1 Ayerek fɛ́ a se ni kufumung kang yet ayerek badakop aYeso Kristi, Arim agwɔm aDauda, ayɔng fɛ́ a ne ni izɔrɔk aIbrahim:

2 AIbrahim yet ada aIshaku,

aIshaku yet ada aYakub,

aYakub yet ada aYahuda nɛ barunyining wu,

3 aYahuda yet ada aFerez nɛ aZera, nggɔ ba yet aTamar,

aFerez yet ada aHeziron,

aHeziron yet ada Aram,

4 Aram yet ada Aminadap,

Aminadap yet ada aNashon,

aNashon yet ada aSalmon,

5 aSalmon yet ada aBowaz, wɛt nggɔ wu yet aRahab,

aBowas yet ada aƆbet, wɛt nggɔ wu yet aRut,

aƆbet yet ada aJesi,

6 wɛt aJesi yet ada agbat agwɔm aDauda,

aDauda yet ada aSolomon, fi nggɔ wu tsang yet abining aUriya.

7 ASolomon yet ada aRehobowam,

aRehobowam yet ada Abija,

Abija yet ada Asaf,

8 Asaf yet ada aJehoshafat,

aJehoshafat yet ada aJehoram,

aJehoram yet ada aUziya,

9 aUziya yet ada aJotam,

aJotam yet ada Ahas,

Ahas yet ada aHezekiya,

10 aHezekiya yet ada aManase,

aManase yet ada Amon,

Amon yet ada aJosiya,

11 aJosiya yet ada aJekoniya nɛ barunyining wu. Ni izen e yɔng fɛ́ ba kin sok nnon aIsrela sak ni isam na aBabila.

12 Ama fɛ́ ba tsɛ ni aIsrela isam na aBabila,

aJekoniya yet ada aSheltiyel,

aSheltiyel yet ada aZerubabel,

13 aZerubabel yet ada Abihut,

Abihut yet ada aEliyakim,

aEliyakim yet ada Azor,

14 Azor yet ada aZadɔk,

aZadɔk yet ada Akim,

Akim yet ada aEliyud,

15 aEliyud yet ada aEleyazar,

aEleyazar yet ada aMatan,

aMatan yet ada aYakub,

16 aYakub yet ada aYusufu amatek aMarya,

aMarya me yɔng fɛ́ a tes aYeso

fɛ́ ba ku yes Anet-Isheshek.

17 Kudot izɔrɔk fi ine nkum izen aIbrahim sak ni izen agwɔm aDauda se kusɔk abe anaas. Nkum izen agwɔm aDauda sak ni izen fɛ́ ba kin sok nnon aIsrela sak ni isam na aBabila se kusɔk abe anaas. Wat ikyɛng fi isok izen fɛ́ ba kin sok nnon aIsrela sak ni izen aYeso Kristi se kusɔk abe anaas ba.

18 Kutes aYeso Kristi kin se ane: Ni izen e yɔng ni nggɔ wu aMarya tsin bɛ̀ ishim iweneng nɛ aYusufu. Na ba resek dang ka ba moon ni weneng, a bɛ́ a sok kafa Abik aJɛrɛ. 19 AYusufu fɛ́ a da sot amatek, bi nggɔn ntek, wɛt da a shim a te aMarya nsum ashon banet awo, nek a sok ni iyɛ wu fok ba da ka na kam yuu.

20 Ama fi iwu se ni kuyiring anɔng, atomaza aTisa ku wuruk na nabos, a fɛ̀ ni wu, <<AYusufu arim aDauda, i bi fok nnyim i sok aMarya tɛ abining ngɔn awo, nek ikyɛng fi i se nafa wu, i ne na Kabik aJɛrɛ. 21 A da tes nggon, ngɔn da ka ka te iyerek aYeso nek iwu wu a bi sheshek banet wu na anɛn bá.>>

22 Ngma nkyɔrɔk nang te anɔng, nɔng ba bin di shining ikyɛng fɛ́ Adakunom mang fɛ̀ na nu atan wu yɛ, 23 <<Fok yin! Kanamang fɛ́ ka rēn amatek awo bi sok kafa, ka bi tes nggon, ba bi ka ka yes aImmanuwel.>> AImmanuwel yet, <<Adakunom se gung ni iyit.>>

24 Ni izen fɛ́ aYusufu shemeng ni nda, a nye ngma ikyɛng fɛ́ atomaza fɛ̀ ni wu, a sok aMarya te abining wu. 25 Wat iwu rēn aMarya te abining awo, tit ama kutes nggon e. A ka ka bɔ iyerek aYeso.