1 Ki in fi in kyɛm in cɛɛt ni ilem banet nɛ bafɛ́ batomaza, awɛt vit imi ni ishim, in sot in se ti kutsɔm fi kuwɔng, kɛ tɛ ibing fi iwɔng kyɛk. 2 Ki in fi in bɛ̀ ngma nnang itaas abes, kɛ ngma irēn nkyɔrɔk inɛt, kɛ ngma irēn nkyɔrɔk ayi, kɛ i bi inɔɔk atsak fi i da kyem i serek ahwyanang, awɛt da in bi ishim awo, in sot ikyi ikak awo. 3 Ki in sok ngma ikyɛng fi in bɛ̀ in nɔɔk bakan, in ti nɔɔk kurɔm hom na ba shosh ni irong, awɛt vit imi ni ishim, in bi itek ikyi ikak awo.

4 Ishim bɛ̀ akabɔk ni nhwyɛ. Ishim bi ifup awo, i bi itsot kugwɔm kɛ icɛshɛk ice awo. 5 I bɛ́ kugbarak ice awo, i bɛ́ ishim ice awo, i bi namaan ziri awo, i bɛ́ tusung nkyɔrɔk imaan e ni iyɛ awo. 6 Ishim fok nta iras nkyɔrɔk nmaane awo, tit ifoos nta iras atsak. 7 Ishim bi te kawat ni izen mgbang awo, i bi nɔɔk atsak, i bi te iyɛ, i bi kabɔk na kaakyi ikyɛng.

8 Ishim bi igang awo. Awɛt itaas-ibes bi gang, ncɛɛt ni ilem zizɛɛt bi te yuu, irērēn nkyɔrɔk bi gosok. 9 Irēn yit mi shining awo, itaas ibes yit bà mi shining awo. 10 Awɛt izen fi ishining e i bi bɛ́, idɔng fi ishining e awo bi te bit. 11 Ni izen fi in yet nggon, in cɛɛt ti nggon, in yiring ti nggon, in tɔrɔng nkyɔrɔk ti nggon. Awɛt izen fi in sot anet, in wobok nggɔn kuri nfi nnon. 12 Nek yɔkɔnɔng in yɛrɛ yit nawu yit ni ikyɛng iyɛrɛ na se hwyi, awɛt atuk e yɔng in bi yɛrɛ yit ayisi na ayisi. Yɔkɔnɔng irēn hom mi ishining awo, awɛt atuk e yɔng in bi rēn wɛshɛk irēn fɛ́ Adakunom di rēn mo.

13 Yɔkɔnɔng nkyɔrɔk ntaat na in di ki nak; inɔɔk atsak, ni ite iyɛ, ni ishim, awɛt iyɔng fi idung waat yet ishim.