1 BaKorinti 8

Nayak fɛ́ ba nabak nabannom

1 Yɔkɔnɔng, naton kucɛɛt nayak fɛ́ ba nabak inabak-akuce sak ne nabannom: Iyit rēn yin fok ngma yit in bɛ̀ yit irēn. Irēn bɛ́ ni kok ice, awɛt ishim bɛ́ ni inok. 2 Ngma ayɔng fɛ́ a di fok iwu rēn ikyi ikak, idɔng tonong fok a rēn resek dang rēn ikyɛng fi i se yɛɛt na a rēn e. 3 Awɛt ngma ayɔng fɛ́ a shim Adakunom, Adakunom rēn ni iwu.

4 Yɔkɔnɔng naton kucɛɛt iya nayak fɛ́ ba nabak inabak-akuce sak na nabannom e: Iyit rēn yit fok, na azatse ngma kusum, nabannom na yet ikyi ikak awo, in ti rēn yit fok Adakunom yet azining kyɛk, vit akak ama wu. 5 Ngma ne fɛ́ bakak nye fok nabannom di se, kɛ nazanɛn kɛ na azatse ayi (na atsak e, <<nabannom>> e nɛ naban na <<atisa>> me, na di se dot), 6 ngma ne anɔng, iyit rēn yit fok, Adakunom yet azining kyɛk. Iwu wu a yet Ada fi nkyɔrɔk ngma ne ni wu, ni in se yit ni kusot nek iwu. In ti bɛ̀ yit aTisa azining kyɛk, iwu yet aYeso Kristi. I yet ni wu wu fi nkyɔrɔk ngma in ne, ni wu bà fi in di se yit ni kutset.

7 Awɛt da kaangan wu a rēn ne anɔng awo. Sak atut ana, banet bakak fɛ́ ba mi tsang di mɛɛ ni nggɔn ikuus nabannom, nizen fɛ́ ba ya kuri nayak e yɔng, na ba yiring fok ba mi tsang di nye inabak-akuce sak na nabannom e. Nek kuyiring bá rēn yet kufi nnon, ni i ka ba yet kudaam. 8 Awɛt nayak kyem na tse ni yit bakak ne Adakunom awo, na da ki kyɛk yit ikyikak ke na ki barang yit mo awo.

9 Ngma na anɔng, nye yin nhwyɛ kɔng ishim itonoso atsak yin bi sot kuta ikpas sak na bayɔng fɛ́ ba se vit agap awo. 10 Nek ke azining ayɛt bayɔng fɛ́ ba se vit agap da di ngɔn fi ibɛ irēn e ni tsin yas nitu iya nabannom ntong, ngɔn di, i da bang ka ba nɔk agap na ba kpa yas nayak fɛ́ ba nasap-akuce sak na nabannom awɛ? 11 Na anɔng, na aruneng agbɛrɛk yong fɛ́ Anet-Isheshek ku nek iwu, wat na beseng nek irēn ngɔn. 12 Ki inyes yin barunyining anɛn anɔng, ni ka ba sas yin ndaam ayɛt áyɛ bá fɛ́ a se vit agap, aKristi wu fi i tsin ku ras yin inɛn. 13 Nek anɔng, ki ikyɛng fi in da ya, da sak aruneng na a kpa ni inɛn, i da tin ya inam awo, kɔng in bi ku sak na kpa.