1 Ni izen yɔng, aGbat agwɔm aHiridus fok kucɛɛt fɛ́ banet nye naton aYeso. 2 Wat a fɛ̀ na bafi itomong wu, <<Anet yong da yet aYohana anet abatisma. Ba mi tɛ ba dorok kukom wu! Nek anɔng wu fɛ́ a di bɛ̀ agap iras ntomong abes anɔng.>>

3 Nek aHiridus kin tekap aYohana, a rosom, a ku sak ari inyang, ikyɛng fi i sak a kin nye anɔng yet fok, aHiridus kin sok aHirodiya, abin arunyining aFilibus, 4 nek aYohana woso nye ni iwu yɛ, <<I se yɛɛt fi i sok abin arunyining ni weneng awo!>> 5 AHiridus shim a fɛt aYohana, awɛt a nɛ foos nnyim banet, nek banet sok aYohana yet atan.

6 Atuk fɛ́ aHiridus kin yiring ni kunom ites wu, angas aHirodiya kin to ashon batsen fɛ́ ba kin rini. Nato me kin tɛrɛk aHiridus iyɛ makiyi. 7 Nek anɔng, a nɔɔk angas kanu ngma ni kushi yɛ, a da ku nɔɔk ngma ikyɛng fɛ́ a rip. 8 Nggɔ ka ka ka te kyɛbɛt ni ifɛ̀ fok, na ka fɛ̀, <<Di sak ice aYohana anet abatisma aze ni kube!>> 9 Agbat agwɔm nɔ kudaam, awɛt nek kushi fɛ́ a mi tsang nye, nɛ batsen wu, a nɔɔk kanu fok na ba ka ka nɔɔk ngma ikyɛng fɛ́ ka shim. 10 A sak na ba tsɛ ba tun ice aYohana anet abatisma ari inyang. 11 Ba sok ice me ni kube, ba tsɛ ba nɔɔk kanamang e, ka tsɛ ka nɔɔk anyining. 12 Bafi imɛɛs aYohana anet abatisma, tsɛ ba sok kukum e, ba tsɛ ba nɛt iko. Ama anɔng, ba tsɛ, ba tak aYeso.

13 Ni izen fɛ́ aYeso fok ikyɛng fi i te nɛ aYohana, a nɔ ayɛt kukyɛ ashi, a tat sak ni nyi ku yá, karɔ fɛ́ vit banet azɔng, a tsɛ a sonong aziwu. Ni izen fɛ́ banet fok anɔng, ba wosong nwɔp bá, ba yit irèn sak azɔng na atak. 14 Ni izen fɛ́ aYeso tik ayɛt kukyɛ ashi, a di kudyɛng banet, a fok angmishish bà, a tes bafi nrɔk bá kyang.

15 Fɛ́ kahwyɛ bɛ́ bakat, bafi imɛɛs wu, bɛ́ ba ku sɛ, ba fɛ̀ ni wu, <<Di kunom mi tse, karɔ kang se wiin. Te banet e ni irèn, nɛ ba nɔ na naban wɔp, na ba tsɛ ba tsɛt ice bá ikyɛng iya.>>

16 Wat aYeso fɛ̀ ni iba yɛ, <<I se gbing-gbing na ba tseng awo, iyin ka ba nɔɔk yin ikyɛng iya.>>

17 Ba fɛ̀ ni iwu, <<Vit iyit ni ikikak azeng, nkum ágbang akpam atoon, ni ìzos ifaa kyɛk.>>

18 A fɛ̀ ni iba, <<Bɛ́ yin ni ide aze.>> 19 Wat a fɛ̀ na ba ka ba sas na ba sosok naton agam. A sok ágbang akpam atoon e, ni ìzos ifaa me, a ta ayisi sak azanɛn, a nɔɔk ifeng sak narɔ Adakunom nek ide, a bushung, a nɔɔk bafi imɛɛs wu, na ba kabasa banet e. 20 Banet ngma kusum, ba yas ba hwyas. Ishɛrɛp e tuk, wɛt bafi imɛɛs wu, shining nakɔmɔng kusɔk abe afaa, na fi icɛk e fi i tuk. 21 Kudot banet fɛ́ ba kin yas e, kin se batek wɔɔn ba agup atoon, dang nnon nɛ banyining.

22 Ba tsin gang idɔng, aYeso wat a sak bafi imɛɛs wu, na ba nɔ ayɛt kukyɛ ashi me, na ba tseng ashon wu sak ni nyi ku yá, nɔng iwu da te banet ni irèn. 23 Ama fɛ́ a mi te banet e ni irèn, iwu aziwu a tsɛ a ngarak ni ihwyanang, a ra awon. Kawuwuri ku sɛ azɔng aziwu, 24 ni izen e yɔng, kukyɛ ashi me, mi tsang tseng yik-yik. Ne agbos ashi woso zim kukyɛ ashi me makiyi, nɛ awun ka ba yirik sak ama.

25 Bakat itsɔm itaat ifɛ́ adiding, aYeso tsin tseng naton ashi sak itse narɔ bá. 26 Izen fɛ́ bafi imɛɛs e ku di na tsin tseng naton ashi, nnyim ka ba yit, ba fɛ̀, <<Yɛ afaben!>> Wat iba ta nkun nek nnyim.

27 Wat aYeso wat a fɛrɛng ni iba yɛ, <<Tekap yin ayɛ yin! Imi wu. I bi fok yin nnyim awo!>>

28 Wat aBitrus fɛ̀ ni iwu yɛ, <<ATisa, kɛ a yet ngɔn yɔng, fɛ̀ ni imi, ni in shesh naton ashi in da sɛ.>>

29 A fɛ̀ ni wu, <<Bɛ́.>>

Wat aBitrus wuruk ayɛt kukyɛ ashi me, a kpa tseng naton ashi sak ibɛ narɔ aYeso. 30 Izen fɛ́ a di awun fɛ́ a fɛsɛm nɛ agap, nnyim ku yit, a kpa nye rep. A ta kukun yɛ, <<ATisa, di sheshek!>>

31 Wat aYeso wat a ta kubɔk, a ku yit mo, a fɛ̀ ni iwu, <<Ngɔn anet inɔɔk atsak igyebet, akyɛ sak fi iyɛ ngɔn to yɛ?>>

32 Ni izen fɛ́ ba nɔ ayɛt kukyɛ ashi me, kuwun e nyeseng ting. 33 Wat bayɔng fɛ́ ba se ayɛt kukyɛ ashi me, kpa ku ya ntong, nɛ ba nye, <<Na tsak e, ngɔn wu i yet Arim Adakunom!>>

34 Ama fɛ́ ba tat sak ni nyi ku yá me, ba nɔ ni mben aJɛnɛsarɛt. 35 Ni izen fɛ́ banet iwɔp e rēn fok aYeso yɔng, ba toos ni itom sak ni ishɛrɛp narɔ ngma kusum, banet ku bɛ́s nɛ ngma bafi nrɔk. 36 Ba ra awon fok na a ka ba won, na ba raas nanu ikpin wu. Ngma bayɔng fɛ́ ba raas, a ka ba te kyang.