1 AMelkizedek yong a kin yet agwɔm aSalem, a tɛ a yet àware Adakunom Azɔk Bazɔk. A kin nyim ne aIbrahim ni ku bun wu, ni izen fi aIbrahim kin ya awɛng azaton bágwɔm bakak ni itsom. A da ma ku te mo awɛng. 2 AIbrahim da ne a ku nɔk kigbasak ifɛ́ akaakyi ikyɛng fɛ́ a bɛ̀. Ni imɛsɛng e, iyerek aMelkizedek tonong, <<AGwɔm kusot kutabat>> nɛ <<AGwɔm aSalem>> tonong, <<AGwɔm kusot kukyang.>> 3 A se dang ada ni nggɔ, dang atutup izit, dang kunom ites ni kufi iku wu, a se tɛ Arim Adakunom, a sot àware ayɛ vit nkum e.

4 Di yin kuri iratek fɛ́ anet yong bɛ̀. Fɛ́ adakop yit aIbrahim ku nɔk kigbasak akaakyi ikyɛng fɛ́ a foshok ina ni itsom. 5 Ayɛt ntsi aMusa, bafi izit aLawi fɛ́ ba yet áware, ntsi ka ba nɔk kanu ishashang igbasak na banet, banet fɛ́ ba yet baruneng bá, ngma ne fɛ́ ba yet bafi izit aIbrahim bà. 6 Awɛt aMelkizedek, iwu fɛ́ da a yet atutup afi izit aLawi awo, ngma ne anɔng, a shan kigbasak ni aIbrahim, a ma ku te mo awɛng, iwu fɛ́ ba mi tsang ku nye kushi. 7 I se wɛshɛk fok, anet akoo wu a te ncicɛ na anet a wosong.

8 Naton kucɛɛt áware fɛ́ ba ne ni izit baLawi, ba yet banet fɛ́ ba kus, ngma ne anɔng, ba shashang igbasak. Awɛt naton aMelkizedek, iwu fɛ́ ba nɔɔk kanu ifɛ̀ ni wu fok a se ni kutset, a shan igbasak ni aIbrahim. 9 Anet da kyem a fɛ̀ fok, aLawi ni ice wu, fɛ́ bafi izit wu ba ba shashang igbasak, a nɔɔk ifuu ni bɔk aIbrahim. 10 Nek in da kyem in fɛ̀ ane, izen fɛ́ aMelkizedek nyim ni aIbrahim, ba mi tsang tes aLawi ngma awo, a tsang resek ni irɔm izit aIbrahim ninyɛn.

11 Kɔ di, nse iware kuri kufi izit aLawi fi ku ne gung ni Ntsi fɛ́ ba kin nɔɔk nnon aIsrela na ba kuus ina. Awɛt yɔkɔnɔng, fi se fok, kutomong áware bafi izit aLawi me, ifi i yet fok, i shining Ntsi me kpaf, zɔng ke àware akak tɛ a bɛ́ zɛɛt awo. Awɛt àware me yɔng fɛ́ a bɛ́ ni nse aMelkizedek, da ni nse aHaruna awo. 12 Nek izen fɛ́ ba sɛ ishesheng ni kutomong iware, i se gbing-gbing na ba shesheng ntsi me bà. 13 Nek iwu ayɔng fɛ́ ba cɛɛt nkyɔrɔk nang naton wu, iwu aTisa yit, a ne ni izit ikak zɛɛt. Vit akak ayɛt izit wu azining fɛ́ a mang ra kutomong inasap kunang ni kuta ashosh tɛ àware.

14 Nek i se wɛshɛk fok, aTisa yit kin ne ni izɔrɔk aYahuda, aMusa kin fɛ̀ ikyi ikak naton izɔrɔk e yɔng awo, ni izen fɛ́ a kin cɛɛt naton áware. 15 Imak se wɛshɛk ningya ni ikyɛng fi ma tsang tak yit ide, àware akak ne zɛɛt tɛ aMelkizedek. 16 Ayɔng fɛ́ a mi sot àware, da ni irèn ntsi kɛ ni nggɔn banet awo, tit ni irèn ice fi inɔɔk kutset vit nkum. 17 Nek i se ni jɛk ye,

<<Ngɔn yet àware ayɛ na ayɛ,

ni nse aMelkizedek.>>

18 Ba kin wobok itees i yame, nek i se gbɛrɛk ni ifi kusot abap. 19 Nek da itees ntsi aMusa bɛ́ ni ishining ikyi ikak yɛɛt awo. Awɛt yɔkɔnɔng, irèn ikak fi iwat i yame mi tarak ifi ite iyɛ, fi i sak in di ki serek yit bakat na Adakunom.

20 I kin se dang kushii Adakunom awo, Awɛt bakak kin sot áware dang kushii kukak. 21 Awɛt iwu sot àware ni kushii ni izen fɛ́ Adakunom fɛ̀ ni wu,

<<ATisa me man shiwu,

a da shesheng

kuyiring wu awo.

<Ngɔn yet àware

ayɛ na ayɛ.> >>

22 Nek kushii me kang ko, fi ku sak aYeso nyeseng naton atsitsak irèn imoon kushii Adakunom nɛ banet fi ku wat ni kusas.

23 Kuri áware yame, ba kin se dot fi nek iku, ba kyem ba ya kashon ni kutomong iware bá awo. 24 Awɛt nek aYeso di nak ni kutset, kusot iware wu se dang nkum. 25 Nek anɔng, atut na katson, a da kyem na sheshek ngma bayɔng fɛ́ ba bɛ́ na Adakunom ni iyerek wu. Nek iwu di nak ni kutset, a sot ni iras awon sak na Adakunom nek iba.

26 Nek kuri agbat àware yong wu fɛ́ a ki tarasa yit ndaam yit. Ayɔng fɛ́ a se jɛrɛ, a se dang inɛn kɛ ikyi ikak iduk e awo, fɛ́ ba ku sak zɛɛt ne na bafi inɛn, ba tɛ ba ku nɔk iratek azaton nazanɛn. 27 Iwu se zɛɛt ni ishɛrɛp bagbat áware me. Nek iwu da nasap nnang ashosh nninom awo, ifi imɛsɛng e, a teng nabak na fi inɛn ice wu, a da ne nabak na fɛ́ anɛn banet. A mi nabak inabak-akuce e ite kazining pɛɛt nek anɛn bá, ni izen fɛ́ a nabak ice wu. 28 Ni itees ntsi aMusa, ntsi me fi ntonong irèn ite agbat àware fɛ́ a bɛ̀ kurat. Awɛt kushii fi ku ne ama Ntsi me, Adakunom sak Arim wu me na shining kpaf kusot Agbat àware ayɛ vit nkum.