1 BaFarasi sɛ kurēn fok yɛ, aYeso mi kpa sɛs banet abatisma fɛ́ ba wat bafɛ́ aYohana, 2 (atsak e yet fok da a yet aYeso ice wu fɛ́ a ka ba ras abatisma awo, ayet bafi imɛɛs wu ba ba ras.) 3 Izen fɛ aTisa fok anɔng, a won mben aJudiya sak ibun nɛ aGalili.

4 I se gbing-gbing nɛ got nate aSamariya sak azɔng. 5 Ayɛt anɔng a tsɛ ta naban wɔp aSamariya fɛ́ ba yes ika aSika, ka se bakat ni ikɔ dɔng fɛ́ aYakub kin nɔɔk ari wu aYusufu. 6 Ibong ashi aYakub kin se azɔng, aYeso tse sonong ni fam de nek irɔɔn kutseet, izen e kin se bakat, ka te inom.

7 Ni izen fɛ́ anya aSamariya akak tse, a tsɛ tok ashi, aYeso fɛ̀ ni wu, <<Di nang ashi in sɔ.>> 8 (Bafi imɛɛs wu mi tsang tseng sak ayɛt iwɔp nek ishan nayak.)

9 Anya aSamariya me fɛ̀ ni wu, <<Ngɔn yet anet aYahuda, imi yet anya aSamariya. Akyɛ te fi ngɔn di rip ashi isɔ yɛ?>> (Nek vit ikyɛng fi imoon baYahuda nɛ bafɛ́ aSamariya.)*

10 AYeso fɛ̀ ni wu, <<Ki ngɔn fi rēn kunang Adakunom, nɛ anet fɛ́ a da rip ashi me, ki ngɔn fɛ̀ ni wu, yɛ na da nang ashi fɛ́ a nesek kutset.>>

11 Abining e fɛ̀ ni wu, <<Akɔk-ashon, vit ngɔn ni ikyɛng ibɔ ashi me, di kutsik ibong e, i da tsa nɛ fi i da sɛ ashi kutset e yɛ? 12 Ngɔn wat adakop yit aYakub fɛ́ a kin ki won yit ibong ashi deng, fi iwu ice wu, ni nnon wu, ni nkpara wu kin sɔ ina ɛ?>>

13 AYeso fɛ̀ ni wu, <<Ngma ayɔng fɛ́ a sɔ ashi nang, a tɛ a foos iyɛ ngash, 14 ngma ayɔng fɛ́ a sɔ ashi me yɔng, fi imi da ku nɔk, a bi tɛ a fok iyɛ ngash awo. Nek ashi fi in da ku nɔk e, a da sot itis ashi ayɛɛt wu, fɛ́ a da ku nesek ashi kutset vit igang.>>

15 Abining e wat a fɛ̀ ni wu, <<Kabɔk akɔk-ashon, di nang kuri ashi me yɔng, nɔng in bi tin fok iyɛ ngash awo, nɔng in da fɔɔn ni bɛs azeng, nek itos ashi.>>

16 AYeso fɛ̀ ni wu, <<Tseng tsi di yɛs amatek ngɔn, nɔng i da bɛ́ yin.>>

17 Abining e fɛ̀ nɛ aYeso, <<Imi da in bɛ̀ amatek awo.>>

AYeso fɛ̀ ni wu, <<Ngɔn tak katsak! Ngɔn da i bɛ̀ amatek awo. 18 Katsak e yet fok, ngɔn mi sosok nɛ batek batoon, ngma nɛ ayɔng fi i se gung ni iwu yɔkɔnɔng da a yet amatek ngɔn awo. Kucɛɛt ngɔn yet atutup atsak.>>

19 Abining e fɛ̀ ni wu, <<Akɔk-ashon, imi di ti ngɔn yet àware. 20 Badakop yit ya ntong ni ihwyanang e, ni iyin baYahuda nye yin yɛ karɔ fi i se gbing-gbing ba di ya ntong yet aRushelima.>>

21 AYeso fɛ̀ ni wu, <<Anyin ari, nɔk atsak ni ifɛ̀ min, izen bi nye, fɛ́ vit ayɔng fɛ́ a bi ya Adakunom ntong azeng kɛ nɛ aRushelima awo ayi. 22 Iyin bafɛ́ aSamariya da i rēn yin ayɔng fi i ku ya yin ntong awo. Iyit ba in rēn yit ayɔng fi in ku ya yit ntong, nek isheshek ne narɔ baYahuda. 23 Ngma nɛ anɔng, izen bi nye, iyeng imi nye, fɛ́ bafi iya Adakunom ntong nɛ atsak, bi ya Ada me ntong ayɛt abik, nɛ atsak. Nek kuri bafi iya ntong fɛ Ada tsɛt yɔng. 24 Adakunom yet kabik, i se gbing-gbing bayɔng fɛ́ ba da ku ya ntong, nɛ ba ku ya ntong ayɛt abik, nɛ atsak.>> 25 Abining e fɛ̀ ni wu, <<Imi rēn fok Anet-Isheshek e fɛ́ ba ku yes <AKristi> bi bɛ́. Izen fɛ́ a bɛ́, a bi ki tees yit kaakyi ikyɛng.>>

26 AYeso ma fɛ̀ ni wu, <<Imi fi in tsin cɛɛt ni ngɔn yet iwu.>>

27 Ba se ni kucɛɛt, bafi imɛɛs wu bɛs ba. Ayɔɔt ka ba yit fɛ́ ba ku sɛ na tsin cɛɛt nɛ abining e, awɛt vit akak ba fɛ̀ a nɛ a kyem a ngamang kanu a ku rip mo, ikyɛng fɛ́ ba se ni icɛɛt e. 28 Abining e won kuwang ashi wu bakat ni ibong ashi me, a tɛ bun sak ne ban wɔp e, a tsɛ tak banet ifɛ̀ me, yɛ, 29 <<Bit, tsi di yin anet fɛ́ a mi di tak ngma ikyɛng fi in ki mang ra, ke iwu wu ayet Anet-Isheshek me ayi?>> 30 Banet iwɔp e yit irèn sak narɔ aYeso.

31 Ni izen e yɔng, bafi imɛɛs wu fɛ̀ ni wu, <<ARabay, te ikikak na nu.>> 32 A fɛ̀ ni ba, <<Imi bɛ̀ nayak iya fɛ́ da iyin rēn yin ikikak naton na awo.>>

33 Bafi imɛɛs wu me kpa kana risim, <<Ke akak mi bɛ́ a ku nɔk ikyɛng iya yɛ?>>

34 AYeso ma fɛ̀ ni ba, <<Kuyak yin yet ni in ra kushim ayɔng fɛ́ a di tom, sak igang e. 35 Iyin nye yin yɛ, <Ishɛrɛp mo nfen nnaas ishamang ni nye> anɛ? Won in ki tak yin, tarak yin ayisi, i da di yin akɔ! A mi ben ishɛrɛp itusung e. 36 Yɔkɔnɔng ana, afi itusung e tsin shashang izang wu, a se ni tusung kuyak e, sak i sɛ kutset vit igang, nɔng afi ituus e, nɛ afi itusung e, da bin nye iyɛ ikan ngma bà. 37 Kpaf ti itin ifɛ̀ de, <Akak tuus, akak itusung.> Ifɛ̀ me yet atsak. 38 Imi ki tom yin ni tsi itusung yin ikyɛng fi da iyin mi sɔ yin isam naton e awo. Bakak mi sɔ isam e, iyin nɔng imi tusung yin izang mgbang ba.>>

39 Banet aSamariya dot bafi iwɔp e yɔng, nɔɔk atsak nɛ aYeso nek ikyɛng fɛ́ abining e fɛ̀ ni ba yɛ, <<A di tak ngma ikyɛng fi in ki mang ra!>> 40 Izen fɛ́ bafɛ́ aSamariya me tsɛ ba ku sɛ, ba tsot akabɔk ni wu yɛ nɛ a ban sot ni ba, a ban te nkɔs nfaa azɔng. 41 Nek ifɛ̀ wu, banet dot ban di nɔɔk atsak. 42 Ba fɛ̀ nɛ abining e, <<Yɔkɔnɔng, iyit mi nɔɔk yit atsak, da nek ikyɛng fi ngɔn ki tak yit kyɛk awo, ayet nek ikyɛng fi iyit mi fok yit ice yit, iyit mi rēn, yit ye anet yong, yet atutup Anet-Isheshek azatse.>>

43 Ama nkɔs nfaa me azɔng, aYeso won mben aSamariya sak nɛ aGalili. 44 (AYeso ice wu a ki mang tonong wɛshɛk fok yɛ, àware bɛ̀ iratek ni wɔp fɛ́ a di ne awo.) 45 Ni izen fɛ́ a tsɛ a ta nɛ aGalili, banet aGalili me ku te show ni ku bɛ́, nek iba kin di ikyɛng fi i kin te azɔng nɛ aRushelima ni izen amok aPasova, nek iba kin se azɔng bà.

46 AYeso tɛ tsɛ nɛ aKana afɛ́ aGalili, narɔ fɛ́ a kin di tirik ashi sak ashi anap. Azɔng, anet itomong igwɔm akak kin di se fi nggon wu kin se na meneng ni rɔk nɛ aKafarnahum. 47 Ni izen fɛ́ anet e fok yɛ, aYeso mi won mben aJudiya, a mi bɛ́ ta ni mben aGalili, a tsɛ narɔ aYeso, a ku tsot akabɔk fok yɛ, na ku a ku kuus mo sak nɛ aKafarnahum, a da bin tsɛ a te ari wu kyang.

48 AYeso fɛ̀ ni wu, <<Ki da iyin di yin ikyɛng ayɔɔt, ni ntomong abes ninyɛn awo, i da nɔɔk yin atsak awo.>>

49 Anet itomong igwɔm e, fɛ̀ ni wu, <<Kabɔk atekari, bit ziri kɔn nggon yin bi ku.>>

50 AYeso fɛ̀ ni wu, <<Tseng sak ari. Nggon ngɔn da te kyang.>>

Anet e nɔɔk atsak ni ifɛ̀ aYeso, a yit irèn sak ari. 51 Ni wu resek mo dan ta ari, a wat a nyim nɛ basam wu ni irèn, ba ku tak fok ari wu mi te kyang. 52 A ka ba rip izen fi nggon e kpa sɛs kukyang, ba fɛ̀ ni wu, <<Ifes e ku won ni ire, bakat itsɔm izining ifi inom.>>

53 Ada me wat a rēn, fok kpaf izen e yɔng fɛ́ aYeso fɛ̀ ni wu, <<Nggon ngɔn da te kyang.>> Nek anɔng, ngma banet ari wu nɔɔk atsak nɛ aYeso.

54 Kutomong abes kang kin yet kufe afaa, fɛ́ aYeso kin ra nɛ aGalili, ama fɛ́ a ne na aJudiya.