1 <<Ni izen e yɔng, igwɔm azanɛn bi se ane: Nanamang nakak kusɔk, fɛ́ na sok agaramun na, na tse ishan amatek agol. 2 Batoon ayɛt ba yet áshɔp e nɛ batoon batsitsɛng e. 3 Áshɔp átoon e, sok agaramun bá, vit dang bereng name fɛ́ ba di ki barang. 4 Wat batsitsɛng e, berese agaramun bá name na atsung name bà. 5 Amatek agol e, a sok izen ishɔp dang bɛ́, ngma ba nda ka ba yisik, ba men nda.

6 <<Nasamang a te tuk, ba fok iyes fok, <Amatek agol e yong a wuruk! Bi ku shan yin!>

7 <<Wat ngma nanamang kusɔk e, dorok ni nda, ba di barasa nrong agaramun bá. 8 Áshɔp átoon e, fɛ̀ na batsitsɛng e, <Ki nang yit name yin, nek agaramun yit, tseng sak ikus.>

9 <<Ba ka ba bun ni ifɛ̀ yɛ, <Awɛy, na da ki kyem yit ngma ni iyin awo. Tseng yin sak na bayɔng fɛ́ ba rɛs name me, nɔng i da bin shan yin na fiin.>

10 <<Na anɔng wu, fɛ́ áshɔp ánamang e, di berem narɔ ishan name me. Wat ama fɛ́ ba mi tseng, amatek agol e bɛ́ a ta. Nanamang natoon fɛ́ na mi ka na nye, nɔ gung ni iwu sak narɔ fɛ́ ba mi nye nek amok e, ba ma fam katitu.

11 <<Ama anɔng, áshɔp ánamang e, bɛ́s na, ba fɛ̀ ni iwu, <Atekari! Atekari! Ki tarak yit katitu!>

12 <<Awɛt iwu fɛ̀ ni iba, <Atsak fi in tsin ki tak yin, Imi ki irēn yin awo.> >>

13 Nek anɔng, aYeso gang ifɛ̀ wu yɛ, <<Kana nye yin kaaki izen, nek da i irēn yin kunom e ki izen e awo.

14 <<Igwɔm azanɛn bi se tɛ ane: anet akak bɛ̀ kutseet ashon wu, wɛt a yes basam wu, a ka ba kaba kurúm wu. 15 A nɔɔk azining atalen atoon*, a nɔɔk anet afɛ́ afaa me atalen afaa, anet afɛ́ ataat, a ku nɔɔk izining, a nɔɔk kaangan kpaf na agap wu. Ama anɔng, a nye kutseet wu me. 16 Anet yɔng fɛ́ a shan atalen atoon e, wat a kpa tirisi ina ni ijik, a sɛ ibarang akak atoon naton na. 17 Kpaf anɔng, fɛ́ anet atalen afaa, di sɛ ibarang akak afaa. 18 Awɛt anet fɛ́ ba ku nɔɔk izining e, a tsɛ a ta ibong aben, a di nɛt atalen atekari wu me.

19 <<Ama izen isɔp, atekari basam e, bɛ́s wu, a fɛ̀ ni iba, na ba ku tak ikyɛng fɛ́ ba di nye na atalen wu. 20 Anet fɛ́ ba ku nɔɔk atalen atoon e, bɛ́ na akak atoon. A fɛ̀, <Atekari, ngɔn kin di nɔɔk atalen atoon, di, in mi di sɛ ibarang atoon.>

21 <<Atekari wu, fɛ̀ ni iwu, <Show! Ngɔn yet asam atek fɛ́ anet di ki te iyɛ! Ngɔn mi tonong atsak ni ikyɛng ibaane; Imi da ka nɔɔk iratek naton ikyɛng igbat e. Nɔ i da fɔɔn ni iyɛ ikan aze ni imi!>

22 <<Anet fɛ́ ba ku nɔɔk atalen afaa, bɛ́ na akak afaa. A fɛ̀, <Atekari, ngɔn kin di nɔɔk atalen afaa, di, in mi di sɛ ibarang afaa.>

23 <<Atekari wu, fɛ̀ ni iwu, <Show! Ngɔn yet asam atek fɛ́ anet di ki te iyɛ! Ngɔn mi tonong atsak ni ikyɛng ibaane, imi da ka nɔɔk iratek naton ikyɛng igbat e. Nɔ i da fɔɔn ni iyɛ ikan aze ni imi!>

24 <<Wat anet yɔng fɛ́ ba kin ku nɔɔk atalen azining e, a bɛ́, a fɛ̀, <Atekari, imi irēn nse ngɔn se gadiring, i tsɛk narɔ fi da ngɔn di tuus awo, itusung narɔ fi da ngɔn di waat awo. 25 Nek anɔng, imi fok nnyim, in tsin in da nɛt atalen ngɔn ni ibong. Nga ikyɛng ngɔn de.>

26 <<Atekari wu, fɛ̀ ni iwu, <Ngɔn aduk asam arut! Ɔɔ ngɔn irēn fok imi tsɛk narɔ fi da imi di tuus awo, ni in tusung narɔ fi da imi di waat ija awɛ? 27 Ey ya! Ki i se anɔng, ki ngɔn tsi i di sak atalen hom ni imyɛ itsɔm, nɔng imi bi fi in bɛ́s yin, ni in tsin shan ide ni ibarang naton e.>

28 <<Ama anɔng, atekari me fɛ́rɛ́ng na basam wu, <Shan yin atalen e ni bɔk wu, nɔɔk yin anet yɔng fɛ́ a bɛ̀ atalen kusɔk e. 29 Nek ngma ayɔng fɛ́ a bɛ̀, ba bi ku barang mo, nɔng a da bin sɛ shɛrɛk, wɛt ayɔng fɛ́ a se vit ikyɛng, igyet e dɔng fɛ́ a bɛ̀, ba da shan ide ni wu. 30 Tekap yin kufunam yɔng, barak yin amaan ayɛt ahwyi, narɔ fɛ́ a da ya ának, na ros anyi.>

31 <<Ni izen fɛ Arim Anet bi bɛ́, ayɛt ízɔk wu, nɛ batomaza ngma kusum, ni izen e yɔng wu, a bi sonong ni kuta igwɔm ízɔk wu. 32 Ngma icen azatse bi kana tusung ashon wu, iwu bi kaba banet kyɔn tɛ anet ija di kas ibon itsamang ni ibon iwe. 33 A bi sak itsamang ni bɔk iyak, na sak iwe ni bɔk imen.

34 <<Wat agwɔm e, bi fɛ̀ nɛ bayɔng fɛ́ ba se ni bɔk iyak wu, <Bɛ́ yin, iyin fɛ́ aDa hom mi ki te yin awɛng; bɛ́ yin, bi nɔ yin ayɛt igwɔm fɛ́ ba mang nye nek iyin, neme ni inye kazatse. 35 Nek imi kin fok nzong, iyin di nɔɔk yin nayak, imi kin fok iyɛ ingash, iyin di nɔɔk yin ashi isɔ, imi bɛ́ itsen, iyin di shan yin nɛ nasa yin. 36 Izen fi in se dang ares ite, iyin di te yin ares. A di rɔ, iyin di fiis yin gyat. In se ari inyang, iyin di bɛ́ yin itsen.>

37 <<Wat bafɛ́ atsak e, bi fɛ̀ ni iwu, <ATisa, akyi izen fi iyit kin da di yit ni nzong, in da nɔɔk yit nayak ɛ? Ki in da di yit ni tsin fok iyɛ ingash ayi, in da nɔɔk yit ashi isɔ yɛ? 38 Na ki izen fi in kin da di yit atsen, in da shan yit sak nɛ nasa yit ɛ? Kɛ in da di yit vit ares, in da nɔɔk yit ares ɛ? 39 Na ki izen fi in kin da di yit ni irɔk, ke ari inyang ayi, in tsin in da fiis yit ɛ?>

40 <<Agwɔm e, bi fɛ̀ ni iba, <Atsak fi in tsin ki tak yin, ngma ikyɛng fi iyin nye yin azining ayɛt bayɔng fɛ́ ba dung rat ayɛt baruneng ba, imi wu fi i di nye yin ne.>

41 <<Wat a bi fɛ̀ na bayɔng fɛ́ ba se ni bɔk imen wu, <Won yin azeng, ámaan ánet! Tseng yin sak ayɛt irong fi ku ya vit igang, fɛ́ ba kin nye nek aShetan nɛ batomaza wu. 42 Nek imi kin fok nzong, iyin rayin dang di nɔɔk yin kuyak. Imi kin fok iyɛ ingash, iyin rayin dang i di nɔɔk yin ashi isɔ. 43 Imi kin bɛ́ itsen, iyin rayin dang di shan yin nɛ nasa yin. Imi se vit ares ite, iyin rayin dang di te yin ares. Imi se ni irɔk nɛ ari inyang, iyin rayin dang ni tsi i di yin.>

44 <<Wat iba bi fɛ̀ ni iwu, <ATisa, na ki izen fi iyit kin da di yit ni nzong kɛ ni iyɛ ingash, kɛ atsen, kɛ vit ares, kɛ ni irɔk, kɛ ari inyang ayi, in rayit dang da sɛ yit mo yɛ?>

45 <<Iwu bi fɛ̀ ni iba, <Atsak fi in tsin ki tak yin, ngma ikyɛng fi i rayin dang nye yin azining ayɛt bayɔng fɛ́ a dung rat, ayɛt ba ba, imi wu fi i rayin dang di nye yin ne.> 46 Nɛ ba ma tseng ni iba, sak narɔ mgbang vit igang, awɛt nɛ ba tseng nɛ bafɛ́ atsak sak ni kutset vit igang.>>