1 Ngma itin ikyɛng fi in tsin di cɛɛt yit deng yet; In bɛ̀ yit Agbat àware ayɔng fɛ́ a se ni isonong ni bɔk iyak ni kuta igwɔm Azɔk azanɛn. 2 Ayɔng fɛ́ a ra kutomong wu ayɛt Kutɔmɔng Iya Adakunom Ntong, na atsak kutɔmɔng fɛ́ aTisa ni ice wu a nok, da anet awe awo.

3 Kaakye agbat àware, ba ku te mok inasap nnang ngma nɛ ashosh. I se gbing-gbing Agbat àware yit na a bɛ̀ ikyɛng fɛ́ a da nabak ide bà. 4 Ki iwu kin yet afɛ́ kazatse kang, ke a kin yet àware ngma ni ngane awo, nek banet tsang di se fi ntsi aMusa ka ba te mo ni inasap nnang e. 5 Kutomong fɛ́ áware me ras ayɛt itu iya Adakunom ntong e, kuyɔng fi ku yet nawu ikyɛng fi i se azanɛn. I se kpaf ni ikyɛng fi ite ne aMusa, ni izen fɛ́ a shim a nok kutɔmɔng e, Adakunom fɛ̀ ni wu ye, <<Rēn tsɛngtsɛng fok, i da nok kaakyi ikyɛng kpaf ti kuyɔng fɛ́ ba kin da tonong nawu me, ni izen fi ngɔn se naton ihwyanang e.>> 6 Awɛt yɔkɔnɔng, ba mi nɔɔk aYeso kutomong iware fi kuwaat kufuba, nek iwu se nate irosom kushii Adakunom nɛ banet wu, fi kuwaat kuzen e. Kushii kunang e waat ni kusas, nek ba ta iko naton nkyɔrɔk ntek.

7 Nek ki i fi yet fok, kushii kufi imɛsɛng e kin se vit inye, ke ba tɛ ba te kukak kufɛ́ afaa awo. 8 Awɛt Adakunom kin sɛ banet e ni kurat, nek anɔng, a di fɛ̀,

<<ATisa fɛ̀, izen bi bɛ́,

fi in bi rosom kushii kufas

ne banet aIsrela

ne banet aYahuda.

9 I bi se ti irosom kushii

fi in ki nye

ne badakop bá awo.

Ni izen yɔng fi in kin

ka ba sok ni bɔk

in ka ba tun ni mben aMasat,

nek da ba bereng

irosom kushii hom

na katsak awo.

In ma ka ba tirik kama,

aTisa tak anɔng.

10 Irosom kushii me kang

fi in da nye ne banet aIsrela.

In bi te ifɛ́ hom ni kuyiring bá

ni in tin jɛk ide na ayɛ bá

ama izen e yɔng,

aTisa tak anɔng.

In da sot Adakunom bá,

ni iba sot banet hom.

11 Da ma akak tɛ tees

afidang isot wu awo,

kɛ anet na tees arunyining ye,

<Rēn aTisa me.>

Nek ba bi di rēn ngma ba,

i bi tumung e na a wosong bá

sak na akoo bá.

12 Nek in bi ka ba fuut anyas bá

in bi tin yiring

na anɛn bá kong awo.>>

13 Ni izen fɛ́ ba yes irosom kushii ku kang <<kufas>> Iwu mi sak kufi imɛsɛng e kusot kuzen. Ngma ikyɛng fɛ́ ba mi yes ide izén, i sot i mi kop, idɔng i mi bɛ́ bakat iwey.