1 Yɔkɔnɔng ana, ni irosom kushi Adakunom tsin rēn di se mo kufi inɔ ayɛt nawu wu, won ni in nye yit yɛɛt, kɔn da akak yin bi sɛ kurat inɔ ayɛt ifɔn e. 2 Iyit mi fok yit ishara Ifɛ̀ itek e deng, kpaf ti iba kin di fok. Awɛt itom ishara Ifɛ̀ me fɛ́ ba kin fok, ba di i ka ba se yɛɛt awo, nek anɔng, bayɔng fɛ́ ba fok Ifɛ̀ me, ba moon ishan de ni inɔɔk atsak awo. 3 Awɛt iyit ba bang fi i mi ishan yit atsak e, iyit ba fi in da nɔ yit ifɔn e yɔng. Kyɔn tɛ Adakunom mi fɛ̀,

<<In shiwu ni kushi

ayɛt ibeseng iyɛ hom,

<Jɛm-jɛm, ba bi nɔ

na nawu hom awo.> >>

Ngma ne anɔng, a mang tsang gang kutomong wu neme ni izen ita itis inye azatse. 4 Narɔ kakak ba jɛk ni kufumung Adakunom naton kunom kufɛ́ kanakataat ye, <<Adakunom kin fɔn ni kunom kufɛ́ kanakataat, na akaakyɛ kuri kutomong wu.>> 5 Awɛt azeng narɔ ka kang e, a tɛ fɛ̀, <<Jɛm-jɛm, ba bi nɔ na nawu hom awo.>>

6 Ayame fɛ́ ba kin shara Ifɛ̀ itek e naton inɔ ifɔn e yeng, awɛt bayɔng fɛ́ ba kin ka ba shara Ifɛ̀ e me, da ba kyem ba nɔ iye awo nek kugbarak bá. Awɛt yɔkɔnɔng ana, kawat di se fɛ́ bakak da kyem ba di nɔ ifɔn e me yɔng. 7 Nek anɔng, Adakunom tɛ a te kunom kukak, a yes iko, <<Atut,>> a cɛɛt naton kunom e me yɔng, ama ayɛ dot nanu agwɔm aDauda, kyɔn tɛ fi i kin di se ni jɛk yame ye,

<<Atut, ki i fok yin kutɔ wu,

i bi sot gbarak awo.>>

8 Nek ke aJoshuwa fɛ́ tsang ka ba nɔk ifɔn e me yeng, ke Adakunom tɛ cɛɛt naton kunom kukak zɛɛt awo.** 9 Ideng tonong fok, atut ana ifɔn ifɛ́ kunom anakataat e rēn di se nek banet Adakunom. 10 Nek ngma bayɔng fɛ́ ba nɔ ni ifɔn Adakunom e, ba fɔrɔng ayɛt ntomong mbɔk bá, kyɔn tɛ Adakunom kin di fɔn ni ku fuu.

11 Nek anɔng, won in te yit nyɛk ni in nɔ yit ni ifɔn e yɔng. Da akak bi gaat i nɔ ni ifɔn e me awo, nek a kuus nggɔn bayɔng fɛ́ ba tonong kugbarak ice. 12 Nek ifɛ̀ Adakunom yet itsɛt, i bɛ̀ agap ira kutomong. Iwaat kaakyi itsot afak afaa votot. I gosok sak ayɛt irɔm anet, ni kabasa iyɛ na kabik, ngma ni nkap na asisɔrɔng. I tsɛk ishɔt kuyiring ni nggɔn anet. 13 Vit ikyi ikak fi i se ni nɛt na ayisi Adakunom. Kaakyi ikyɛng se piyot, ni ti se gbɛngɛrɛng na ayisi wu. Iwu yɔng wu, fi in bi nyeseng yit ashon wu, ni in ku taas yit ngma nkyɔrɔk fi in kin mang ras yit.

14 Nek anɔng, in bɛ̀ yit agbat-áware aratek, aYeso Arim Adakunom, iwu yɔng fɛ́ a mi tse azanɛn ashon Adakunom. Nek anɔng, won in bereng yit gey inɔɔk atsak fi in mi taas yit na nanu yit. 15 Nek da in bɛ̀ yit Agbat-agbat àware fɛ́ da a daam ni fok angmishish kurat yit awo. Nek iwu yet anet fɛ́ ba mi ku mara ni irén zizɛɛt ti iyit, ngma ne anɔng, a ra inɛn ikak awo. 16 Nek anɔng, won ni in bɛ́ yit bakat ni kuta igwɔm Adakunom fi ku yet karɔ i sɛs itek, ni iyɛ ting. Nɔng in di ki sɛ yit angmishish wu ni itek wu fi i di ki sɛ yit mo, ni izen fi in shim yit.