1 In shim in rip ane; Adakunom rawu banet wu yɛ? Koba! Nek imi ice hom, in yet afɛ́ aIsrela, fi in ne ni izit aIbrahim, in ne ni izɔrɔk aBanyami. 2 Adakunom ki mang rawu banet wu, bayɔng fi iwu ki mang kasa awo. Iyin rēn yin ikyɛng fi ifɛ̀ Adakunom kin fɛ̀, naton kukun fi aIliya kin nye naton banet aIsrela ashon Adakunom awɛ? 3 <<ATisa, ba mi fɛs batan ngɔn, ba mi yirik narɔ kuta ashosh ngɔn, imi azi hom kyɛk fi in di tuk, bayɔng ba tsin tsɛt kutset hom.>> 4 Awɛt akyɛ fɛ́ Adakunom kin fɛ̀ ni iwu yɛ? <<Imi mi sak ice hom banet agup kanakataat, bayɔng fɛ́ da ba man te gururuk akut bá na aBaal awo.>> 5 I se kpaf anɔng ni izen iyeng, ishɛrɛp banet di se, fɛ́ Adakunom mi myak ayɛt itek wu. 6 Ki ikasa me yet nek itek Adakunom, idɔng tonong fok, i yet nek kutomong kutek awo, nek ki ifi i yet nek kutomong e wu, idɔng tonong fok, itek Adakunom e sot ifɛ́ atsak awo.

7 Wɛt i da se anɛ? Ikyɛng fɛ́ banet aIsrela kin tsɛt makiyi ba bit ide, awɛt bayɔng fɛ́ Adakunom kasa iba ba ba sɛ ide, awɛt ishɛrɛp e sot gbarak. 8 Kyɔn ti i di se ni jɛk ye,

<<Adakunom ka ba nɔk,

kabik ishɔp,

a ka ba nɔk ayisi

fɛ́ da a yɛrɛ awo,

na ato fɛ́ da a foos awo,

sak atut ana.>>

9 ADauda fɛ̀,

<<Won kuyak bá

ni ku ka ba sot agunung,

fɛ́ a da ka ba yisik,

won na a ka ba sot kuta ikpas,

na a ka ba sot ishɔt.

10 Won ayisi bá

na a sot hwyinin,

kɔn ba bi yɛrɛ,

won nama bá na na gɔmɔsɔ

ayɛ ne ayɛ.>>

11 Won in ban rip ane, ikpa bafi aIsrela me se vit idorok ɛ? Koba! Anɛn bà te mok Ícɛn-iduk bin di sɛ kawat isheshek, nɔng i da bin sak bafi aIsrela di fok ifup. 12 Ki inɛn bafi aIsrela bɛ́ ni itek sak azatse, ki kurat bá bɛ́ ni itek sak ni Ícɛn-iduk, wat iyin di yin, itek e bi se anɛ ni izen fɛ́ ba bi moon bafi aIsrela nɛ bayɔng fɛ́ Adakunom mi ka ba sheshek ɛ?

13 Imi tsin cɛɛt ni iyin bafi Ícɛn-iduk. Ayet fok imi yet atom aYeso sak ni Ícɛn-iduk, in da bamang kukaa ni kutomong kang fi in se ne, 14 ni ite iyɛ fok, nyen in sak banet hom ba di fok ifup, nyen bakak ayɛt bà di sɛ isheshek. 15 Nek ki iraye fɛ́ Adakunom ka ba raba, i yet inosong-ashi sak azatse, wat izen fɛ́ ba bi ka ba shan, i bi se tɛ banet fɛ́ ba ka ba donong ni kutset awɛ? 16 Ki icɛk akpam fɛ́ ba nabak Adakunom e, tɛ nayak imɛsɛng se jɛrɛ, a sot ngma akpam e se jɛrɛ, kɛ aney akon e se jɛrɛ, a sot ahwyang e se jɛrɛ bà.

17 Ke ba mi tɛmɛng ahwyang e akak, ba ki tup yin mo iyin, fi i yet yin atin-akon ifat ayit akon e, yɔkɔnɔng i tsin sɔ yin nta fi in nes na aney akon ifat e. 18 Nek anɔng, i bi ka nye yin kukaa ti iyin got yin ahwyang aya awo. Nek ke i nye yin anɔng, yiring yin ni fɛ̀ de, da ahwyang na a gbinding aney e awo, tit aney e na a gbinding ahwyang e me. 19 Nyen iyin nɔng i da fɛ̀ yin, <<Ba ki mang tɛsɛng ahwyang e, nek ba ki bas yit mo.>> 20 Ifɛ̀ me dɔng anɔng, ba kin tɛsɛng ina na akon e nek avit inɔɔk atsak na, iyin nyeseng yin nek inɔɔk atsak yin, nek anɔng, i bi nye yin kukaa awo, tit ni i sot yin ayɛt inyim. 21 Nek ke da atitup ahwyang e kyem a hwyet ni bɔk Adakunom awo, iyin da kyem ihwyet yin bà awo.

22 Na anɔng wu, in di di yit itek ni ife Adakunom. A tonoso ife wu sak na bayɔng fɛ́ ba kpas, awɛt na tonoso itek wu sak ni yin, ki i ya yin kashon ni kusot ayɛt itek wu, ke i nye yin anɔng awo, ba da ki tɛn yin bà. 23 Ki bafi aIsrela wosong avit inɔɔk atsak bá, ba da tɛ ba ka ba tup na akon e, nek Adakunom bi ízɔk inye anɔng e. 24 Ke ba kin ki tɛmɛng yin na kakon ifat ayit, ikyɛng fi ise gbang na ba nye, ba tɛ ba ki sɛp yin na kakon ifat fɛ́ ba tup ari, akyɛ da ni gaat na ba sɛp ihwyang akon yɔng fɛ ba tɛmɛng na kakon kuri kuzining e yɔng ɛ?

25 Ábaruneng, imi shim ni i rēn yin ikyɛng inɛt deng, kɔn i bi ka nye yin kukaa fok iyin bɛ̀ yin irēn. Nshɛrɛp bafi aIsrela di bang ni kugbarak ice, anɔng e ya kashon sak izen fi kudot bafi Ícɛn-iduk mi sɛs ku bɛ́s na Anet-Isheshek. 26 Na anɔng wu fɛ́ ba di ki sheshek bafi aIsrela ngma kusum, kyɔn ti i di se ni jɛk,

<<Anet-Isheshek e bi ne na aSihiyona,

a bi tirik bafi izɔrɔk aYakub

sak ni ikuus Adakunom.

27 Irosom kushi hom

bi se ane ni iba

ni izen fi in bi kaba fuut anɛn bá.>>

28 Nek ba raba ifɛ̀ itek, bafi aIsrela sot bafi ifa na Adakunom, anɔng e te nek itek Ícɛn-iduk, awɛt nek ikasa fɛ́ Adakunom ka ba nye ne, ba sot icɛk iyɛ Adakunom nek badakop bá, 29 Nek kunang Adakunom ni imyak wu se vit ishesheng. 30 Kyɔn ti iyin fi i tsang rayin ifoos ifɛ̀ Adakunom, awɛt yɔkɔnɔng, Adakunom mi fok angmishish yin nek iraye Adakunom fɛ́ bafi aIsrela nye, 31 yɔkɔnɔng, iba mi sot bafi iraye Adakunom, nɔng ba bin di sɛ angmishish Adakunom e yɔng fi iwu kin ki nye yin ne. 32 Nek Adakunom mi rosom banet ngma ayɛt iraye, nɔng a da sɛ a bin tonong angmishish wu na kaangan.

33 Di yin, kutsik irēn ni kutsitsɛng Adakunom!

Angan da kyem a rēn

irèn ishɔt wu yɛ,

ni irén inyes nkyɔrɔk wu yɛ?

34 <<Angan man kyem

a rēn kuyiring Adakunom ɛ?

Ke angan man sot

anet itabak wu yɛ?>>

35 <<Angan man nɔk

Adakunom akyɛ?

Fɛ́ a tsɛt na a ku tarang ɛ?>>

36 Nek kaakyɛ nes ni wu, iwu berese kaakyɛ, kaakyɛ se nek iwu. Won na ba ku nesek iratek ayɛ ne ayɛ. Anɔng.