1 Ntsi me yet nawu kyɛk na fi nkyɔrɔk ntek fi in bi bɛ́ azeng ashon, da ina yet atutup nkyɔrɔk e ice na awo. Nek anɔng, jɛm-jɛm, i da kyem i sot nnang ashosh fɛ́ ba tobok inasap e ayiyɛ awo, nek ite tabat bayɔng fɛ́ ba shim ibɛ́ bakat nek iya Adakunom ntong. 2 Ki i fi kyem inye anɔng e, ke ba kin man na wosong inasap nnang ashosh e awɛ? Ke bafi iya Adakunom ntong e mi sɛ ikusu cɛ́l ngma kusum, ke kuyiring naton anɛn bá ti ku ka ba daam awo. 3 Awɛt inabak-akuce ayiyɛ me, ka ba bɛ́s ni kuyiring anɛn bá, 4 nek i da se jɛm-jɛm, nasok amúng nɛ na fi ibón, da kyem na sok anɛn awo.

5 Nek anɔng, izen fɛ́ Anet-Isheshek bɛ́ na azatse, a fɛ̀ ye,

<<Inabak-akuce ni nnang,

fi ngɔn shim awo,

tit kurɔm fi ngɔn nye

nek imi.

6 Ngɔn sɛs itɛrɛk iyɛ

nek nnang ashosh

ni inasap nnang

nek ikus anɛn.

7 In da ni in fɛ̀,

<Woo Adakunom,

imi yong,

kyɔn ti fi i se ni jɛk

ni kufumung ifɛ̀ ngɔn,

imi bɛ́ nɔng in da bin

ra ikyɛng fi ngɔn shim.> >>

8 Ni imɛsɛng e, a fɛ̀, <<Inabak-akuce ni nnang, ni inabak-akuce nkyɛ-ari ni inasap nnang nek ikus anɛn, ngɔn shim awo, kɛ ni in da tɛrɛk iyɛ awo.>> A fɛ̀ anɔng e, ngma na fi ntsi me fɛ̀ na ba nesek ina. 9 A da ne fɛ̀, <<Imi yong, in mi bɛ́ nɔng in ra ikyɛng fi ngɔn shim.>> A wobok irosom kushii imɛsɛng e ni ifam, nɔng a bin di te tsik ifɛ́ afaa me. 10 Nek ayet ishim Adakunom e ye, fɛ́ ba ki te yit mo jɛrɛ, ni irèn inabak kurɔm aYeso Kristi ite kazining pɛɛt vit ibarang.

11 Kaakyɛ àware sot ni ira kutomong wu kaaki kunom, na tobok inesek nnang ashosh iyɔng fi in da kyem jɛm-jɛm ni in tun anɛn awo. 12 Awɛt Anet-Isheshek nabak ice wu sɔk kazining pɛɛt nek ikus anɛn banet kaakyi izen, a ma tsɛ a sonong ni bɔk iyak Adakunom. 13 Neme ni izen yame, a se ni tot izen fɛ́ Adakunom bi sak bafi ifa ni wu na ba sot na ben atak wu. 14 Nek inabak ashosh izizining yeng kyɛk, a di sak ngma bayɔng fɛ́ a mi ka ba kanang anɛn bá, ba sot jɛrɛ ayɛ vit nkum. 15 Kabik aJɛrɛ bà, ka mi nɔɔk kanu ifɛ̀ kang ni yit. Ni imɛsɛng e, a fɛ̀,

16 <<Irosom kushii kang

fi in da nye ni iba,

ama izen e yɔng

fi i bi bɛ́, aTisa fɛ̀.

In bi te ntsi hom ayɛt ayɛ bá,

ni in jɛk ina ayɛt ice bá.>>

17 A ma tɛ ban fɛ̀,

<<Anɛn bá ni ibeseng ntsi bá

jɛm-jɛm, in da ti in yiring

ni ina awo.>>

18 Wat izen fɛ́ ba mi fuut anɛn nang, vit ishɛrɛp inabak ashosh ikak fi i ti kyɛk nek anɛn.

19 Nek anɔng ábaruneng, in bɛ̀ yit iyɛ ting fi in di ki nɔ yit na Karɔ aJɛrɛ ka fɛ́ Jɛrɛ me kang, ni irèn inosong nasok ni iku aYeso. 20 A tɛ a ki tarak yit irèn ifas, irèn ifi kutset, ni irèn sarak kukpin nitu iya ntong, fi i yet kurɔm wu. 21 Wat yɔkɔnɔng, in bɛ̀ yit Agbat-agbat àware fɛ́ ngma igwɔm Adakunom se ni bɔk wu. 22 Nek anɔng, won ni in serek yit bakat na Adakunom na atsitsak iyɛ fi itonong inɔɔk atsak yit. Na anɔng wu fɛ́ ba ki te yit mo jɛrɛ ni kuras iyiring iyɛ yit, ba tɛ ba kus nrɔm yit cɛ́l na ashi. 23 Won ni in bereng yit gey ite iyɛ yit fi in ma tak yit ide wɛshɛk, nek iwu ayɔng fɛ́ a nye kushii me bɛ̀ atsak. 24 Won ni in tsɛt yit irèn fi in di ki gbinding yit baruneng ni irèn itonong ishim, ni iras ntomong ntek. 25 Won in ba birisi yit inyis yit gung awo, kyɔn tɛ fɛ́ bakak mi di mɛɛ ni kuri nggɔn e yɔng. Awɛt won ni in gbinding yit baruneng ni gya, i di mak imak e, fi in tsin di yit izen kubɛ́ Adakunom mi bɛ́ bakat.

26 Ki iyit ni ishim iyɛ yit in sot yit ni iras anɛn, ama fi in ma shan yit irēn ifɛ̀ atsak, vit inabak ashosh akak fi i ti resek. 27 Ama anɔng, aduk inyim ishɔt bi bɛ́ nɛ avɛt arong fɛ́ a bi hɛlɛm bafi ifa na Adakunom. 28 Ngma ayɔng fɛ́ a rawu ifok ifɛ̀ ntsi aMusa, na ba ku fɛt, vit ifok angmishish wu, ke ba sɛ inɔɔk kanu ifɛ̀ banet bafaa kɛ bataat kyɛk naton wu, 29 se ngɔn yɔng i di, i bi se anɛ ne ayɔng fɛ́ a byɛs Arim Adakunom, a sok nasok irosom kushii fi ku kus anɛn banet jɛrɛ i sot abap, a tɛ a di tosong Kabik kang fɛ́ ka bɛ́ ni itek! Akyɛ kuri ishɔt fi iwaat iduk e fi i di yin i da se yɛɛt ne anet yong ɛ? 30 Nek in rēn yit iwu ayɔng fɛ́ a fɛ̀, <<I yet inaan, ni in ka ba bun na anyas bá, ni in ti in ka ba tarang mo bà.>> A tɛ a fɛ̀, <<ATisa bi ra banet wu ishɔt.>> 31 I yet ikyɛng inyim makiyi, anet na kpa ni bɔk Adakunom atset.

32 Yiring yin ni nnom ayame. Ama fi i mi sɛ yin mgbey Adakunom, i te yin gbinding ni izen isɔ izot makiyi. 33 Ni izen ikak, ba ki tosong yin ni idɛt, na ba ki zoot yin ashon banet. Ni izen ikak bà, ni ishim imoon yin ice na bayɔng fɛ́ ba sɔ kuri izot deng anɔng kpaf ti iyin. 34 Iyin kin fok yin angmishish na bayɔng fɛ́ ba se ari inyang, ni ti ishan yin ni iyɛ ikan akɔn yin, ke ba ki foshok yin ares, nek i tsang rēn yin fok, i bɛ̀ yin kurúm fi kuwaat ni kusas fi ku da sot vit nkum.

35 Nek anɔng, i bi te yin nwaa kuting iyɛ yin awo, nek i bi ki bɛ́ yin ni izang iratek. 36 I se yɛɛt ni te yin gbinding, nɔng i da ra yin kpaf ikyɛng fɛ́ Adakunom shim, ama me, i da bin shan yin ikyɛng fɛ́ a mang nye kushii, a da ki nɔk yin. 37 Ti i di se ni ijɛk fok,

<<Ni kizen gyeet,

fɛ́ ka resek,

iwu fɛ́ a da bɛ́ me, a da bɛ́,

a da raan wu awo.

38 Awɛt afɛ́ kusot kutabat hom,

a da sot ni kutset

ni irèn inɔɔk atsak.

Awɛt ke a tɛ a bun na kama,

Iyɛ hom bi tɛrɛk

ni iwu awo.>>

39 Awɛt iyit yet yit kuri bayɔng fɛ́ ba bushung na kama, na ba di wes awo. Tit bayɔng fɛ́ ba shan atsak, fɛ́ ba sɛ isheshek.