1 Inɔɔk atsak yet irēn tsɛngtsɛng ni nkyɔrɔk ite iyɛ, ni irēn wɛshɛk nkyɔrɔk fɛ́ ba kyem ba di ina awo. 2 A yet inɔɔk atsak e yeng ye fi i sak Adakunom di shim adakop ayame. 3 Ni inɔɔk atsak e ye fi in di rēn yit fok ba kin nye kazatse ni ifɛ̀ Adakunom, nɔng in da rēn yit fok nkyɔrɔk nang fi in yɛrɛ yit ina, ba nye ina ni nkyɔrɔk fɛ́ in tsang di se awo.

4 Ni inɔɔk atsak ye, fɛ́ aHabila kin nɔɔk Adakunom inabak-akuce fi kuwaat kufɛ́ aKayinu ni kusas. Na anɔng wu fɛ́ Adakunom ku tere mo tɛ anet kusot kutabat, nek Adakunom shan nnang wu. Ngma fɛ́ aHabila me mi iku, awɛt nek inɔɔk atsak wu, a rēn cɛɛt atut.

5 Ni inɔɔk atsak ye fɛ́ ba kin sok aEnɔk ni kutset, a kin di iku awo, nek Adakunom kin ku sok fyew, wɛrɛng. Ni izen fɛ́ a resek dang na ba ku sok e, Adakunom kin ku tere ye, a yet anet fɛ́ a tɛrɛk Adakunom iyɛ. 6 Ke dang ni inɔɔk atsak, vit anet fɛ́ a da kyem na tɛrɛk Adakunom iyɛ, nek ngma ayɔng fɛ́ a serek bakat na Adakunom, i se gbing-gbing na shan atsak fok Adakunom di se, nɛ fok, Adakunom da nɔɔk bayɔng fɛ́ ba ku tsɛt na tsak izang bá.

7 Ni inɔɔk atsak ye fi i sak aNuhu kin di fok itabak Adakunom naton nkyɔrɔk fi in resek dang te. A fok ifɛ̀ Adakunom, a di nok kukyɛ ashi fɛ́ a di sheshek bafɛ́ ari wu. Anɔng e wu i sak ba di tsɛɛt kazatse ishɔt, wat iwu di sot afi iya itekari, afi kusot tabat fi ines ni inɔɔk atsak.

8 Ni inɔɔk atsak ye fi aIbrahim, izen fɛ́ Adakunom ku yes fok na a tseng sak ni mben fɛ́ ku da ni kusot ku fuu, a fok ifɛ̀ me, a tseng, ngma ne fɛ́ da a tsang rēn karɔ fɛ́ a di ki tse me awo. 9 Ni inɔɔk atsak, a sot tɛ a tseng ni mben fɛ́ Adakunom ku nye kushii a da ku nɔk. A sosok ayɛt abut, bi aIshaku nɛ aYakub yɔng anɔng bà. Ba kin yet bafi ishan kushii iya itekari me gung ni iwu. 10 AIbrahim kin ta ayisi sak ashon, nɔng a di ki di kuwɔp fɛ́ ba ta itis e, fɛ́ ayɔng fɛ́ jirim ko ni inok ko, yet Adakunom.

11 Ni inɔɔk atsak ye fɛ́ ngma ni ikop aIbrahim pusuk, ni ikuma fɛ́ aSara kin di se, ngma na anɔng, Adakunom ku sak a sot atek nggon, nek a rēn fok anet fɛ́ a ku nye kushii me, a bɛ̀ katsak. 12 Nek anɔng, ni irɔm anet azining yong fɛ́ a mi kop bakat iku, a bɛ́ a sɛ izit fi kudot e se tɛ ádat atomaza, ni ku josh e se ti izɛk anu ashi izek.

13 Di yin! Ngma banet e bang kusum ba kin nɔɔk atsak bá sak na Adakunom sak ama iku bá. Da ba kin tsang shan nkyɔrɔk fɛ́ Adakunom kin ka ba nye kushii me awo, ba di ina ayɛt ayɛ bá kyɛk, awɛt ba shan ina ni in tsin resek yik-yik, ba kin bɛ̀ iyɛ ikan fɛ́ ba di ina. Ba rēn wɛshɛk fok iba yet batsen fɛ́ ba se ni kutseet azatse. 14 Banet fɛ́ ba cɛɛt anɔng, ba tonong wɛshɛk, fok iba tsin tsɛt mben fi in da sot nfuba. 15 Ke ba kin fɛ́ ba sak kuyiring bá naton mben fɛ́ ba mi won ina, ke ba mang tɛ ba tsɛt irèn ibun ni ina. 16 Wat tɛ ane ningya, ba kin waat ni te iyɛ ni mben fi in waat ni kusas, fi in yet kazanɛn. Nek anɔng, Adakunom foos nsum na ba ku yes Ada bá awo, nek iwu mi nye kuwɔp nek iba.

17 Ni inɔɔk atsak, ni izen fɛ́ Adakunom kin mara aIbrahim ye, na a nabak aIshaku inabak-akuce. Iwu fɛ́ a mi shashang kushii me, a mi kana nye nɔng a da nabak inabak-akuce arim wu azining pɛɛt e. 18 Ngma na fɛ́ Adakunom mi fɛ̀ ni wu ye, <<A yet ni aIshaku wu fɛ́ ba bi di fa izit ngɔn.>> 19 AIbrahim kin rēn ni iyɛ wu fok, Adakunom da kyem a donong nkom, in da kyem in fɛ̀ yit, aIbrahim kin tɛ a shan aIshaku ni kutset. 20 Ni inɔɔk atsak, aIshaku kin te ncicɛ na aYakub na aIsuwa ni nkyɔrɔk ntek fi in bi bɛ́ ashon bá. 21 Ni inɔɔk atsak, izen fɛ́ aYakub bɛ́ bakat na a ku, a te yɛndɛng na agbanding wu ni iya Adakunom ntong, a di te kaakyi nggon aYusufu ncicɛ.

22 Ni inɔɔk atsak, izen fi iku aYusufu bɛ́ bakat, a kin tak ibes kuwuruk nnon aIsrela na aMasat, a kin nɔɔk ifɛ̀ abes azaton akup wu.

23 Ni inɔɔk atsak, izen fɛ́ ba kin tes aMusa, batèk tsɛ ba ku nɛt nfi nfɛn ntaat, nek ba di fok, a yet ihwyas nggon awo, nek anɔng ba fok nnyim itsɛɛt ishɔt agwɔm awo.

24 Ni inɔɔk atsak, ni izen fɛ́ aMusa mi rasak, a kin rawu na ba ku yes arim angas aFirauna. 25 A kin kasa ba ku nesek izot gung na banet Adakunom, aza fɛ́ a da ya nta isot ni iras anɛn nfi kizen gyeet kyɛk. 26 A kasa ba ku tes nsum nek Anet-Isheshek ku wat e ni iratek, aza kurúm aMasat, nek a kin bɛ̀ ite iyɛ a bi sɛ izang wu sak ashon. 27 Ni inɔɔk atsak, aMusa kin won mben aMasat, vit ifok nnyim naman agwɔm e awo. A tsɛsɛk nek a kin di iwu ayɔng fɛ́ a se ni nɛt. 28 Ni inɔɔk atsak, aMusa kin sak na ba ra Amok aPasova, ni ifim nasok na atitu, nɔng ke atom ifɛɛs nnon imɛsɛng e a got, a da won na fi aIsrela.

29 Ni inɔɔk atsak, nnon aIsrela kin tat Kugbat Kukyɛk Kuseng ni mben nkoot, awɛt izen fɛ́ bafɛ́ aMasat fɛ́ mara itaat e, ashi ka ba ya.

30 Ni inɔɔk atsak, abat iwɔp aJeriko kpas, ama fi nnon aIsrela mi gorok ina ayɛt nkɔs kanakataat.

31 Ni inɔɔk atsak, inyak agwɔm aRahab, nek a shan bafi ifarang narɔ bafi aIsrela, nek anɔng, da ba kin ku fɛt mo gung ni ishɛrɛp bayɔng fɛ́ ba se gbarak awo.

32 Akyɛ fi in da tin in fɛ̀ kong ɛ? In bi izen fi in di ki cɛɛt naton aGidiyɔn, kɛ aBarak, kɛ aSamson, kɛ aJefta, kɛ aDauda, kɛ aSamela, kɛ ishɛrɛp batan awo, 33 bayɔng fi ni inɔɔk atsak, ba ya bágwɔm mben zizɛɛt ni itsom, ba ras ishɔt atsak, ba shan ikyɛng fɛ́ Adakunom kin ka ba nye kushii me ne. Ba faam nanu akukum, 34 ba riming kuvɛɛt árong, ba hwyet iku awal. Bayɔng fɛ́ Adakunom tirik kugbɛrɛk bá sak na agap, ba sɛ kugap ni ira itsom, ba di ya bayɔng fɛ́ ba bɛ́ ba ka ba kyere ni itsom.

35 Banyining tɛ ba shashang nkom bá, fɛ́ ba donoso ina ni kutset. Ba zoot bakak bá, ba raba ba ka ba bisik washak, nɔng ba bi di sɛ idoro ifaben itek. 36 Ba fɛɛs na ba hwyereng bakak ba, na ba tɛ ba rosom bakak ni inyang, na ba ka ba yirik ari inyang. 37 Ba ka ba bara na ata, ba ka ba sarak nate ni ítsot-anyi, ba ka ba fɛɛs na awal. Ba teng ba kat na akpa itsamang na afi ibón ni nrɔm bá, ba se ayɛt avit kpɛt-kpɛt, ni kusot ni izoot, ni iyɔm. 38 Ni iba, kazatse ka ba yet karɔ isot awo. Ba teng ba kat ne natse, nɛ naton ahwyanang, na ba kɔs na atas nɛ ayɛt ábóng.

39 Ngma ba, ba kin sɛ itere nek inɔɔk atsak bá, ngma na anɔng, vit azining ba fɛ̀ a kin tsang sɛ ikyɛng fɛ́ Adakunom kin nye kushii me. 40 Nek Adakunom kin man nye ikyɛng fi iwaat ni itek, nɔng iba da kyem ba sɛ ikyɛng fi i yet igyat e me, dang iyit awo.