1 Ni izen fɛ́ aYeso nɛ bafi imɛɛs wu ta bakat nɛ aRushelima, ba sɛ kaban wɔp aBetafaji fɛ́ ka se ni Ihwyanang Ifat, aYeso tom bafi imɛɛs wu bafaa, 2 a fɛ̀ ni iba, <<Tseng yin sak naban wɔp ya fɛ́ ka se ashon yin. Ni tsin nɔɔs yin, i da di yin ka tarakai kakak ni rosom ni nggon yɛ. Bisik yin ide, da bɛ́ yin ne. 3 Ke anet akak ki rip yin ikyɛng kak, ni fɛ̀ yin ni iwu, <ATisa wu a shim ide>, iwu da wat a tom e ziri ziri.>>

4 Ikyɛng deng te anɔng, nɔng ba di ki shining ikyɛng fɛ́ atan ki mang fɛ̀ yɛ,

5 <<Tak yin banet aSihiyona,

<Di yin agbat agwɔm yin yong

a wuruk sak narɔ yin!

A men ni nhwyɛ wu,

a ngarak naton ki tarakai,

a tsin tseng na kaban tarakai.> >>

6 Bafi imɛɛs wu me, tsɛ ba nye ikyɛng fɛ́ aYeso fɛ̀ ni iba. 7 Ba bɛ́ ni itarakai e ni ki nggon e me, ba turung ágɔdɔ bá, ba tarasa ina naton itarakai e, aYeso teyak ika. 8 Kudyɛng banet e turung ágɔdɔ bà, ba tarak naton irèn, ba tsɛ ba bushung atop izizerek, ba tarak ina naton irèn e. 9 Kudyɛng banet fɛ́ ba se ashon na bayɔng fɛ́ ba se ama, ba tang ntɔ, na ba nye,

<<AHosana sak na arim aDauda!>>

<<Awɛng se gung na ayɔng fɛ́ a bɛ́s

ni iyerek aTisa!>>

<<AHosana, itere naton aza!>>

10 Ni izen fɛ́ aYeso nɔ ayɛt aRushelima, nhwyɛ banet iwɔp e dorok, ba kpa risim yɛ, <<Angan yong ɛ?>>

11 Wat kudyɛng banet e, shim, ni ifɛ̀, <<Atan aYeso fɛ́ a ne na aNazaret ni mben aGalili yɔng.>>

12 AYeso nɔ na atasa karɔ iya Adakunom ntong, a ro ngma banet fɛ́ ba se ni ijik azɔng. A nye gup ákon banet ishesheng itsɔm, nɛ ákon isosok bafi irɛɛs ábɔp. 13 AYeso fɛ̀ ni iba, <<I se ni ijɛk ni fumung Adakunom fok, <Ba da yes kari hom, kari awon,>* awɛt iyin mi tirik yin ika ka sot, <karɔ inɛsɛk bafi itsang agap.>*>>

14 Bakpatɔn nɛ banet bakun, tsɛ ba ku sɛ narɔ iya Adakunom ntong, a ka ba tes kyang. 15 Ni izen fɛ́ bagbat áware nɛ bafi itees ntsi aMusa di kutomong abes fɛ́ a se ne, ni nkun fi nnon tang ina, na na nye, <<AHosana sak na Arim agwɔm aDauda!>> Ikyɛng e ka ba beseng iyɛ.

16 Nek anɔng, ba rip aYeso yɛ, <<Ngɔn foos ikyɛng fi nnon nang taas awɛ?>>

AYeso fɛ̀ ni iba, <<Ey, in mi fok. Iyin ki mang fa yin awɛ?>> Fɛ́ ba mang jɛk yɛ,

<< <Na nanu nnon nabaane nɛ na fi mbɔk

fi itere atsak di nes.>*>>

17 AYeso ka ba won, a wuruk ama iwɔp e sak na aBetani, a tsɛ a kɔsɔ azɔng.

18 Nadiding bop akatson, na tsin bun sak ayɛt iwɔp, nzong daam aYeso. 19 Fɛ́ a di kakon atafo kakak ni fam irèn, a tse bakat azɔng, a tsɛ a sɛ vit ica ni ka, wɔn afumung kyɛk. Wat a fɛ̀ ni ika, <<Ngɔn bi ti ites ica awo, ayɛ na ayɛ!>> Ni izen izining, kakon e wat kakoot.

20 Ni izen fɛ́ bafi imɛɛs wu di ikyɛng fi ite, ayɔɔt ka ba yit. Wat ba ku rip fok, <<Akyɛ sak kakon atafo me wat ka koot ziri anɔng ɛ?>>

21 AYeso fɛ̀ ni iba, <<Won in ki tak yin atsak, ki i bɛ́ yin inɔɔk atsak, vit ite digit, da nkum ikyɛng fɛ́ ba nye na kakon atafo me kyɛk fi i da kyem inye yin awo, i da kyem ni fɛ̀ yin ni ihwyanang ye, <Tun ice ngɔn aze, tsi kpa ayɛt izek,> i da te kpaf anɔng. 22 Ki i bɛ́ yin inɔɔk atsak, i da sɛs yin ngma nkyɔrɔk fi irisim yin ina ayɛt awon.>>

23 AYeso tɛ nɔ na atasa karɔ iya Adakunom ntong e. Ni izen fɛ́ a se ni itees banet, bagbat áware nɛ bashɔn iwɔp tse ni wu, ba ku rip yɛ, <<Ni ice angan wu fi ngɔn di iras nkyɔrɔk nang ɛ? Angan da nɔk ice deng ɛ?>>

24 AYeso fɛ̀ ni iba, <<Won in ki nye yin irip bà. Ki i di tak yin irip inaan, imi da ki tak yin nɛ akyi ice fi in di ras nkyɔrɔk nang e. 25 AYohana anet abatisma kin sɛ ice iras abatisma wu akɛ? A kin sɛ na Adakunom a? Kɛ na banet ɛ?>>

Ba kpa cɛɛt wɔɔn bá, <<Awɛt akyɛ fi in da fɛ̀ yit ɛ? Ki in fɛ̀ yit yɛ, <I kin ne na Adakunom>, a yɔng a da ki rip yit, <Awɛt akyɛ sak fi iyin kin shan yin atsak e ni wu awɛ?> 26 Ki in fɛ̀ yit, <Narɔ banet>, iyit foos yit nnyim ikyɛng fɛ́ banet da ki ra yit e, nek banet ngma kusum mi sok fok aYohana yet atan Adakunom.>>

27 Nek anɔng, iba fɛ̀ na aYeso, <<Iyit irēn yit awo.>>

Wat iwu fɛ̀ ni iba bà, <<Imi bà, in da ki tak yin ni ice angan fi in di ras nkyɔrɔk nang awo.

28 <<Iyin di yin anɛ? Anet akak kin bɛ̀ nnon nafaa. A tse na akoo me, a fɛ̀ ni iwu, <Arim hom, in shim i da tse i di ra kutomong ni ikɔ anap hom atut.>

29 <<Arim wu me fɛ̀ nɛ ada wu, <Awɛy, imi da tse awo!> Ama me, a da nɛ shesheng kuyiring wu, a tsɛ a ra kutomong e.

30 <<Atek e, tse na awosong e, a fɛ̀ ni wu kpaf ikyɛng fɛ́ a fɛ̀ na akoo me. Wat ari wu awosong e, a shim a fɛ̀ ni iwu, <Ey, ada, imi da tse,> wɛt a nɛ a tse awo.

31 <<Angan ayɛt nnon nafaa me, fɛ́ a ra ikyɛng fɛ́ ada wu shim ɛ?>>

Iba fɛ̀ ni iwu, <<Akoo me.>>

Wat aYeso fɛ̀ ni iba, <<Won in ki tak yin atsak: bafi ishashang itsɔm mben, ni ínyak agwɔm bi tun nɔs ayɛt igwɔm Adakunom aza yin. 32 Nek aYohana anet abatisma kin bɛ́ nek a ki tonong yin irèn atsak ikyɛng fɛ́ Adakunom shim ni i nye yin, iyin rayin dang shan yin atsak ni ifɛ̀ wu, awɛt bafi ishashang itsɔm mben, ni ínyak agwɔm ba bi shan atsak ni wu. Ngma ni ikyɛng fi iyin di yin e, i rayin dang shesheng yin ayɛ yin, ni i di shan yin atsak.

33 <<Kɔ fok yin, igorok icɛɛt ikak yɛ: Anet akak kin kap ikɔ, a di tuus nakon anap. A tɛnɛng igɔɔt e ni kubat gyat, a di ta ibong karɔ ifii ica anap e, a tɛ nok iriyɔng fɛ́ anet iyɛrɛ igɔɔt e di ki sosok. A sok igɔɔt e, a won iye ni bɔk banet fɛ́ ba sok iye ni itsɔm, a da nɛ nye kutseet sak ni iwɔp kukak. 34 Fi izen itusung kuyak nye, a tom basam wu sak na bafi iyɛrɛ igɔɔt e, yɛ na ba ku shan kanu kafuu ayɛt ikyɛng fi i mi been.

35 <<Wat bafi iyɛrɛ igɔɔt e yisik basam e, ba tsot azining, ba da bin fɛt azining, ba woro azining na ata. 36 Atek igɔɔt e, tɛ a tom basam wu bakak fɛ́ ba got bafi imɛsɛng e ni kudot. Wat bafi iyɛrɛ igɔɔt e, tɛ ba nye ni iba kpaf ikyɛng fɛ́ ba di nye na bafi imɛsɛng e. 37 Ni igang e, a tom ari wu sak ni ba, a fɛ̀ nyan, <Ba da fok kunanang ari hom.>

38 <<Awɛt ni izen fɛ́ bafi iyɛrɛ igɔɔt e di ari wu me, ba fɛ̀, <Anet iya kurúm e yong. Bɛ́ yin, in fɛt yit iwu, nɔng kurúm e da sot kufiit!> 39 Ba tsɛ ba ku yit, ba sok ba barak ama kubat, ba tsɛ ba fɛt.

40 <<Nek anɔng, ke atek ikɔ me bɛ́s wu, akyɛ fɛ́ a bi nye nɛ bafi iyɛrɛ ikɔ me yɛ?>>

41 Iba fɛ̀ ni iwu, <<A bi fɛɛs banet anyas yɔng, na ma sok ikɔ me, na nɔk bafi itomong e bakak, bayɔng fɛ́ ba da ku nesek kanu kafuu kafi ica nakon e, ni izen fɛ́ na been.>>

42 AYeso fɛ̀ ni iba, Iyin ki mang fa yin ikyɛng fi i se ni ijɛk ayɛt afumung ifɛ̀ Adakunom awɛ? Yɛ,

<< <Kuta yɔng fɛ́ banet inok raba iko,

ku mi sot kuta itsok itu kutek.

Ikyɛng fɛ́ aTisa nye dɔng,

iyet ikyɛng ayɔɔt na ayisi yit.>

43 <<Nek anɔng, in tsin ki tak yin, ba da shan igwɔm azanɛn ni yin, ba da nɔɔk bakak fɛ́ ba da ra kutomong yɔng fɛ́ ku da ta ice fɛ́ Adakunom shim. 44 Ngma anet fɛ́ a kpa ni kuta kang, a da kana bushung acɛk-acɛk e, awɛt ki kuta me ko ku di kpa na anet e, ku da ku kɔɔ minin ti nkpe.>>*

45 Ni izen fɛ́ bagbat áware nɛ BaFarasi fok nzam-nzam igorok icɛɛt fɛ́ aYeso ras, ba wat ba rēn fok a se ni icɛɛt naton ba. 46 Ba tsɛt irèn fɛ́ ba da ku yit mo. Wat iba foos nnyim kudyɛng banet e, nek ba mi sok aYeso naton ayet atan fɛ́ a ne na Adakunom.