1 Mɛɛs yin ni imi, kyɔn ti imi mɛɛs na Anet-Isheshek.

2 In ki tere yin ni kuyiring fi i nye yin naton in na akaakyɛ ikyɛng, ni ikuus nggɔn fi in ki nabak yin e.

3 Ama anɔng, in shim ni rēn yin fok, ice anet amatek yet Anet-Isheshek, ice abining yet amatek, ice Anet-Isheshek yet Adakunom. 4 Ngma anet amatek fɛ́ a ras awon kɛ a taas ibes ni ice wu ni hwyɛn, a byɛs akɔk-ashon wu. 5 Ngma abining fɛ́ a ras awon kɛ a taas ibes ni ice wu ni itarak, a byɛs akɔk-ashon wu, a se kpaf te abining fɛ́ akot na akwey ice wu. 6 Ke abining won dang hwyɛn ice wu, won na a sak ba ku akot ice me. Awɛt ki iyet ikyɛng nsum abining na a sak ba ku kot ice ke na ba kot ide ayi, won na hwyɛn ice wu. 7 I se gyat anet amatek na hwyɛn ice wu awo, nek iwu wu a yet nawu ni ízɔk Adakunom. Awɛt anet abining wu a yet ízɔk anet amatek. 8 Nek ba tun anet amatek ayɛt abining awo, tit abining wu a ne ayɛt anet amatek, 9 da ba nye anet amatek nek abining awo, tit abining nek anet amatek. 10 Nek anɔng, i se gyat abining na hwyɛn ice wu, nɔng i bin tonong a se bɛɛt ni ice amatek nek batomaza.

11 Ngma ne anɔng, ayɛt aTisa, anet abining se zɛɛt ne anet amatek awo, anet amatek se zɛɛt ne abining awo. 12 Nek kyɔn tɛ fɛ́ abining ne ayɛt anet amatek, anɔng wu fɛ́ anet amatek di ne ayɛt abining bà. Awɛt kaakyɛ ne na Adakunom. 13 Iyin yɛrɛk yin ice yin: i se gyat abining na a ra awon sak na Adakunom ni ice ni itarak ɛ? 14 Nggɔn kusot azatse ice ko ki tees yin fok ke anet amatek bɛ́ akwey ice asɔp, a yet ikyɛng nsum ni wu, 15 awɛt ke anet abining bɛ̀ akwey ice asɔp, a ku yet ikyɛng njik. Nek ba ku nɔɔk akwey ice asɔp, nek a kana hwyɛn mo. 16 Ke akak shim a kana kɔk ni kucɛɛt kang, iyit rēn yit nggɔn nkak awo, ngma ni itusung bafi ikuus Adakunom.

17 Naton nkyɔrɔk na fi in fɛ́ ni nye yin, vit itere fi in da ki nye yin ne, nek itusung yin bang beseng nkyɔrɔk aza inye me. 18 Ni imɛsɛng e, in foos fok, ki i nyim yin tɛ bafi ikuus, i kana kabasa yin, in di ti in nɔɔk atsak ni kucɛɛt e. 19 Ey, i se gbing-gbing na ba sɛ ikaba nate yin, mok ba di rēn bangan wu kubɔk Adakunom se ni ba yɛ? 20 Izen fi i kana tusung yin, a sot nayak aTisa wu fi i ya yin awo, 21 nek ni izen iyak e, kaangan a ya kashon ni kuyak wu vit itosok bafidang. Akak di wey ni nzong, na akak sɔ, na feng. 22 Iyin bɛ̀ yin nasa fi i di ki yas yin ni sɔs yin awɛ? Kɛ i shim ibyɛs yin bafi ikuus Adakunom, ni di tes yin bayɔng fɛ́ ba se vit ikyɛng nsum ɛ? Akyɛ fi in da ki tak yin ɛ? In ki tere yin nek ikyɛng fi iras yin ɛ? Ko ni kuro!

23 Nek imi shan na aTisa ikyɛng fi in ki nɔɔk yin: ATisa aYeso, natuk e yɔng fɛ́ ba ku rɛp, a sok akpam e, 24 ama fɛ́ a mi di tonong ifeng, a bushung iwu, a fɛ̀, <<Kurɔm hom kang, fɛ́ ba nɔɔk nek iyin; ras yin anɔng ni di yiring yin ni imi.>> 25 Kpaf anɔng bà, ama kuyak e, a sok katsereng izɔɔn e, a fɛ̀, <<Kakereng isɔ yong yet kushi kufas fɛ́ ba nye na nasok hom; ras yin anɔng, ngma izen fi i tsin sɔ yin e, ni di yiring yin ni imi.>> 26 Nek ngma izen fi i ya yin akpam e yong, i sɔ yin na katsereng isɔ yong, ni shara yin ifɛ̀ iku wu sak izen kubɛ́ wu.

27 Nek anɔng, ngma ayɔng fɛ́ a ya akpam me, kɛ a sɔ ayɛt aridɛ aTisa ayɛt irèn fi da i se gyat awo, a ra inɛn sak ni kurɔm nɛ nasok aTisa me. 28 Won anet na a tun maas ice wu ninyɛn, a da ne a ya akpam e, na ma sɔ ayɛt aridɛ me. 29 Nek ngma ayɔng fɛ́ a ya, a sɔ, vit iyiring fok kurɔm aTisa yɔng, a tsin ya na sɔ ishɔt ni ice wu yɔng. 30 Nek anɔng wu banet dot ayɛt yin di se gbɛrɛk, ni nrɔk, bakak yin mi di kus. 31 Awɛt ki in mas yit ace yit e gyam, in da kpa yit ni ishɔt awo. 32 Ke aTisa ki ras yit ishɔt, ba tsin ki tabak yit yɔng, kɔn ishɔt bi ki ya yit gung ne kazatse.

33 Nek anɔng, ábaruneng, izen fi i ka na tusung yin nek iya nayak aTisa, tosok yin bafidang. 34 Ke akak yin foos nzong, won na yas ari, nɔng izen fi i ka na tusung yin, itusung e bi ki kɔrɔk yin ishɔt awo.

Won ki in bɛ́, in bi ki tak yin ikyɛng ira.