1 AYeso fɛ̀ yɛ, <<Imi yet kakon anap kafe atsak e, Ada hom yet anet ikap ikɔ me. 2 Iwu tɛm kaakyi ihwyang ni imi fi i iraye dang tes, na nye kaakyi ihwyang fi ites ica, nɔng i da ban korok kutes. 3 Iyin se yin cɛ́l nek ifɛ̀ fi in mi ki tak yin. 4 Di nak yin ni mi, imi di ki nak ni yin. Vit ihwyang fi i da tes ica aziye, tit i di nak nɛ itin akon e. Nɛ anɔng, iyin da tes yin ice awo, ma i di nak yin ni mi.

5 <<Imi yet kakon anap e; iyin yet yin ahwyang e. Ngma ayɔng fɛ́ a di nak ni mi, imi di ki nak ni wu, a da korok kutes makiyi. Kɛ da ni mi awo, vit ikyɛng fi i da kyem i nye yin. 6 Ngma anet fɛ́ a rawu dan di nak ni mi, a se kpaf ti ihwyang fɛ́ ba barak iye, i koot; ihwyang ti idɔng, ba kok ide nɛ ba bara ni árong, ni kurong ya. 7 Ki i di nak yin ni mi, ifɛ̀ hom di nak ni yin, rip yin ngma ikyɛng fi i shim yin, ba da ki nɔɔk yin. 8 Ane nesek Ada iratek, fok ni tes yin ica dot, ni tonoso iyin yet yin bafi ikuus hom.

9 <<Kpaf tɛ fɛ́ Ada hom di tonong ishim, anɔng fi Imi ki shemeng ba. Di nak yin ni ishim hom. 10 Ki ifoos yin ifɛ́ hom, i di ki nak yin ayɛt ishim hom, kyɔn ti imi di foos ifɛ́ Ada hom, ni in di nak ni ishim wu. 11 In tsin ki tak yin anɔng, nɔng iyɛ ikan hom, da se ayɛt in, nɔng iyɛ ikan yin bin shining. 12 Agbat ifɛ̀ hom yo: Shim yin bafidiin, kyɔn ti imi kin ki shim yin. 13 Vit anet fɛ́ a bɛ̀ ishim fi iwat iyeng: anet na mees kutset wu nek bafidang wu. 14 Iyin yet yin bafidang hom, ki i nye yin ikyɛng fi in fɛ̀ ni yin. 15 Imi ti in ki yes yin basam awo, nek asam kyem a rēn ikyɛng fɛ́ atekari wu se ne awo. Tit Imi ki yes yin bafidang hom, nek kaakyɛ fi in mɛɛs na Ada hom, in mi ki tonoso yin. 16 Da iyin ba i di kasa yin awo, tit Imi wu in ki kasa yin, in ki te yin, ni ites yin ica-ica fi ita ice. Na Ada ki nɔɔk yin ngma ikyɛng fi i ku rip yin ni iyerek hom. 17 Agbat ifɛ̀ min yo: Shim yin bafidiin.

18 <<Kɛ kazatse ki rayin, ni yiring yin, ka kin tun di ramin imi. 19 Ki i fi iyet yin bafɛ́ azatse, kɛ kazatse me ki shim yin tɛ bafuu. Kusɛ yɔkɔnɔng, iyin yet yin bafɛ́ azatse awo, nek imi man ki kasa yin ayɛt banet azatse; nek anɔng fɛ́ kazatse me ki rayin mo. 20 Yiring yin ni kucɛɛt fi in man ki tak yin: <Vit asam fɛ́ a wat atekari wu ni iratek.> Kɛ ba kin di nesek izot, kpaf anɔng fɛ́ ba da ki nesek yin izot ba. Kɛ ba kin fɛ́ ba di fok imi, ke ba ki fok yin bà. 21 Ba da ki nesek yin iyɔm anɔng, nek iyerek hom, nek da ba rēn ayɔng fɛ́ a di tom awo.

22 <<Kɛ da in kin fi in bɛ́, in bin in cɛɛt ni ba awo, kɛ vit iba ni inɛn. Yɔkɔnɔng, vit iba ni irèn ihwyet nek anɛn bà. 23 Ngma ayɔng fɛ́ a di ramin, a rawu Ada min bà. 24 Ki in kin fi ra ntomong abes nate ba, fɛ́ vit akak fɛ́ a kyem a ra awo, kɛ vit iba ni inɛn. Wɛt yɔkɔnɔng fɛ́ ba mi di ikyɛng fi in mi nye, ngma nɛ anɔng, ba di raba, ngma nɛ Ada min. 25 Awɛt ite anɔng, nek ba di shining ikyɛng fɛ́ ba kin jɛk ni ntsi ba yɛ, <Ba di ramin zɔng anɔng kyɛk.>

26 <<Ni izen fɛ́ Afidang Itseet e bi bɛ́, ayɔn fi in bi ki tom yin ne fɛ́ a ne narɔ Ada, Kabik atsak fɛ́ a bi ne narɔ Ada, a bi cɛɛt akuce hom. 27 Iyin bi ishara yin bà, nek iyin kin se yin gung ni mi, neeme ni meseng e.