1 Ama anɔng, Kabik aJɛrɛ tsa aYeso sak ayɛt ayit nɔng aShetan bin ku mara. 2 Ama itemak kanu nnom nsɔk nnaas nɛ natuk nsɔk nnaas, izong kudaam. 3 Anet imara me bɛ́ a ku sɛ, a fɛ̀ ni iwu, <<Ki ngɔn yet Arim Adakunom, fɛ̀ na ata nang na sot akpam.>>

4 AYeso ku bun ni ifɛ̀ yɛ, <<I se ni ijɛk ni ifumung Adakunom yɛ,

<Na nayak na kyɛk

fɛ́ anet di sɛs kutset awo,

tit ni ifɛ̀ fi ines

narɔ Adakunom de.> >>

5 AShetan e tɛ a ku sok sak ni kuwɔp ku jɛrɛ, aRushelima, a ku sak a nyeseng ni iriyɔng kutu iya Adakunom ntong. 6 A fɛ̀ ni wu, <<Ki ngɔn yet Arim Adakunom, barak ice ngɔn sak aben. Nek i se ni ijɛk,

<Adakunom bi nɔɔk batomaza wu

kanu icɛɛt naton ngɔn,

wat iba bi da bereng tɛrɛrɛ ni mbɔk bá,

da ba bi won ni turuk kutak ni kuta awo.> >>

7 AYeso tɛ a fɛ̀ ni wu, <<I se ni ijɛk, <I bi mara aTisa Adakunom ngɔn awo.> >>

8 AShetan e tɛ a ku sok a ngarak ni iwu naton ihwyanang ikak fi i yet isɔp makiyi. A ku tonong nzam-nzam igwɔm azatse ni nta na, 9 a fɛ̀ ni wu, <<Ngma nkyɔrɔk na da sot nfɔɔn, ki ngɔn te gururuk i di ya ntong.>>

10 AYeso fɛ̀ ni wu, <<Dorok azeng aShetan! I se ni ijɛk yɛ,

<Ya aTisa Adakunom ngɔn ntong,

iwu aziwu kyɛk fi i da ku ra isam.> >>

11 Ama anɔng, aShetan tseng a ku won, batomaza bɛ́, ba ku sɛ mo.

12 Ni izen fɛ́ aYeso fok yɛ ba mi te aYohana ari inyang, a tɛ bun sak na aGalili. 13 A won aNazaret, a tsɛ sot na aKafarnahum, kuwɔp anu kudúng fi ku se bakat nɛ aZebulum nɛ aNaftali, 14 mok ba di shining ikyɛng fɛ́ atan aIshaya kin fɛ̀,

15 <<Mben aZebulum nɛ mben aNaftali,

iyin fi i se yin ni irèn sak ni kudúng,

ni kunyi aJodan,

ngɔn aGalili afi Ícɛn-iduk!

16 Banet fɛ́ ba resek ayɛt nhwyi

ba mi di mgbey nratek;

naton bayɔng fɛ́ ba resek ni mben

fi iku mi ka ba te gip,

karɔ mi ki te yin weshek.>>

17 Nkum izen e yɔng, aYeso tumung ishara banet ifɛ̀ yɛ, <<Wosong yin anɛn yin, nek igwɔm azanɛn mi bɛ̀ bakat.>>

18 Izen fɛ́ aYeso se ni kutseet ni fam izek aGalili, a di banet bafaa, aSiman fɛ́ ba ku yes aBitrus, nɛ arunyining Andarawus. Ba se ni bara agunung ayɛt izek, nek iba yet bafi iyisik ìzos. 19 AYeso fɛ̀ ni ba, <<Bɛ́ yin, di kuus yin mo, in da ki sak yin, ni i sot yin bafi iyisik banet.>> 20 Zɛng-ngɛ-ziri, ba wat ba wosong agunung bá, ba kpa ku kuus mo.

21 A ya kashon ni kutseet, a sɛ banet bafaa bà, aYakubu arim aZebedi nɛ arunyining aYohana. Ba se ayɛt kukyɛ ashi nɛ ada ba aZebedi, ba se ni inye agunung bá. AYeso ka ba yes, 22 Zɛng-ngɛ-ziri, ba wosong kukyɛ ashi bá, nɛ ada bá, ba ku kuus mo.

23 AYeso teng a tsees kaakyɛ na aGalili, na tees banet na narɔ inyis baYahuda, na a shara ifɛ̀ itek ifi igwɔm, na tes kyang kaakyi nri nrɔk, ni ndaam fɛ́ banet bɔrɔng e. 24 Na anɔng wu, kucɛɛt wu teng ku tseng kaakyɛ ni mben aSiriya. Nek anɔng, banet del na bafi nzam-nzam nrɔk, bayɔng fɛ́ ba bɔrɔng makiyi, bafi nrɔk ítseng, bafi ikus itsitsiring, nɛ bayɔng fɛ́ aduru nrɔm bá mi kus, iwu ka ba tes kyang. 25 Kudyɛng banet fɛ́ ba ne na aGalili, nɛ bayɔng fɛ́ ba ne na aDikapolis*, nɛ bayɔng fɛ́ ba ne na aRushelima, nɛ bayɔng fɛ́ ba ne ni mben aJudiya, nɛ bayɔng fɛ́ ba ne ni nyi kuya kufi kukyɛk aJodan, teng ba ku kuus mo.