1 Kufumung ijɛk kang ne ni imi, aBulus, atom aYeso. Iyes hom ne na banet kɛ anet akak awo, tit na aYeso Kristi nɛ Ada Adakunom, fɛ́ a donong aYeso ni iku, 2 na baruneng fi in se yit gung.

In jɛk yit iko sak na bafi ikuus

fɛ́ ba se na aGalati.

3 Won itek ni kusonong kukyang fi ku nes na Ada yit Adakunom nɛ aTisa aYeso Kristi, ni ku sot kufiin, 4 iwu fɛ́ a nɔɔk ice wu nek anɛn yit, nɔng a bin tun yit mo ni ibɔk kuzam kumaan e kang, kpaf ni ishim Ada nɛ Adakunom yit. 5 Won iratek ni isot ifuu ayɛ na ayɛ. Anɔng.

6 A di te yɔɔt makiyi, fi i mi wat itirik yin ayɔng fɛ́ a ki yes yin nek itek fi ines na Anet-Isheshek, ni tirik yin sak ni ifɛ̀ ikak iduk e, 7 idɔng fi da iyet ifɛ̀ itek awo. I se wɛshɛk fok banet bakak tsin ki boroso yin na ba shim ba ki tes natse ni ifɛ̀ itek ifɛ́ Anet-Isheshek. 8 Awɛt in shim in fɛ̀, ke iyit kɛ na ayɛt atomaza ayi fɛ́ a ne azanɛn, a bɛ́ a ki shara yin ifɛ̀ itek ikak zɛɛt ni idɔng fi iyit man ki shara yin ne, won itsɛɛt ishɔt iku ifi ayɛ na ayɛ ni i ku ya! 9 Kyɔn ti fi in mi di fɛ̀ yit, won in tin bang fɛ̀ ane: kɛ akak tsin tɛ ki shara yin Ifɛ̀ ikak zɛɛt ni idɔng fi i mi shan yin, won itsɛɛt ishɔt iku ifi ayɛ na ayɛ ni i ku ya!

10 In tsin tsɛt ikɔrɔk nhwyɛ banet a, kɛ in kɔrɔk nhwyɛ Adakunom ɛ? Ke iyin di yin fok, in tsin shim in tɛrɛk banet iyɛ yɛ? Ki in fi in rēn shim in tɛrɛk banet iyɛ, ki in yet asam Anet-Isheshek awo.

11 Ábaruneng, imi shim ni i rēn yin fok, ifɛ̀ itek fi in shara, yet idɔng fɛ́ anet awe nye awo. 12 Imi shan ifɛ̀ me na anet akak awo, kɛ akak wu a di tees ide awo, tit aYeso Kristi ice wu fɛ́ a di tonong ide.

13 Nek iyin man fok yin kusot fi in nye ayame ni nggɔn baYahuda, ni kuri izoot fi in nesek bafi ikuus Adakunom makiyi, fi in tsɛt in fuut iye. 14 In tsang ya kashon ni nggɔn baYahuda aza bafi kuzam hom, in bi iyɛ ingash ni rosok amok badakop yit makiyi. 15 Awɛt ni izen fɛ́ Adakunom, iwu fɛ́ a di kasa neme ni ites hom, a di yes nek itek wu, ayɛt ishim wu, 16 a di tonong Ari wu, nɔng in da shara ifɛ̀ wu ayɛt Ícɛn-iduk, imi tsin in tɔ na anet akak awo. 17 Kɛ in ngarak sak ni aRushelima nek in tsin di bayɔng fɛ́ ba tsang sot batom-aYeso ashon in awo, tit in di berem sak na Arabiya in da ni in bun na aDamaskos.

18 Ama ayɛ ataat, in ngarak sak na aRushelima nɔng in bin rēn aBitrus, in sot azɔng ni iwu nkɔs kusɔk abe toon. 19 In di akak ayɛt batom-aYeso me awo tit aYakubu aruneng aTisa yit. 20 Won in ki tak yin ashon Adakunom fok, ikyɛng fi in tsin ki jɛk yin ne yet mbɔɔs awo. 21 Ama anɔng, in tse na aSiriya nɛ aKilikiya. 22 Ni izen e yɔng, imi ice hom vit anet fɛ́ a di rēn ayɛt bafi ikuus Anet-Isheshek fɛ́ ba se ni mben aJudiya. 23 Ikyɛng fɛ́ ba foos kyɛk yet: <<Anet yɔng fɛ́ a tsang ki nesek yit mgbang, a se ni ishara inɔɔk atsak fɛ́ a tsɛt ifuut e.>> 24 Ba tere Adakunom nek imi.