1 Nek anɔng, yɔkɔnɔng vit ishɔt fi i kyɛk naton bayɔng fɛ́ ba se ayɛt Anet-Isheshek aYeso. 2 Nek ni irèn aKristi Yeso, ntsi Kabik fi in nesek kutset, in mi ki bisik washak ni bɔk ntsi inɛn fi in bɛ́s ni iku. 3 Nek ikyɛng fi ntsi me kyɛm in nye awo nek kurat nggɔn anet awe, ide de Adakunom kyɛm a nye. Adakunom tom azizɛɛt ari wu ni nse banet inɛn, nek na a sot nabak-akuce ikanang anɛn. Na anɔng wu fɛ́ a di tsɛɛt inɛn ishɔk iku ni nse anet awe, 4 Adakunom nye anɔng e nɔng ngma nkyɔrɔk ntabat fi ntsi me fɛ̀, bin se ishining ayɛt yit, iyit bayɔng fɛ́ da in kuus yit nse anet awe awo, tit nse abik.

5 Nek bayɔng fɛ́ ba se kusot ni nse anet awe, ba tes iyɛ bá ni nkyɔrɔk fi nse me shim, awɛt bayɔng fɛ́ ba se kusot ayɛt abik, ba tes iyɛ bá ni nkyɔrɔk abik. 6 Nek kuyiring nse anet inɛn bes ni iku, awɛt kuyiring nse abik, bes ni kusot kukyang. 7 Nek kuyiring anet inɛn, yet ifa na Adakunom. I fok itabak ntsi Adakunom awo, kɛ ni nye ide ayi. 8 Bayɔng fɛ́ nse anet awe na in ka ba kɔk kutaa, bayɔng da kyem ba nye Adakunom iyɛ awo.

9 Awɛt iyin, da nse anet awe na in ki kɔk yin awo, tit Kabik ka ka ki kɔk yin, nek Kabik Adakunom se ayɛt yin. Awɛt ngma ayɔng fɛ́ da Kabik Anet-Isheshek se ayɛt wu awo, ayɔng e yet afuu awo. 10 Awɛt ke Anet-Isheshek se ayɛt yin, nrɔm yin bi kus nek inɛn, ngma na anɔng kabik yin yet atset nek kusot kutabat yin ashon Adakunom. 11 Ke Kabik ayɔng fɛ́ a donong aYeso ni irɛk se ni kusot ayɛt yin, iwu yɔng fɛ́ a donong Anet-Isheshek ni irɛk e, bi nɔɔk nrɔm yin fi in kus kutset fi ku nes na abik wu, iwu yɔng fɛ́ a se kusot ayɛt yin.

12 Nek anɔng ábaruneng, in bɛ̀ yit kutomong ira, da ni ras yit ishim irɔm awo. 13 Nek ki i nye yin kusot ni nse inɛn, i da kus yin, awɛt ki i nye yin kusot abik, i da sak yin aduk ntomong nrɔm da kus, ni iyin sot yin ni kutset. 14 Nek bayɔng fɛ́ Kabik Adakunom ka ba kɔk kutaa, iba ba, ba yet nnon Adakunom. 15 Nek da iyin shan yin kabik isam fɛ́ ka bɛ́s ni inyim awo, tit Kabik nggon ari. Kabik e ki nesek yit agap iye in di yes yit Adakunom, <<Abba!* Ada hom!>> 16 Kabik Adakunom ice wu, gung na kabik kafiit, ki taas yit fok, iyit yet yit nnon Adakunom. 17 Yɔkɔnɔng fi in yet yit nnon, in mi sot yit bafi iya itekari Adakunom. In da ya yit itekari me gung na Anet-Isheshek, ki in sɔ yit izot gung ni iwu, anɔng e da sak in bi sɔ yit nta gung ni iwu bà.

18 Nek imi mi di fok, izot fi in tsin sɔ yit yɔkɔnɔng, ba da kyem ba mara ide ni ízɔk fɛ́ ba bi ki tonong yit ashon awo. 19 Nek ngma nkyɔrɔk fɛ́ Adakunom nye, in bi iyɛ ingash makiyi nek ku di izen fɛ́ Adakunom bi tonong nnon wu. 20 Nek nkyɔrɔk fɛ́ ba nye me in sɛ ice na ni firik, da iyet ikasa de awo. Awɛt i te anɔng ni kushim ayɔng fɛ́ a nyɔrɔk ite iyɛ na me 21 fok atukak ba bi bisik nkyɔrɔk fɛ́ Adakunom nye me ni isam ibush, in bi sɛ nta ntek fɛ́ ba bi nɔɔk nnon Adakunom.

22 Nek iyit rēn yit, sak atut ana, ngma nkyɔrɔk fɛ́ ba nye, in tsin rus ni mgbang tɛ abin-ites. 23 Da nkyɔrɔk fɛ́ ba nye me kyɛk awo, ngma ni iyit, in tsin rus yit, iyit fɛ́ Kabik mi ki nɔɔk yit kunang imɛsɛng, in se ni itot yit ni iyɛ ngash izen fɛ́ Adakunom bi ki sok yit ti nnon wu, na ma bisik nrɔm yit washak. 24 Ayet nek ite iyɛ yeng ye fɛ́ ba ki sheshek yit mo. Awɛt ite iyɛ ni ikyɛng fɛ́ ba mi di, iyet ite iyɛ awo. Angan tɛ a di te iyɛ ni ikyɛng fɛ́ a mi tsang di yɛ? 25 Awɛt ki ite iyɛ yit se naton ikyɛng fi in resek yit dang sɛ yit, in da tot yit ide ayɛt akabɔk.

26 Kpaf anɔng wu fɛ́ Kabik e ki sɛs yit mo ayɛt avit agap yit. Nek da iyit rēn yit irèn fi in di ki ra yit awon awo, tit Kabik ka ice ka, ka ras awon akuce yit ni irus vit kucɛɛt. 27 Iwu Adakunom fɛ́ a yɛrɛ kutsik ayɛ yit, a rēn ngma kutɔrɔng Kabik, nek Kabik e ras awon akuce bafɛ́ ajɛrɛ kpaf ni kushim Adakunom.

28 Iyit rēn yit fok ayɛt akaakyi ikyɛng, Adakunom nyes ikyɛng itek nek bayɔng fɛ́ ba kushim, bayɔng fɛ́ ba mi ka ba yes kpaf ni ite iyɛ wu. 29 Nek bayɔng fɛ́ Adakunom mi rēn, a tɛ kasa iba nɔng ba bin tas ari wu, nɔng iwu bin sot kutes ashon ayɛt baruneng wu dot. 30 Bayɔng fi iwu mi myak me, a tɛ a ka ba yes, bayɔng fi iwu mi ka ba yes e, ishɔt iwu mi ka ba sak kutabat, bayɔng fɛ́ ba mi ka ba sak tabat e, a ka ba te iratek.

31 Akyɛ fi in da fɛ̀ yit naton ikyɛng deng ɛ? Ke Adakunom se abak yit, angan da kyem a ra ifa ni iyit ɛ? 32 Iwu fɛ́ da a rone ari wu awo, awɛt a nabak ari wu me nek iyit ngma, a da won dang ki nɔɔk yit kaakyi ikyɛng ni kubɔk washak ɛ? 33 Angan da kyem a te kukun bayɔng fɛ́ Adakunom mi myak yɛ? Adakunom wu fɛ́ a sak banet sot tabat. 34 Angan da kyem a ka ba tsɛɛt ishɔt iku yɛ? Nek Anet-Isheshek aYeso wu fɛ́ a kin ku, ama iku me, Adakunom tɛ a ku donong ni kutset, yɔkɔnɔng, a se ni sonong ni bɔk iyak Adakunom, a tsin ras awon mok iyit. 35 Angan da kyem a ki kam yit ni ishim Anet-Isheshek yɛ? Ki ndaam ɛ? Ki izot ɛ? Ki mgbang ɛ? Ki nzong ɛ? Ke avit ares ite yɛ? Ke kawɛy ɛ? Ke awal ɛ? 36 Ki i di se ni ijɛk ye,

<<Nek ngɔn, in di nyis yit ni iku

kaakyi kunom;

Ba ki sok yit ti ítsamang

fɛ́ ba tse ba tsɛk.>>

37 Koba! Ayɛt akaakyi ikyɛng, iyit waat yit agap bayɔng fɛ́ ba ya mben, ni irèn ayɔng fɛ́ a ki shim yit. 38 Nek imi rēn tsɛngtsɛng fok vit iku kɛ kutset, kɛ batomaza kɛ itséng, kɛ nkyɔrɔk ayɔkɔnɔng kɛ nyɔng fi in bi bɛ́ ayi, kɛ bafi kukyem, 39 kɛ kusɔp kɛ kutsik, kɛ ikikak fɛ́ ba nye ide, fi i da kyem i ki kam yit ni ishim Adakunom fi i ne na Anet-Isheshek aYeso aTisa yit awo.