1 Kunom aSabat bi ku got, wɛt atuk imɛsɛng inyim nnom, aMarya afɛ́ aMagadala nɛ aMarya azining e, ba wuruk bop sak ni irɛk e.

2 Ni izen izining, mben dorok in zuut makiyi, nek atomaza Adakunom akak, ne azanɛn, a bingiring kuta fi ku se nanu irɛk e, a di sonong naton ko. 3 Nse wu se ti mgbey iza, nkum fɛ́ ares wu tɛrɛk ti itarang. 4 Wɛt nnyim yit batsom e gyet awo, nkum fɛ́ ba tiim nrɔm, ba wat ba sot ti nkom e.

5 Atomaza me, fɛ̀ na banyining e, <<I bi fok yin nnyim awo, nek imi rēn fok i tsin tsɛt yin aYeso, ayɔng fɛ́ ba kin ku tegak. 6 A se azeng awo, ba mi ku donong, kpaf tɛ fɛ́ a kin ki tak yin. Bɛ́ da di yin karɔ fɛ́ ba kin ku mes mo. 7 Ti bun yin ziri ziri, i da tsi i tak yin bafi imɛɛs wu: <A mi dorok ni ifaben, a mi yit irèn ashon yin sak na aGalili. Azɔng fi i da tsi i ku di yin.> Di yin, in mi ki tak yin.>>

8 Wat ba won kurɛk e ayɛt nnyim nɛ kafa kakan makiyi. Ba ta itsi, nɔng ba da tsɛ ba tak bafi imɛɛs wu ifɛ̀ me. 9 Ba se na anɔng, aYeso nyim ni iba, a fɛ̀ ni iba, <<Show yin!>> Ba serek bakat ni iwu, ba di kpa na atak wu, ba ku ya ntong. 10 AYeso fɛ̀ ni iba, <<I bi fok yin nnyim awo, tsi tak yin baruneng na ba tseng sak na aGalili, ba da tsɛ ba di di azɔng.>>

11 Ni izen fɛ́ banyining e se ni irèn, bakak ayɛt batsom e, bun sak ayɛt iwɔp, ba tsɛ ba tak bagbat áware me ngma ikyɛng fi ite. 12 Fɛ́ ba fok anɔng, bagbat áware nɛ bashɔn iwɔp, wat ba yes kazumung, ba tɔ ikyɛng inye, ba nɔɔk batsom e itsɔm dot, 13 ba fɛ̀ ni iba, <<Ikyɛng de fi iyin da fɛ̀ yin, <Bafi imɛɛs wu bɛ́ natuk, ba yi kukom wu, iyit ni nda.> 14 Ki ifɛ̀ me nɔ ni ito agwɔmna, iyit rēn yit ikyɛng fi in da ku tak yit, vit inɛn fi i da ki sɛ yin.>> 15 Wat batsom e shan itsɔm e, ba nye kpaf tɛ ba di fɛ̀ ni iba. Ba rēn shara ifɛ̀ me deng nate baYahuda sak atut.

16 Bafi imɛɛs kusɔk abe azining e, tseng sak na aGalili, sak ni ihwyanang fɛ̀ aYeso fɛ̀ ni iba ba di tse. 17 Ni izen fɛ́ ba ku di, ba ku ya ntong; ngma na anɔng bakak ba bɛ̀ ayɛ gak. 18 Wat aYeso bang serek bakat ni iba, a fɛ̀ ni iba, <<Ba mi di nɔk ngma ice azanɛn nɛ kazatse. 19 Nek anɔng, tseng yin, tsi tsɛt yin bafi imɛɛs ayɛt ícɛ́n azatse ngma kusum, ka ba ras yin abatisma ayɛt iyerek Ada, nɛ Arim e, nɛ Kabik aJɛrɛ, 20 ka ba tees yin na ba nye ngma ikyɛng fi in ki tak yin. Rēn yin fok, imi se gung ni iyin kaakyi izen, sak igang azatse.>>