1 Ama anɔng, bakak ayɛt BaFarasi, nɛ bafi itees ntsi aMusa nɛ na aRushelima tse na aYeso, ba fɛ̀ ni iwu yɛ, 2 <<Akyɛ sak fɛ́ bafi imɛɛs ngɔn beseng nggɔn bashɔn yit ɛ? Nek ba raba dang kus mbɔk, ba da nɛ ba yas.>>

3 AYeso ka ba bun ni ifɛ̀ yɛ, <<Awɛt akyɛ sak iyin beseng yin ntsi Adakunom tit nggɔn yin kyɛk ɛ? 4 Nek Adakunom kin fɛ̀ yɛ, <Nɔk ada ni nggɔ ngɔn iratek, wɛt a tɛ a fɛ̀ yɛ, Kaangan fɛ́ a tosong ada wu, ke nggɔ wu ayi, i se gbing-gbing na ba ku fɛt awɛ?> 5 Awɛt iyin nye yin yɛ, anet na a fɛ̀ na ada wu ke nggɔ wu ayi yɛ, <Ikyɛng fi in kin tsang fɛ̀ in da ka nɔk, in mi di nye Adakunom kunang.> 6 Wat ke anet ma fɛ̀ anɔng, ni iyin nye yin, i se gbing-gbing anet na a nɔɔk ada wu iratek awo*. Na anɔng, fi i di beseng yin ifɛ̀ Adakunom nek i di kuus yin ntsi yin. 7 Iyin bafɛ́ nanu nafifaa! Nek anɔng wu fi atan aIshaya kin di cɛɛt ni ifɛ̀ Adakunom naton yin, fok,

8 <Banet bang, di nesek iratek

na nanu bá kyɛk,

awɛt ayɛ bá se yik-yik ni imi.

9 Ba di ya ntong nabap

itees bá yet itees ntsi banet.> >>

10 AYeso yes kudyɛng banet e, a fɛ̀ ni ba, <<Wes yin ato, da rēn yin. 11 Ayet ikyɛng dɔng fi inɔɔs nanu anet de fi i ku saas na a sot gbiridik awo, tit ikyɛng dɔng fi iwuru nanu anet e fi i ku saas na a sot gbiridik.>>

12 Ama anɔng, bafi imɛɛs wu, bɛ́ ba fɛ̀ ni wu, <<Ngɔn rēn fok kucɛɛt fi i nye beseng BaFarasi iyɛ ɛ?>>

13 AYeso fɛ̀ ni iba, <<Kaakyi ikyɛng fɛ́ da aDa min fɛ́ a se azanɛn wu a tup ide awo, ba bi ngaat ide. 14 Ka ba won in, ba yet bakpatɔn, fɛ́ ba tsin kɔk bakpatɔn. Ke akpatɔn tsin kɔk afidang akpatɔn, ngma ba ba da tsɛ ba kpas ni bong.>>

15 ABitrus fɛ̀ ni iwu, <<Ki tak yit ikyɛng fi igorok icɛɛt e tonong.>>

16 Wat aYeso ku rip yɛ, <<Tit iyin resek yin dang rēn yin ɛ? 17 Iyin yɛrɛ yin fɛ́ ngma ikyɛng fɛ́ anet ya, tung gosok nanu, sak ayɛt afaa, ni i ma wuru na abing awɛ? 18 Ikyɛng da fi iwuru nanu anet de, fi ines ni iyɛ, ide de i sak anet na a sot gbiridik. 19 Nek ni iyɛ anet wu kuyiring kumaan e di nes, kuyɔng fi ku sak anet di fɛt akak, na di ra irɔs, na di ra kujang, ni itsang, ni mbɔɔs naton akak, ke na di beseng iyerek akak ayi. 20 Nkyɔrɔk nang na fi in saas banet nɛ ba sot gbiridik. Kuyak vit ikusu mbɔk, bɛ́s ni ku gbiridik awo.>>

21 AYeso dorok a won azɔng, a tseng sak ni mben aTiya nɛ aSidon. 22 Abining akak, afi iwɔp aKanan, fɛ́ a se abak azɔng, a bɛ́ ni wu, a sok kutɔ a da fɛ̀, <<ATisa hom, Arim agwɔm aDauda, kabɔk fok angmishish hom! Angas yin sɔ iyɔm makiyi ni bɔk itseng.>>

23 AYeso fɛ̀ ni iwu ikikak awo. Nek anɔng wu, bafi imɛɛs wu, di ban ni wu fok, <<Ku ro, na a tseng! Nek a yɔng a teng a ki kuus yit mo, na a ki daam yit ni iwɔng.>>

24 A bun ni ifɛ̀ yɛ, <<Ba di tom sak ni itsamang fi i mi wɛs, banet aIsrela kyɛk.>>

25 Abining e, bɛ́ a tsɛ gururuk ashon wu, a fɛ̀ ni iwu, <<ATisa, di se mo!>>

26 Wat aYeso fɛ̀ ni iwu, <<I se gyat na ba sok kuyak nnon, na ba nɔɔk ákabu awo.>>

27 Abining e shim, a fɛ̀, <<Ey, aTisa i se anɔng, wɛt ngma na anɔng, ákabu ya icek nayak atekari ná, fɛ̀ a kpas aben.>>

28 AYeso shim, a fɛ̀, <<Nggɔ, inɔɔk atsak ngɔn bɛ̀ agap! Ba mi da tarang kudaam ngɔn.>> Ayɛt izen e yɔng, angas wu wat a sɛ kukyang.

29 AYeso won karɔ me yɔng, a got abak ifam izek aGalili. Ama anɔng, a tsɛ a ngarak ihwyanang, a sonong azɔng. 30 Kudyɛng banet ku kuus mo sak azɔng. Ba tses na bayɔng fɛ́ ba yet bakun, nɛ bakpatɔn, nɛ bayɔng fɛ́ ba yɔmɔng, nɛ bakpey, ni ishɛrɛp bakak dot. Ba tsɛ ba ka ba saas ashon wu, wat iwu ka ba tes kyang. 31 A te banet yɔɔt makiyi fɛ́ ba di bakpey cɛɛt, nɛ bakun tseng tabat, nɛ bayɔng fɛ́ ba yɔmɔng tseng gyat, nɛ bakpatɔn yɛrɛ wɛshɛk, wat banet kusum tere Adakunom afi aIsrela.

32 AYeso yes bafi imɛɛs wu sak narɔ wu, a fɛ̀ ni iba, <<In foos angmishish banet bang, nek nkɔs ba ntaat atut azeng ni imi, wɛt vit iba ni ikyɛng iya. Imi shim in ka ba te ni irèn ni nzong awo, nek nsong bá da rasak ni irèn.>>

33 Bafi imɛɛs wu ku rip yɛ, <<In da se yit ikyɛng iya akɛ nate ayit kang, fi in da nɔɔk yit kudyɛng banet tɛ ba bang ɛ?>>

34 AYeso ka ba rip yɛ, <<Ágbang akpam amang fi i bɛ́ yin ɛ?>>

Iba fɛ̀ ni iwu, <<A se kanakataat nɛ nabin ìzos gyet kyɛk.>>

35 AYeso te banet ngma na ba sosok aben. 36 Wat iwu sok ágbang akpam kanakataat nɛ nabin ìzos e, a nɔɔk ifeng sak na Adakunom, a kpa bushung e, na nesek bafi imɛɛs, ni iba kabasa banet e. 37 Ngma ba, ba yas ba hwyas. Ama anɔng, bafi imɛɛs wu tusung icɛk e fi i kyɛk, ba sɛ nakɔmɔng kanakataat. 38 Kudot banet fɛ́ ba ya, kin se bamatek kyɛk agup anaas, dang ba di moon nɛ banyining ni nnon.

39 Anɔng wu, aYeso ka ba te mo ni irèn, a nɔ ayɛt kukyɛ ashi, a yit irèn sak ni mben aMagadan.