1 Imi bi irèn awɛ? Imi yet atom aYeso awɛ? Imi man di aYeso aTisa yit awɛ? Iyin yet yin ikyɛng fi kutomong hom ayɛt aTisa tes awɛ? 2 Ke da in yet atom aYeso na bakak awo, na atsak e in yet ni iyin! Nek iyin yet yin nagang-ice-igwɔm hom, ifi ira kutomong atom aTisa.

3 Itɛnɛng ice min ye fi in ras bayɔng fɛ́ sosok na ba di tsɛk ishɔt. 4 Iyit bɛ̀ yit irèn ni in ya ni isɔ yit awɛ? 5 Iyit bɛ̀ yit irèn in tseng yit na banyining yit fɛ ba se ni ikuus gung ni iyit tɛ batom bakak, tɛ aruneng aTisa nɛ aKefas di ras awɛ? 6 Kɛ a yet imi nɛ aBarnabas wu kyɛk fi i se gbing-gbing ni in ra yit kutomong iya ni ice yit ɛ?

7 Angan atsom wu fɛ́ a ras kutomong, na ma tarasa ice wu yɛ? Akyɛ anet ikap ikɔ, na di tuus nakon anap, na won dang ya ica me yɛ? Angan anek ijaa fɛ́ a won dang sɔ nabasang e yɛ? 8 In tsin cɛɛt anɔng ni kuyiring anet awe kyɛk ɛ? In fɛ̀ kɛ Ntsi ice na fɛ̀ anɔng awɛ? 9 Nek i se ni jɛk ni kufumung ntsi aMusa fok yi, <<I bi faam inyak ikap kanu ni i tsin shushu nayak awo.>> A yet inyak de fɛ́ Adakunom daam naton de yɛ? 10 Atsak e yet fok fok a cɛɛt naton yit, kɛ anɔng awɛ? Ey, ba jɛk kucɛɛt kang nek iyit, nek ke anet ikap tsin kap nɛ anet ishushu nayak se ni ishushu me, ngma ba nye anɔng ayɛt ite iyɛ fok ba bi sɛ kuyak ni ishamang. 11 Ki iyit mi nye yit itus ijaa abik nate yin, i da se gyat ni in sɛ yit ikikak ifi irɔm ni yin awɛ? 12 Ke bakak bi irèn isɛs igbingding ni yin, i se gyat ki iyit ba in dung sɛ yit awɛ?

Awɛt ngma ne anɔng, iyit ra yit kutomong ni irèn fi in bɛ yit e awo, akuce anɔng, in nye yit akabɔk ne kaakyi kuri ikyɛng, kɔn in bi rosom yit ifɛ̀ itek Anet-Isheshek. 13 Ke iyin rēn yin fok, bayɔng fɛ́ ba ras kutomong nitu iya Adakunom ntong, sɛs nayak bá azɔng awɛ? Nɛ bayɔng fɛ́ ba ras kutomong narɔ kuta ashosh, sɛs kanu kafuu bá ayɛt nkyɔrɔk fɛ́ ba nasap azɔng awɛ? 14 Kpaf anɔng fɛ́ aTisa di fɛ́ fok bayɔng fɛ́ ba shara ifɛ̀ itek na ba sɛ iya ni isɔ bá azɔng.

15 Awɛt da imi ki mang ra kutomong ni irèn fi in bɛ̀ me awo. Da imi tsin ki jɛk yin nkyɔrɔk e nang ni ite iyɛ fok ni di nye yin ina awo. Kaduk ni in ku aza fɛ́ akak di ki kaba ni kukaa kang fi in bɛ̀. 16 Ngma na anɔng, ki in se ni ishara ifɛ̀ itek, i da kyem in nye kukaa awo, nek i di yet agbing ni in shara. Kawɛy yet kanaan ki in ramin ishara ifɛ̀ itek! 17 Ki in fi shara ni kushim in, ke ma ba di nɔk izang hom; awɛt nek ba di te mo gbing; in tsin ra kutomong fɛ́ ba di won e. 18 Wat akyɛ de i yet izang hom ɛ? Izang hom se ane: ayɛt ishara ifɛ̀ itek in, won ni in nesek ide ninang. Kɔn in bi ras kutomong ni irèn fi in bɛ̀ ayɛt ishara ifɛ̀ itek e awo.

19 Ngma ni kusot ice hom fi in se ne, in sas ice hom tɛ asam na akaangan, nek in sɛ in di kɔrɔk banet hwyɛt. 20 Sak ne baYahuda, in sot tɛ ibá, nek in di sɔ nhwyɛ bá. Sak ne bayɔng fɛ́ ba di kuus Ntsi, in sot tɛ ayɔng fɛ́ a di kuus Ntsi (ngma fi da imi di kuus Ntsi awo), nek in di kɔrɔk nhwyɛ bafi ntsi. 21 Sak ne bayɔng fɛ́ da ba bi ntsi awo, in sot tɛ ayɔng fɛ́ da a bi ntsi awo (ngma fi da imi se amatse ni ntsi Adakunom awo, imi kuus ntsi Anet-Isheshek), nek in di kɔrɔk nhwyɛ bá. 22 Sak ne bayɔng fɛ́ ba se vit agap, in sot ti iba, nek in di sɔ nhwyɛ bá. Imi sot kaakyɛ sak ne banet ngma, nɔng na kaakyi irèn in di sheshek bakak. 23 In nye ngma nkyɔrɔk yɔng, nek iya kashon ishara ifɛ̀ itek, nɔng in di sɛ kanu kanaan ayɛt awɛng e.

24 Iyin rēn yin fok ayɛt kuro itsi, ngma ba ba tumung i tsi me, awɛt anet azining wu kyɛk fɛ́ a sɛ kunang e awɛ? Nek anɔng, teng yin i tsi me ni irèn fi i di ki sɛ yin kunang e.

25 Ngma bayɔng fɛ́ ba da ka ba mara ni iro, ba te ice bá ntsi agap. Ba nye anɔng nek isɛ kunang fi da ku shɔɔm awo, awɛt iyit nye yit ifiit nek isɛs kunang fi ku shɔɔm ayɛ ne ayɛ. 26 Nek anɔng imi teng i tsi hom tɛ anet fɛ́ a teng shaam awo; Imi kɔrɔng tɛ anet fɛ́ a tu kuwun awo. 27 Awɛy yo, in tsot kurɔm hom, in sak iko ku sot asam in, nɔng ama fi in mi shara sak na bakak, imi ice hom ba bi di ro ni isɛ izang awo.