1 Ni izen fɛ́ aYeso tik ni ihwyanang e, kudyɛng banet ku kuus mo. 2 Akparong akak tsɛ, a te gururuk ashon aYeso, a fɛ̀ ni iwu, <<ATisa, ki ngɔn shim, i da kyem i di te jɛrɛ.>>

3 AYeso nabak kubɔk wu, a di ra anet e. A fɛ̀ ni wu, <<Ey, imi shim, te kyang!>> Ni izen izining, ikparong wat iku won. 4 AYeso ma fɛ̀ ni iwu, <<Fok, i bi tak akak ikikak awo. Di berem tsi tonong àware ice ngɔn, nabak kunang fɛ́ aMusa fɛ̀, nɔng i da tonong fok a mi da te kyang.>>

5 Ni izen fɛ́ aYeso nɔ na aKafarnahum, agbat atsom akak tsɛ a ku sɛ, a tsot akabɔk ni iwu. 6 A fɛ́ ni iwu yɛ, <<ATisa, asam hom se gbɛrɛk ari, a bɔrɔng makiyi.>>

7 AYeso fɛ̀ ni wu, <<In da tsin in ku te kyang.>>

8 Agbat atsom e fɛ̀ ni iwu, <<ATisa, imi kyem fi ngɔn da tse ari hom awo. Ngɔn fɛrɛng kyɛk, asam hom da te kyang. 9 Nek imi ice min, in se aben igwɔm, in bɛ̀ batsom aben ni imi. In fɛ̀ na a yo, <Tseng,> na tseng. Ni in fɛ̀ na a ya, <Bɛ́,> na bɛ́. In fɛ̀ na asam hom, <Nye ide,> na nye anɔng.>>

10 Ni izen fɛ́ aYeso fok anɔng, a ku te yɔɔt, a fɛ̀ na bayɔng fɛ́ ba se ni iku kuus mo, <<Won in ki tak yin atsak, in mi kyem in sɛ akak ni aIsrela kusum fɛ́ a bɛ̀ kuri inɔɔk atsak anɔng awo. 11 Imi fɛ̀ ni iyin banet dot bi nes abatin, nɛ abace, na ba sosok na ba ya amok gung nɛ aIbrahim, nɛ aIshaku, nɛ aYakub* ni igwɔm azanɛn. 12 Awɛt ba bi woro nnon ari igwɔm amatse, ni rin, azɔng wu ba bi ya ának na ba ros anyi.>>

13 Awɛt aYeso fɛ̀ na agbat atsom e, <<Tseng! Kpaf ni inɔɔk atsak ngɔn, ba mi da nye ne.>> Ba te asam wu kyang kpaf ni izen e yɔng.

14 Ni izen fɛ́ aYeso nɔ ari aBitrus, a sɛ anekop aBitrus na meneng ni ifes. 15 A ku ra ni kubɔk, ifes e wat i ku wosong, abining e dorok, a kpa ku nye ikyɛng iya.

16 Fɛ́ kawuwuri nye, ba ku bɛ́s nɛ banet dot fi kurɔk itseng ka ba daam, a ka ba turung itseng e ni ifɛ̀, na tes bafi nrɔk kyang. 17 Ba nye anɔng, ba bin di shining ikyɛng fɛ́ atan aIshaya kin fɛ̀ yɛ,

<<A kin sok kugbɛrɛk yit,

a fanang nrɔk yit.>>

18 Ni izen fɛ́ aYeso di kudyɛng banet fɛ́ ba ku te nate, a fɛ̀ na ba tat sak ni nyi ku ya kufi izek e. 19 Wɛt anet itees ntsi aMusa akak bɛ́ ni wu, a fɛ̀ ni wu, <<Anet itees, imi da ka kuus mo sak kaakyɛ karɔ fi ngɔn di ki tse.>>

20 AYeso fɛ̀ ni wu, <<ÁGbayɔrɔ bɛ̀ ábóng na, nanon bɛ̀ arɛ na, awɛt Arim Anet bɛ̀ karɔ ikɔs awo.>>

21 Azining ayɛt bafi imɛɛs wu fɛ̀ ni wu, <<ATisa, won in tsin nɛt ada hom ninyɛn.>>

22 Awɛt aYeso fɛ̀ ni wu, <<Ngɔn di kuus mo, won nkom ni in nɛsɛk nkom bá.>>

23 AYeso ma nɔ ni kukyɛ ashi, bafi imɛɛs wu ku kuus mo. 24 Ni izen izining, itsombos ikak tsi i ne makiyi ni izek e, nkum ashi fɛ́ a nɔɔs ayɛt kukyɛ ashi makiyi. Awɛt aYeso se ni nda. 25 Bafi imɛɛs e tsɛ ba ku shemeng, ba fɛ̀ ni wu, <<ATisa, ki sheshek yit! Ashi da ki ya yit!>>

26 AYeso fɛ̀ ni iba, <<Iyin fi bɛ̀ yin inɔɔk atsak igyebet, akyɛ sak fi iyin bɛ̀ yin nnyim anɔng ɛ?>> A dorok, a gyɔng itsombos ni idoro ashi me, karɔ wat ka te yuu.

27 Ikyɛng e te banet yɔɔt, ba fɛ̀, <<Akyɛ kuri anet yong ɛ? Fɛ́ awun ni kuren ashi ku foos ifɛ̀ yɛ?>> AYeso men ni itsombos

28 Ni izen fɛ́ a tsɛ a ta ni nyi ku ya kufi mben bafɛ́ aGadarin*, bafi kurɔk itsɛ́ng bafaa ne na arɛk bá, sak inyim nɛ aYeso. Nek kuren fɛ́ ba ras, vit anet fɛ́ a kyem a got irèn e yɔng. 29 Ba ta ntɔ yɛ, <<Arim Adakunom, akyɛ fi ngɔn tsɛt ni iyit ɛ? Ngɔn shim i bi i ki zoot yit ni izen yit resek dang nye yɛ?>>

30 Kukpara áza kuratek kin se ni iya kuyak sak ashon ba gyet. 31 Itsɛ́ng e tsot akabɔk na aYeso yɛ, <<Ki i da ki tun yit, ki won yit nin nɔ yit ayɛt áza na.>>

32 Wat iwu fɛ̀ ni ide, <<Tsɛng yin!>> Nek anɔng, i wuruk, i tsi i nɔ ayɛt áza me, kukpara áza me ngma kusum, wat ku di berem ni kuren sak ni ice ibanang, a kpas ayɛt ashi, a kus. 33 Banek áza me, ta itsi, sak ayɛt iwɔp, ba tsɛ ba taas banet ngma ikyɛng fi ite, ni ikyɛng fi ite na bafi kurɔk itseng e. 34 Banet iwɔp ngma kusum wuruk, ba tsɛ ba sɛ aYeso. Ni izen fɛ́ ba tsɛ ba ku sɛ, ba tsot akabɔk fok yɛ na ka ba won mben bá.