1 Nek iyit rēn yit fok ke ba fo kutɔmɔng* kang fi in di sosok azatse, in bɛ̀ yit inok ikak narɔ Adakunom, kari fɛ́ da ba nok ika ni mbɔk awo, kari azanɛn fɛ́ ka sot ayɛ na ayɛ. 2 Nek in woso tsɛt yit kutɔmɔng ku kang ni rus, a ki se yit ki in mi nɔ yit ari yit ka fɛ́ azanɛn, 3 nek ke ba ki te yit ika, in bi tin sot yit kpiip awo. 4 Nek ni in rēn resek mo ni itɔmɔng ku kang, in woso rus yit ni kunanang. Ayet fok in shim na ba ki kam yit ni kurɔm azatse me awo tit nek in shim ba ki ki fam yit ni kukpin azanɛn, nɔng idɔng fi i yet ifi kutset bin ngɔnɔng idɔng fi i yet ifi iku. 5 Adakunom ice wu fɛ́ a mi ki nye yit nek ishesheng e yɔng, a mi ki nɔɔk yit Kabik wu fɛ ka yet ite nagang wu fɛ́ a ki yit yit mo sak ni ikyɛng fi ida bɛ ashon.

6 Nek anɔng, in bɛ̀ yit agap iyɛ, in rēn yit fok ni izen fi in rēn se yit ni irɔm azatse kang, in se yit yik-yik na aTisa, 7 nek kutseet yit yet kufi inɔɔk atsak da kufi iyɛrɛ ayisi awo. 8 Ey, in bɛ yit ayɛ ting, nek idung se yɛɛt ni in ka na kam yit ni kurɔm kang, ni in bun yit ari yit azanɛn gung na aTisa yit. 9 Nek anɔng, ke ni in resek mo azatse a, ke ni in mi bun yit azanɛn, nta yit yet ni in ku tɛrɛk yit iyɛ. 10 Nek i se gbing-gbing ngma yit in bi nyeseng yit ashon Anet-Isheshek nek ishɔt. Nɔng kaangan bi shan izang wu kpaf ni kutomong fɛ́ a ra ni kutset kang, ke ni iyet itek a ke imaan e ayi.

11 Yɔkɔnɔng fi in bɛ yit nnyim aTisa, in nye nyɛk yit na banet na ba shan ifɛ̀ yit. Adakunom rēn kaakyɛ naton yit, awon hom yet fok iyin rēn yin anɔng na ayɛ yin bà. 12 Iyit tsin shim in bang tere yit ace yit ashon yin awo tit in shim in ki nɔɔk yin ikyɛng fi i di ki di yin ite nyɛk yit, nɔng i da sɛ yin ikyɛng fi i di ki tak yin bafi tsot ágɔm ni nkyɔrɔk fɛ́ ayisi yɛrɛ da in yɔng fi in se ayɛt ayɛ awo. 13 Ke bakak di tɛ ba mi ki dɔn yit, idɔn e se nek Adakunom, ki in se yit ayɛt nhwyɛ yit, anɔng e se mok iyin. 14 Nek ishim Anet-Isheshek ye i tsin ki kɔk yit, iyit ma sok yit ane na ayɛ yit: Ke anet azining da kyem a ku nek banet kusum, a sot ngma yit in mi ku yit. 15 Iwu ku nek akaangan, nɔng bayɔng fɛ́ ba se ni kutset, ba bi tɛ ba nye kusot ice bà awo tit na ba sot yɔk iwu yɔng fɛ́ aku ba tɛ ba ku donong.

16 Nkum yɔkɔnɔng sak ashon, in da ti mara yit akak ni ikyɛng fɛ́ ayisi yɛrɛ awo. A kin tsang se, iyit kin mara yit Anet-Isheshek na ayisi irɔm, yɔkɔnɔng in tun nye yit anɔng awo. 17 Nek anɔng, ngma anet fɛ́ a se ayɛt Anet-Isheshek, a yet anet afas, nkyɔrɔk nzen mi gosok, di yin nkyɔrɔk nfas mi bɛ̀. 18 Ngma nkyɔrɔk nang ne na Adakunom, iwu fɛ́ a bɛ̀ ni inosong-ashi nate yit ni iwu fi ine ni bɔk Anet-Isheshek. A tɛ a ki nɔɔk yit kutomong isaas banet ne ba ra inosong-ashi ni iwu. 19 Na anɔng wu Adakunom kin di ra inosong-ashi nate wu ne kazatse fi ine na Anet-Isheshek. A rawu dang fa anɛn fɛ́ ba mang ku ra ne, a ki won yit ifɛ́ itonoso banet irèn inosong-ashi me.

20 Nek anɔng, iyit yet yit batom Anet-Isheshek, Adakunom tsin cɛɛt na banet ni ntɔ yit. In tsin ra yit awon ni yin akuce Anet-Isheshek, won yin inosong-ashi ni i se nate yin ne Adakunom. 21 Akuce yit wu fɛ́ Adakunom ku sak a di sot anet inɛn, iwu fɛ́ a ki mang rēn inɛn awo, na anɔng wu, in di se yit tabat ashon Adakunom ayɛt Anet-Isheshek.