi i se ayɛt azatse me awo. Ke akak shim kazatse, ishim aDa se ayɛt wu awo. 16 Nek kaakyɛ fi i se azatse, nkyɔrɔk ti: ikyɛng fɛ́ anet inɛn tsɛsɛk, aduk ikɔk i sɛs ikyɛng fɛ́ ayisi yɛrɛ, ni itsot kugwɔm naton ikyɛng fi iwu bɛ̀ ni idɔng fɛ́ a nye, ngma nkyɔrɔk yɔng nes na aDa awo tit azatse. 17 Kazatse nɛ aduk ikɔk ka tsin gosok, awɛt anet fɛ́ a nyes ishim Adakunom, bi nkum awo.

18 Naban nnon in, nnom nang yet nfi igang e. Kyɔn ti fi i kin fok yin fok anet ifa aKristi bi bɛ́, yɔkɔnɔng ana, bafi ifa aKristi me dot mi bɛ́. Na anɔng fi in di rēn yit fok nnom igang e nang. 19 Ba kin wuruk ayɛt yit, awɛt ba kin yet bafiit na tsak e awo. Nek ke ba kin fɛ́ ba yet bafiit, ke ba kin sot gung ni iyit, awɛt kuwuruk bá tonong fok vit azining ba fɛ̀ a yet afiit.

20 Awɛt iyin ba mi ki korok yin name aJɛrɛ fɛ́ na ne na afɛ́ aJɛrɛ me, ngma yin i rēn yin atsak e. 21 Da imi tsin ki jɛk yin ne fok nek i se yin vit irēn atsak e awo, tit nek i rēn yin atsak e, nɛ nek ba tɛ ba sɛs mbɔɔs na atsak e awo. 22 Angan wu fɛ́ a yet anet mbɔɔs ɛ? Anet mbɔɔs yet ayɔng fɛ́ a ra nanan fok aYeso yet Anet-Isheshek awo. Kuri ayɔng e yet anet ifa aKristi, a ra nanan aDa me nɛ Ari me. 23 Vit ayɔng fɛ́ a ra nanan Ari me, fɛ́ a bɛ̀ Ada me; ngma ayɔng fɛ́ a shan Ari me, a bɛ̀ Ada me bà.

24 Won itees fi i kin fok yin ni imɛsɛng e, di nak ni yin. Ki i nye yin anɔng, iyin di ki nak yin na Ari me nɛ na aDa me bà. 25 Na anɔng, ikyɛng fɛ́ a ki nye yit kushii me yet kutset vit igang.*

26 Imi tsin ki jɛk yin nkyɔrɔk nang naton bayɔng fɛ́ ba tsɛt ba ki tsa yin natse. 27 Wat iyin, ikorok name aJɛrɛ fi i mi sɛ yin ni wu, di nak ni yin. I ti tsɛt yin akak ki tees yin awo. Awɛt fi ikorok name aJɛrɛ wu tsin ki tees yin kaakyɛ, ni ikorok name me yet atsak, vit mbɔɔs ni ye. Nek anɔng, kyɔn tɛ fɛ́ a ki tees yin, sot yin ni wu.

28 Yɔkɔnɔng ana, naban nnon, di nak yin ni wu, nɔng izen fɛ́ a bi bɛ́, in bi bɛ̀ yit agap iyɛ, vit nsum ashon wu ni izen kubɛ́ wu.

29 Ki i rēn yin fok, a se tabat nanu ashon Adakunom, i rēn yin tsɛngtsɛng fok ngma ayɔng fɛ́ ba se tabat nanu ashon wu, ba yet kutes wu.