1 Kubɛ́ itsen hom kufɛ́ ataat kang sak ni yin. <<Kaakyi kucɛɛt mi sot anɔng. Ke ba fok iko nanu banet bafaa ke bataat ayi.>>* 2 Imi man ki kɔrɔk yin kuto ni izen fi in kin se ni iyin ni kubɛ́ hom kufɛ́ afaa. In tsin tin ki taas yin ni imi vit azɔng ni iyin: Ki in bun azɔng, in bi won bayɔng fɛ́ ba kin ra inɛn ida nɛ bakak fɛ́ ba tɛ ba ra ikak awo. 3 Ki itsɛt irèn yin fok ke Anet-Isheshek cɛɛt nanu hom ɛ. Iwu rat ayɛt ikyɛng fɛ́ a se ne nate yin awo, tit a tsin tonoso kukyem wu nate yin. 4 Nek i di rēn yin, ba kin ku tekak gbɛrɛk, ngma na anɔng a se ni kutset ayɛt kukyem Adakunom. Kpaf anɔng, iyit se yit gbɛrɛk ni wu, ngma na anɔng, ayɛt kukyem Adakunom, in da sot ni iwu in ra yin kutomong.

5 Mara yin ace yin da di yin, ki i ren resek yin ni inɔɔk atsak ɛ? Maas yin ice yin da di yin ke i ren se yin ayɛt atsak yin ɛ. Maas ice yin, rēn yin fok Anet-Isheshek aYeso se ayɛt yin awɛ, tit ki i mi kpa yin imaas e yɛ? 6 Ite iyɛ hom yet fok ni i rēn yin fok da iyit kpa yit imaas e awo. 7 Yɔkɔnɔng in se yit na awon sak na Adakunom, fok da i bi nye yin ikyikak iduk e awo. Ayet fok in shim yit banet da ki di yit fok in nyeseng yit imara me awo, tit ni ira yin ikyɛng fi i se gyat ke i di yin ti in dun yit ayi. 8 Nek iyit da kyem in ra yit ikyikak fi da in ra ide atsak awo, tit idɔng fi i yet atsak. 9 In bɛ yit itɛrɛk iyɛ, ngma izen fi in se yit gbɛrɛk, ni yin se yin gbagba; awon yit yet fok ni se yin gyatgyat. 10 Nek anɔng wu fi isak in di jɛk nkyɔrɔk nang ni imi vit azɔng, nɔng kin in bɛ́ in da mak sot fulul ayet ira kutomong ni kukyem hom awo. Kukyem fɛ́ Adakunom di nɔk nek in di nok yin mo da nek in di sarak yin mo awo.

11 Ábaruneng, ni igang e, te yin ice nek kusot kutek, fok yin awon hom, sot yin bafi kuyiring kuzining, sot yin kyang. Adakunom fɛ́ a nesek ishim ni kusot kukyang da se gung ni iyin. 12 Nye show yin bafidang ayɛt ashow ajɛrɛ. 13 Ngma banet Adakunom ki te show yin.

14 Won kunang aTisa yit aYeso Kristi, ni ishim Adakunom, ni imoon ice Kabik aJɛrɛ na ka sot gung ni iyin ngma.