1 Nek anɔng, in mi sok ni iyɛ hom, in da ti in ki bɛ́ yin itsen fi i da ki beseng yin iyɛ awo. 2 Nek ki imi ki beseng yin iyɛ, angan tɛ a di se fɛ́ a di ki bɛ́ ni itɛrɛk iyɛ ɛ tit ayɔng fi in mi ku beseng iyɛ me. 3 In ki jɛk yin e anɔng, nek kin in bi in ta azɔng, in bi sɔ mgbang ni bɔk bayɔng fi i se yɛɛt ba di nɔk nta awo. Nek imi rēn tsɛngtsɛng fok kin in bɛ́ iyɛ ikan, iyin da bɛ́ yin iyɛ ikan bá. 4 Nek imi ki jɛk in e, ayɛt ibeseng iyɛ nɛ kafa kawe nɛ nayisi makiyi, da in ki jɛk kin ne nek in ki beseng yin iyɛ awo tit nek in ki tonong yin kutsik ishim fi in bɛ̀ nek iyin.

5 Ke akak nye ikyɛng fi ibeseng anet akak iyɛ, imi wu fɛ́ a di beseng iyɛ awo, awɛt imi di tɛ abak kayɔng ngma yit wu a ki beseng yit ne, imi mak shim in di ban ni icɛɛt e awo. 6 Nek itabak fɛ́ anet yɔng mi sɔ ni bɔk yin mi kyem anɔng. 7 Awɛt itabak e anɔng, ba ku fuut ne kong, ku gbinding yin kong kɔng kafa kawe me bi dung ku mak. 8 In tsin ra awon ni yin fok ku tonong ishim kong. 9 Nek anɔng wu in di jɛk, nek in di rēn nyen ifoos yin ikyɛng fi in ki tas yin kaakyi izen ɛ. 10 Ngma ayɔng fi iyin ku fuut yin ne, imi ku fuut e bà. Wat ikyɛng fi imi fuut ide, ki iyet ifi fuut, in nye anɔng akuce yin, i sɛ kusonong ashon Anet-Isheshek, 11 kɔn aShetan bi nye ikyɛng fɛ̀ a da ki borok yit mo; nek iyit yet yit batsen ni irèn iras nkyɔrɔk wu awo.

12 Izen fi in ki tse na aTorowas nek ishara ifɛ̀ itek aKristi, ngma ni itarak katitu ni irèn fɛ́ aTisa di nɔɔk, 13 iyɛ hom rēn se diring nek in bit aruneng aTitus azɔng, nek anɔng, in te a tɔ ni iba, in tatɔk sak na aMasedoniya.

14 Won in tere yit Adakunom, iwu fɛ́ a ki kɔk yit kubɔk na ki yɛs yit irèn kaakyi izen ayɛt Anet-Isheshek, na ra kutomong ni iyit kaakɛ ni ishara yit ifɛ̀ wu fi i bi nkɔn ntek makiyi. 15 Nek iyit ba in yet yit nkɔn ntek fɛ́ Anet-Isheshek nabak sak na Adakunom, fi in se yit ni kutomong nate bayɔng fɛ́ ba tsin ka ba sheshek, nate bayɔng fɛ́ ba tsin wɛɛs, 16 sak na bakak, in yet yit nkɔn iku, sak na bakak bá in yet yit nkɔn nhwyɔlɔl sak ni kutsɛt. Angan da kyem acet ndiring kutomong ti kuyɔng ɛ? 17 Nek iyit da in se yit ti ishɛrɛp banet awo, bayɔng fɛ́ ba res ifɛ̀ Adakunom nek ba di sɛs kurúm, iyit yet yit banet atsak, bayɔng fɛ́ Adakunom mi ki kasa yit, ne agap fi in sɛs na Anet-Isheshek in di cɛɛt ashon Adakunom ayɛt atsak, tɛ bayɔng fɛ́ Adakunom ka ba tom.