1 <<Nek igwɔm azanɛn se tɛ atek ikɔ akak fɛ́ a wuruk bop nadiding, a tsɛ tsɛt banet itomong itsɔm, na ba tsɛ ba ra kutomong ni ikɔ anap wu. 2 Ni izen fɛ́ a sɛ banet e, ba ra ijik naton ikyɛng fɛ́ a da ka ba tarang, kaakyɛ anet da woso naton adinari azining, wɛt a ka ba yirik na ba tsɛ ba ra kutomong ni ikɔ wu me.

3 <<Ni itsɔm bɔk agyɛng azining, a tɛ wuruk amatse, a tsɛ a sɛ banet bakak narɔ ijik ni nyeseng vit ikyɛng ira. 4 A fɛ̀ ni iba, <Iyin, tsi ra yin kutomong ni ikɔ anap hom bà; in da ki tarang yin ikyɛng fi i se kpaf.> 5 Ba fɛ̀ ey, ba yit irèn ba tseng.

<<A tɛ wuruk ni ikaba kunom, nɛ ni itsɔm itaat ifɛ́ ahwyɛ, a tɛ nye kpaf anɔng. 6 Ni itsɔm bɔk itoon ifɛ́ ahwyɛ, a tɛ wuruk a tsɛ a sɛ bakak ni nyeseng kyɛk. A ka ba rip, <Akyɛ sak fi iyin woso yin azeng ni nyeseng vit ikyɛng ira yɛ?>

7 <<Wat iba fɛ̀ ni iwu, <Vit ayɔng fɛ́ a mi bɛ́ a ki sok yit ni itomong.> A fɛ̀ ni iba, <Iyin, tseng yin tsi ra yin kutomong ni ikɔ anap hom bà.>

8 <<Ni izen fɛ́ kahwyɛ nye, atek ikɔ me fɛ̀ na anet iyɛrɛ bafi itomong e, <Yes banet fɛ́ ba ra kutomong ni ikɔ me. Ka ba tarang, tumung na bafɛ́ ama sak na bafɛ́ ashon.>

9 <<Banet itomong fɛ́ ba ka ba sok ni itsɔm bɔk itoon ifɛ́ ahwyɛ, kaangan ba shan adinari azining. 10 Ni izen fɛ́ bayɔng fɛ́ ba tung ka ba sok nadiding bɛ́, ba yes gyan ifuu bá da wat ifɛ́ bafidang. Wat ba tarang kaangan ayɛt ba adinari azining bà. 11 Ama fɛ́ ba shan itsɔm e, ba kpa ngɔɔt nanu sak na atek ikɔ me. 12 Na ba nye, <Di, banet bang fi i ka ba sok nama, fɛ́ ba ra kutomong irus itsɔm bɔk izining kyɛk, ngɔn ka ba tarang kpaf ni iyit, iyit fi in bɔrɔng yit ni kutomong, ánom tɛ a di gang ni yit.>

13 <<Awɛt a fɛ̀ na azining ba, <Afidang hom, vit imaane fi in ki nye yin e. Ngɔn fɛ̀ ey fok i da woso naton adinari azining awɛ? 14 Shan itsɔm itomong ngɔn, da yit irèn. Ayet kushim in ni in nɔɔk anet fi in ku sok ni igang e kpaf ikyɛng fi in da ku nɔɔk. 15 Imi kyem fi in da nye ikyɛng fi iyɛ hom shim, ni itsɔm hom awɛ? Ke ngɔn nye ifup fok nek in bɛ̀ kubɔk washak ɛ?>

16 <<I se anɔng, bafi imɛsɛng e, bi bun bafɛ́ ama, bafɛ́ ama bi bun bafɛ́ ashon.>>

17 Ni izen fɛ́ aYeso se ni kutseet sak ne aRushelima, a kɔrɔk bafi imɛɛs wu kusɔk abe afaa me ni ifam, a fɛ̀ ni iba, 18 <<Fok yin, iyit yɔng in tseng yit sak ni aRushelima, narɔ fɛ́ ba da nabak Arim Anet ni bɔk bagbat áware nɛ bafi itees ntsi aMusa. Iba da ku tsɛɛt ishɔt iku; 19 ama anɔng, ba bi ku nabak ni bɔk Ícɛn-iduk, nɔng ba da ku tonong ibyɛs, nɔng ba da ku hwyereng, nɔng ba da ku tegak ni ikum. Ni kunom kufɛ́ ataat, ba bi ku donong ni kutset.>>

20 Ama anɔng, nggɔ nnon aZebedi tsɛ a aYeso, iwu ni nnon wu. A sak akut ashon wu, a tsɛt aYeso na a ku ra ikyikak.

21 AYeso ku rip yɛ, <<Akyɛ fi ngɔn tsɛt ɛ?>>

Abining e fɛ̀ ni iwu, <<Ikyɛng fi in shim yet, kazining ayɛt nnon in na ka sonong ni bɔk iyak ngɔn, kakak ni bɔk imen ngɔn ayɛt igwɔm ngɔn.>>

22 Wat aYeso fɛ̀ ni iba, <<Iyin rēn yin ikyɛng fi i tsin ra yin awon e awo, iyin da kyem i sɔ yin ayɛt aridɛ fi in da sɔ yɛ?>>

Ba fɛ̀, <<In da kyem yit.>>

23 AYeso fɛ̀ ni iba, <<I se gbing i da sɔ yin ayɛt aridɛ hom, awɛt ifi sonong ni yak ke ni men ayi, idɔng yet inaan awo. Ada hom wu a bi bɛ́ a nesek narɔ sak na bayɔng fɛ́ a mi tsang sak nek iba.>>

24 Fi ishɛrɛp bafi imɛɛs kusɔk e fok anɔng, iyɛ ba beseng nɛ baruneng bafaa me. 25 Wat aYeso ka ba yes ngma ba, a fɛ̀ ni ba, <<Iyin rēn yin fok bayɔng fɛ́ ba ya igwɔm naton bafi nhwyi, ba mɔɔt banet bá, bazɔk bá, tonoso kukyem naton banet e. 26 Awɛt, i da se anɔng ni iyin awo. Ke akak ayɛt yin shim a sot aratek nate yin, i se gbing-gbing na a sot anet itomong bafidang. 27 Ngma ayɔng fɛ́ a shim a sot afi imɛsɛng e, i se gbing-gbing na a sot asam bafidang. 28 Kpaf kyɔn tɛ Arim Anet bɛ́ azatse, da nek ba ku ra isam awo tit iwu na a ra isam, na a nɔɔk kutset wu nek ibisik banet dot.>>

29 Ni izen fɛ́ aYeso nɛ bafi imɛɛs wu tsin won aJeriko, kudyɛng banet ku kuus mo. 30 Bakpatɔn bafaa kin se ni ifam irèn. Fɛ́ ba fok yɛ aYeso se ni igot, ba ta kutɔ na agap yɛ, <<ATisa*, Arim agwɔm aDauda! Fok angmishish yit!>>

31 Kudyɛng banet e ka ba kɔn, ba fɛ̀ ni iba, na ba te yuu. Wat iba bang fɛrɛng nya-nyat, yɛ, <<ATisa, Arim agwɔm aDauda, fok angmishish yit!>>

32 AYeso nyeseng, a ka ba yes, a ka ba rip yɛ, <<Akyɛ fi iyin shim yin, in ki nye yin ne yɛ?>>

33 Iba fɛ̀ ni wu, <<ATisa, iyit shim yit, ayisi yit na a tɛ a yɛrɛ.>>

34 AYeso fok angmishish ba, wɛt a ra ayisi bá. Ni izen izining, ba kpa yɛrɛ, ba wat ba kpa ku kuus mo.