1 Kufumung kang ne ni imi aBulus, ayɔng fɛ́ Adakunom di kasa ni ishim wu nin sot atom aYeso Kristi, nɛ aruneng yit aSostenes.

2 Sak na bafi ikuus Adakunom fɛ́ ba se na aKorinti, bayɔng fɛ́ ba mi ka ba te jɛrɛ ayɛt Anet-Isheshek aYeso, ba mi ka ba yes nek kusot aJɛrɛ, ngma nɛ bayɔng fɛ́ ba yes iyerek aTisa yit aYeso Kristi kaakyɛ, tɛ aTisa bá nɛ afiit.

3 Won itek ni kukyang fi ku nes na Ada yit Adakunom nɛ aTisa aYeso Kristi ni ku sot kufiin.

4 In nesek Adakunom ifeng kaakyi izen nek itek wu fɛ́ a ki nesek yin ayɛt Anet-Isheshek aYeso. 5 Nek kusot yin ayɛt wu, i mi te yin barum na kaakyi irèn, ayɛt icɛɛt ni irērēn nkyɔrɔk. 6 Nek ikyɛng fi in cɛɛt yit naton Anet-Isheshek mi shining nek iyin. 7 Nek anɔng, vit kunang abik fi ku se vit ni yin, ni tsin tang yin ayisi itot yin kubɛ́ aTisa yit aYeso Kristi. 8 Iwu da ki bereng yin gakgak sak ni igang e, nɔng i bi se yin vit inɛn atuk ibɛ́ aTisa yit aYeso Kristi. 9 Adakunom fɛ́ a ki yes yin ayɛt kusot ifiri ne Arim wu aYeso Kristi aTisa yit, yet afi ishining ifɛ̀.

10 Ábaruneng, in tsin ra won ni yin ayɛt iyerek aTisa yit aYeso Kristi fok, won ngma yin ni sot yin bazining, kɔng ikaba bi se nate yin, nɔng i da sot yin ayɛt imoon ice gyatgyat, ni foos yin ni yiring yin ikyɛng izining. 11 Ábaruneng, bafɛ́ ari aKolowe mi di tak fok, ifa mi nɔ nate yin. 12 Ikyɛng de fi in di cɛɛt; akak nye, <<Imi kuus aBulus>>, nɛ akak nye, <<Imi kuus Apolos>>, nɛ akak nye, <<Imi kuus aKefas>>, nɛ akak nye bà, <<Imi kuus Anet-Isheshek.>>

13 Ba kaba Anet-Isheshek yɛ? Ba kin tekak aBulus nek iyin ɛ? Kɛ ba kin ki ra yin abatisma ni iyerek aBulus ɛ? 14 In bi ifeng nek imi ra akak yin abatisma awo, tit aKirispus nɛ aGayus kyɛk, 15 nek anɔng, vit akak yin fɛ́ a da fɛ̀ fok ba kin ku ra abatisma ni iyerek hom. 16 (Ey! In kin ti in ra bafɛ́ ari aIstifanus abatisma bà, ama anɔng, in da kyem in ti yiring ke in mang ra akak abatisma awo.) 17 Nek da Anet-Isheshek di tom ni imɛsɛng nek iras abatisma kyɛk awo, igbat e yet ni ishara ifɛ̀ itek, da ni kutsitsɛng banet awe awo, kɔng itekak Anet-Isheshek bi sot vit agap.

18 Ifɛ̀ itekak Anet-Isheshek yet ifɛ̀ abap sak na bayɔng fɛ́ ba tsin wɛɛs, awɛt sak ni yit fɛ́ ba tsin ki sheshek yit, iyet agap Adakunom. 19 Nek i se ni jɛk ye,

<<In da beseng kutsitsɛng,

bafi kutsitsɛng;

In da nyɔrɔk irēn,

bafi irēn.>>

20 Afi kutsitsɛng e se kyɛ? Agwɔm irēn e se kyɛ? Bágwɔm irērēn nkyɔrɔk ayɛ nang e se kyɛ? Adakunom mi te kutsitsɛng azatse sot ishɔp awɛ? 21 Nek ayɛt kutsitsɛng Adakunom, a di fok da kazatse da kyem ka ku rēn ni ikyɛng fɛ́ ka yes kutsitsɛng awo, nek anɔng, Adakunom ayɛt ite iyɛ wu, a sheshek ngma bayɔng fɛ́ ba nɔɔk atsak, ngma ni kucɛɛt fɛ́ ba nye fok, <<Ishara ifɛ̀ me yet kucɛɛt abap.>> 22 BaYahuda tsɛsɛk ntomong abes, nɛ BaGirik tsɛsɛk kutsitsɛng, 23 awɛt iyit, shara yit ifɛ̀ itekak Anet-Isheshek ni kum; ifɛ́ fi i yet ikyɛng itu atak na baYahuda, i yet kucɛɛt abap na BaGirik, i yet agap ni kutsitsɛng Anet-Isheshek. 24 Awɛt bayɔng fɛ́ Adakunom mi ka ba yes, kɛ na ba yet baYahuda, kɛ bafɛ́ BaGirik ayi, ifɛ̀ me yet Anet-Isheshek, iwu wu a yet ízɔk ni kutsitsɛng Adakunom. 25 Nek ishɔp Adakunom wat ikyɛng fɛ́ banet yes fok kutsitsɛng, ni kugbɛrɛk Adakunom wat ikyɛng fɛ́ banet yes fok agap.

26 Ábaruneng, yiring yin kuri banet fi i kin yet yin ni izen fɛ́ Adakunom kin ki yes yin. Batsitsɛng kin se dot ayɛt yin ni imaas banet awo; bafi itak ni ifok kin se dot awo; nnon barum kin se dot awo. 27 Awɛt Adakunom kasa ashɔbɔsh nkyɔrɔk azatse nɔng a di te batsitsɛng nsum; Adakunom kasa nkyɔrɔk fɛ́ kazatse fɛ́ in se vit agap, nɔng a di te bafɛ́ agap nsum. 28 Adakunom kasa nkyɔrɔk kazatse fi in dung rat, fɛ́ ba byɛs ina, fok da in kyem ikyikak awo, a di ra kutomong, nɔng a di buruk kuyiring banet, 29 kɔn anet akak bi tsot kugwɔm nanu ashon wu. 30 Ayet nek Adakunom wu fi iyin di se yin ayɛt Anet-Isheshek aYeso, iwu fɛ́ a mi ki sot yit kutsitsɛng fi ku ne na Adakunom, ayɛt wu in mi sot yit tabat, in mi te yit Jɛrɛ, ba mi ki bisik yit washak ashon Adakunom. 31 Nek anɔng, i se ni jɛk ye, <<Won ngma ayɔng fɛ́ a da nye kukaa, na a nye iko ayɛt aTisa.>>