1 Ncɛɛt ma fo pɔk nate yin fok, ba sɛ kujang kuri kuyɔng fɛ́ da bafi nhwyi da kyem ba ra awo: Anet na a sot na abin atek. 2 Ngma na anɔng, ni di tsot yin kukaa! Ise gyat ke kafa kawe mi ki shining yin awɛ? Ki i wobok yin anet fɛ́ a nye nggɔn yɔng nate yin awɛ? 3 Ngma ne fi da in se gung ni yin ni rɔm awo, in se ni yin ne abik, imi mi tsɛɛt ishɔt naton anet fɛ́ a nye ikyɛng dɔng ti in se azɔng ni iyin. 4 Ki i nyim yin ni iyerek aTisa yit aYeso, imi da se gung ni yin ayɛt abik, kukyem aTisa yit aYeso fi ku se ni yin, 5 nabak yin anet e yong na aShetan, nɔng ba bin wey ni nse irɔm fi in se ni wu, nɔng kutset wu bi di sɛ isheshek ni kunom fɛ́ aTisa bi bɛ́s wu.

6 Kukaa fi i nye yin se gyat awo. Iyin rēn yin fok ka gyebet ayist sak mkpe akpam ngma kusum mos awɛ? 7 Tun yin ayist azen afi inɛn yɔng, nɔng i da sot yin akpam afas, ti i di yet yin. Nek ba mi nabak ashosh kitsamang ishorosho yit, Anet-Isheshek. 8 Nek anɔng, won in ya yit kashon ni ne amok aPasova me, dang akpam ayist, fɛ́ a yet ayist anyas nɛ imaan e, tit ni ya yit ne akpam vit ayist, fɛ́ a yet akpam atsak naton atsak.

9 In ki jɛk yin e ni kufumung hom fok, ikikak bi ki moon yin ne bafi kujang awo. 10 Da in tsin cɛɛt naton banet azatse kang fɛ́ ba ras kujang awo, kɛ bafi kuhwye, kɛ bafi imɔɔt banet, kɛ bafi ikuus nabannom awo. Nek idɔng da tonong fok i da won yin kazatse yong. 11 Awɛt yɔkɔnɔng in tsin ki jɛk yin ne fok da ikikak bi ki moon yin ne ayɔng fɛ́ a nye fok iwu yet afi ikuus awɛt na ras kujang, ni kuhwye, na ya nabannom ntong, na ras itok, na sɔs kutsit, kɛ na mɔɔt banet ayi. Anet kuri ayɔng, kuyak bi ki moon yin ni wu awo.

12 Akyɛ hom di se ni in ras bayɔng fɛ́ ba se amatse bafi ikuus ishɔt ɛ? Bayɔng fɛ́ ba se ayɛt e ba fi iyin da ka ba ras yin ishɔt awɛ? 13 Adakunom wu a bi ra bafɛ́ amatse ishɔt. <<Tun aduk anet yɔng fɛ́ a se nate yin.>>